சின்னவயசில் எங்கள் பள்ளியில் சர்க்கரை ஆலை ஒன்றிற்கு எக்ஸ்கர்ஷன் அழைத்துச் சென்றார்கள். உள்ளே இருக்கும்போது எவ்வளவு சர்க்கரை வேண்டுமானாலும் அள்ளிச் சாப்பிட்டுக் கொள்ளலாம் என்றார்கள். சாப்பிட்டு அலுத்துப் போய் ஒரு கட்டத்தில் நிறுத்திவிட்டோம். 

அதுதான் நினைவுக்கு வந்தது. அமெரிக்காவிலுள்ள பாஸ்டனில் ஆப்பிள் தோப்பு / தோட்டம் / பண்ணைகளில் - சரியான வார்த்தை ஆர்க்கிட் -  ‘ஆப்பிள் பிக்கிங்’ அல்லது ‘ஆப்பிள் ஹார்வெஸ்டிங்’ என்று அறுவடைக்காலங்களில் ஒரு கோலாகலம் நடக்கிறது. கண்கொள்ளாக் காட்சி. மனம் கொள்ளா அனுபவம். 

அல்லது ‘சபரி’ மாதிரி சுவைத்துப் பார்த்துத் தேர்ந்தெடுத்து பத்திரப் படுத்திக் கொள்ளலாம். என்ன ஒன்று... ‘சபரி’ சேமித்தது அந்த உன்னத தெய்வத்துக்காக. நாம், நமக்கு வேண்டியவர்களுக்காக.

சின்னதாய் மெரூன் கலரில், பெரிசாய் ரூஜ் போட்ட மாதிரி, நடுவாந்தரமாய்ப் பளபள செர்ரி நிறத்தில், கிரீன் ஆப்பிள் என்று சகட்டு மேனிக்கு ஒவ்வொரு வரிசையிலும் பழுத்திருக்கின்றன.