நரம்பியல் நோய்களாக பக்கவாதம், காக்காய் வலிப்பு, மறதி என ஒரு நீண்ட பட்டியலையும் சுகாதார அமைப்பு வெளியிட்டிருக்கிறது. அதிலும் இந்த நோய்கள் அதிக வருமானமுள்ள நாடுகளைவிட இந்தியா போன்ற குறைந்த வருமானமுள்ள நாடுகளில்தான் பெரிய பாதிப்புகளை ஏற்படுத்துவதாகவும் வருத்தம் தெரிவித்திருக்கிறது. 

இதைக் குறைக்க அரசுகள் இந்த நோய்கள் தொடர்பாக ஆய்வுகள், அதனை ஒட்டி கொள்கைகள், நடைமுறைகளை விரைவாக பின்பற்றும்படி அறிக்கையில் ஆலோசனை சொல்லியிருந்தது. இப்படி செய்யாவிட்டால் பாதிப்பும் உயிரிழப்பும் மேலும் அதிகரிக்கலாம் என சிவப்பு புள்ளியை வைத்திருக்கிறது.

இந்நிலையில் நியூராலஜி எனப்படும் நரம்பியல் தொடர்பான இந்த அறிக்கை குறித்து சென்னை வேளச்சேரியில் இருக்கும் பிரசாந்த் மருத்துவமனையின் நரம்பியல் மருத்துவரான சுருதியிடம் பேசினோம். ‘‘நரம்பு, நரம்பியல் என்றாலே அது மூளை தொடர்பானது என்ற அடிப்படையை முதலில் நாம் புரிந்துகொள்ளவேண்டும். 

மூளையின் கீழ்ப் பகுதியில் கொத்தாக ஒரு உருண்டை வடிவத்தில் நரம்பு முடிச்சுகள் இருக்கும். இந்த நரம்பு முடிச்சின் ஒவ்வொரு நரம்பும் உடலின் பல பாகங்களுக்கு போகும். இவைதான் நாம் பேசவும், உறுப்புகளை அசைக்கவும், நாம் செயல்படுவதற்கான கட்டளைகளையும் கொடுக்கும். 

நம் உடலின் கண்ட்ரோல் ரூம்தான் மூளையும், அதிலிருந்து உருவாகும் நரம்புகளும். இந்த நரம்புகளில் ஏற்படும் பிரச்னைகளைத்தான் நரம்பு நோய்கள் அல்லது நரம்பியல் பிரச்னைகள் என்கிறோம்...’’ என்ற சுருதி, நரம்புகளுக்கும், நாளங்களுக்கும் உள்ள வித்தியாசத்தை விளக்கினார்.‘‘நாளங்கள் என்பது இதயத்துக்கும், இதயத்திலிருந்தும் இரத்தத்தை கொண்டுபோகும் குழாய்களைச் சொல்லலாம். 

இரத்தக் குழாய்கள் மூளைக்கும் செல்லும். இதயத்துக்குப் போகும். இரத்தக் குழாய்களில் அடைப்பு ஏற்பட்டால் இதயப் பிரச்சனை ஏற்படுவது மாதிரி, மூளைக்கு செல்லும் இரத்தக் குழாய்களில் அடைப்பு ஏற்பட்டால் மூளையில் இருந்து செல்லும் நரம்புகளுக்கு பிரச்சனை ஏற்படும். 

‘ஸ்ட்ரோக்’ எனப்படும் பக்கவாதம், இன்றைய தேதிக்கு ஒரு பொதுவான வியாதியாக உலகில் காணப்படுகிறது. 50 வயதுக்கு மேற்பட்டவர்களுக்கே இது அதிகமாக வருகிறது. என்றாலும் உடல்பருமன், கொலஸ்ட்ரால் மற்றும் பழக்கவழக்கங்களே வயதாகும்போது இந்த வியாதி நம்மைத் தொற்றிக்கொள்ள களம் அமைத்துத் தருகின்றன.

எபிலெப்சி என்கிற காக்காய் வலிப்பு சிறுவயதிலேயேகூட ஆரம்பித்துவிடலாம். ஒருவித நரம்பு பிரச்னைதான் இது. டிமென்சியா எனப்படும் ஞாபகமறதியைப் பொறுத்தளவில் வயதானவர்களுக்குத்தான் அதிகம் ஏற்படுகிறது. 

உதாரணமாக தொடர்ச்சியான ஒற்றைத் தலைவலி வாந்தி, கண்பார்வைக் குறைபாடுகளை எல்லாம் ஏற்படுத்தும். அல்சைமர் எனும் தீவிர மறதி உள்ளவர்கள் பழைய விஷயங்களை நினைவில் வைத்திருப்பார்கள். 

ஆனால், அன்றாட நிகழ்வுகள் அவர்களுக்குப் பிரச்னையாக இருக்கும். நீரழிவு எனப்படும் சர்க்கரை தொடர்பான பிரச்னைகள் ஏன் கால் நரம்புகளிலிருந்து ஆரம்பிக்கிறது என்றால் காலில்தான் சிறிய நரம்புகள் ஏராளமாக இருக்கின்றன. எனவே, நீரழிவால் முதலில் பாதிக்கப்படுவது காலின் சிறிய நரம்புகள்தான். 

கால்களில் உணர்வு இல்லாமல் போவதுதான் இந்த நோயின் முதல் அறிகுறி. சர்க்கரை நோயால் மற்ற நரம்புகளும் பாதிக்கப்படும்போது இந்த உணர்வு நரம்புகள்தான் முதலில் செயலிழக்கும்.