உலக உணவு கலாசாரத்தில் எல்லா நாடுகளிலும் கிடைக்கக்கூடிய டிஷ் என்றால் அது கேக்கும் பிரட்டும்தான். ஆரம்பத்தில் இதனை வாங்குவதற்கு நாம் பேக்கரிக்குத்தான் செல்வோம். 

சென்னை வள்ளுவர் கோட்டத்துக்கு பின்புறம் இருக்கிறது இவரின் கேக் ஷாப். இதில் கொரியன் பன், லோட்டஸ் பாப்கா, பிஸ்தா பாப்கா, குரோசண்ட்ஸ், சிங்கப்பூர் ஸ்டைல் ஐஸ்கிரீம் சாண்ட்விச் என உலகின் தனித்துவமான பேக்கரி ஐட்டங்களை விற்பனை செய்கிறார். அதுமட்டுமில்லாமல் நட்சத்திர உணவகங்களில் மட்டுமே கிடைக்கிற வெரைட்டி கேக்ஸும் இவரின் தயாரிப்பில் இருக்கின்றன. 

தவிர, சிங்கப்பூரில் கிடைக்கும் பல வெரைட்டி கேக் அண்ட் பிரட்களை சென்னைக்கு முதல்முதலாகக் கொண்டும் வந்திருக்கிறார். ‘‘சொந்த ஊர் சென்னைதான். சின்ன வயசுலேயே கேக் தயாரிச்சு அதை எல்லாருக்கும் சாப்பிடக் கொடுக்கணும்னு எனக்கு ஆசை. எப்படி இப்படியொரு ஆசை வந்ததுனு தெரியல. ஆனா, அது ஒரு கடையைத் திறக்கிற அளவுக்கு வளர்ந்திருக்கு...’’ என மெல்லிய புன்னகையுடன் பேசத் தொடங்கினார் ஹிஷ்மா பாத்திமா. 

‘‘பள்ளிப் படிப்பு முடிச்சதுமே கேக் தயாரிப்பு சார்ந்து படிக்கணும்னு நினைச்சேன். ஆனா, இன்டீரியர் டிசைனிங் படிக்கும்படி ஆகிடுச்சு. இருந்தும் கல்லூரியில் படிக்கும்போதே கேக் செய்யத் தொடங்கிட்டேன். 

ஆரம்பத்தில் வீட்டில் இருக்கிறவங்க சாப்பிட செய்து கொடுத்திட்டு இருந்தேன். அப்புறம் கொஞ்சம் கொஞ்சமா பிசினஸாக்கலாம்னு வீட்டில் இருந்தபடியே விற்பனையைத் தொடங்கினேன். ஆன்லைன் விற்பனை டெலிவரி மூலம் முன்னெடுத்தேன். ஆனா, ஆர்டர்கள் அதிகம் வந்ததால என்னால் வீட்டில் இருந்தபடி கொடுக்க முடியல.

அதனால், ‘த மெட்ராஸ் நீட்ஸ்’ கடையைத் தொடங்கினேன். இதன்பிறகு பிரட் தயாரிப்பில் ஆர்வம் அதிகமாச்சு. வெளிநாடுகள்ல பிரட்தான் பிரதான உணவு. அப்படிப்பட்ட பிரட்டை பல வெரைட்டில, குறிப்பா சென்னையில் எங்கேயும் இல்லாத சுவைல கொடுக்கணும்னு பயிற்சி வகுப்புகளுக்குப் போனேன். 

சென்னை, பெங்களூர்னு எல்லா இடத்திலேயும் கேக், பிரட் தயாரிப்புகளை முறைப்படி கத்துக்கிட்டேன். ஒவ்வொரு முறையும் கத்துக்கிட்டதும் அதனை வீட்டில் வந்து செய்து பார்ப்பேன். சரியான சுவையில் வர்ற அளவுக்கு செஞ்சு பார்த்திட்டே இருப்பேன். அப்படியாக எல்லா பிரட் ஐட்டங்களையும் கத்துக்கிட்டேன். 

இதில் பிரட் ஐட்டங்கள் என்றால் நம்ம ஊர்ல கிடைக்கிற சாதாரண பிரட்டுகள் மட்டுமில்ல... கொரியன் பிரட், பிரான்ஸ்ல கிடைக்கக்கூடிய பிரட், சுவிட்சர்லாந்து, சிங்கப்பூர் இப்படி பல நாடுகள்ல கிடைக்கும் பிரட்டுகளை தயாரிக்கவும் கத்துக்கிட்டேன். அதனை இப்ப ஒரே இடத்துல கிடைக்கும்படி செய்திருக்கேன். 

இந்த மாதிரி பேக்கரி ஸ்டைல்ல வெரைட்டி பிரட்ஸ் கொடுக்கணும் என்பது என் ஆசை மட்டுமில்ல, அது என்னோட பேஷனும் கூட. கேக்கின் சுவை, கேக்கின் வடிவம் இதெல்லாம் நல்லா செஞ்சா மட்டும் வந்துடாது. கேக் தயாரிப்புக்கான பொருட்களில் எந்தக் கலப்படமும் இல்லாத தரமான பொருட்களை வாங்கணும். அப்போதான் அந்த சுவை அப்படியே வரும். 

அந்த பிரட்ல ரெயின்போ கலர்ஸ் கொண்டுவந்து அதுக்குமேல ஐஸ்கிரீம், நட்ஸ், சாக்கோ கிரீம், சாக்லேட் எல்லாம் வைச்ச பிறகு அதை இன்னொரு பிரட்டைக் கொண்டு மூடி சாண்ட்விச் ஸ்டைல்ல கொடுப்போம். பார்க்கவே கலர்ஃபுல்லா இருக்கும். இப்பவரை எங்க கடையின் ஸ்பெஷல் இதுதான். 

அடுத்ததா ஃபிரான்ஸ் நாட்டு பிரேக் ஃபாஸ்ட். இந்த பிரட்டின் பெயர் குரோசண்ட். அதை செய்வதற்குத்தான் அதிக நேரம் எடுக்கும். அதேபோல, அதன் செய்முறையைக் கத்துக்க மட்டும் ஐந்து முறை கோச்சிங் கிளாஸ் போனேன். ஏன்னா குரோசண்ட் செய்வது ரொம்பவும் கஷ்டம். அதுவும் வீட்ல தயாரிக்கறது சவாலானது.