உலகின் மிக உயரமான கோல்ஃப் மைதானங்களில் பொலிவியாவின் லா பாஸ் நகர மைதானமும் ஒன்று. ஆண்டிஸ் மலைத்தொடரில் கடல் மட்டத்தில் இருந்து 3 ஆயிரத்து 360 மீட்டர் உயரத்தில் இந்த கோல்ஃப் மைதானம் உள்ளது. 

அதாவது சுமார் 10 ஆயிரத்து 945 அடி உயரத்தில் அமைந்திருக்கிறது. இதில் பொலிவியாவின் பூர்வகுடியைச் சேர்ந்த சோலிடாஸ் சமூகப் பெண்கள் கோல்ஃப் விளையாடி வருவது சமீபத்தில் அத்தனை வைரலாகி இருக்கிறது.

பொலிவியாவில் அய்மாரா என்ற பூர்வகுடி சமூகத்திலுள்ள பெண்கள் சோலிடாஸ் என அழைக்கப்படுகின்றனர். சோலிடா என்பதே ஒருகாலத்தில் பெண்களைக் குறைத்து மதிப்பிடுவதற்குப் பயன்படுத்தப்பட்ட வார்த்தை எனச் சொல்லப்படுகிறது. 

அப்போது இந்த சோலிடா பழங்குடியினப் பெண்கள் பயங்கரமான சமூக, இனப் பாகுபாட்டை எதிர்கொண்டு வந்தனர். அவர்கள் பொது இடங்களுக்கு வர தடைசெய்யப்பட்டனர். பொதுப் போக்குவரத்தைப் பயன்படுத்தக் கூடாது எனவும், உணவகங்களுக்குள் நுழையக்கூடாது என்றும் பல தடைகளைச் சந்தித்தனர். இதனால இவர்களின் தொழில் வாய்ப்புகளும் மிகவும் குறைவாகவே இருந்தன. 

இதனால் கடந்த இருபது ஆண்டுகளில் சோலிடா பெண்கள் அரசியலிலும், தொலைக்காட்சியிலும், ஃபேஷன் துறையிலும், விளையாட்டுத் துறையிலும் கோலோச்சி வருகின்றனர். 

இந்த கோல்ஃப் ஊழியர்களில் அய்மாரா வம்சாவளியைச் சேர்ந்த பல சோலிடாஸ் பெண்கள் உள்ளனர். இவர்கள் திங்கட்கிழமை தோறும் கோல்ஃப் விளையாட அனுமதிக்கப்படுகின்றனர். அப்படியாக கோல்ஃப் விளையாட்டைக் கற்றுக்கொள்கின்றனர். 

இதற்கு சக ஊழியர்களும், வீரர்களுக்கு உதவியாளர்களாக இருக்கும் கேட்டிகளும், பயிற்றுவிப்பாளர்களும் வழிகாட்டுகின்றனர். அப்படியாக தொடர்ந்து அவர்கள் பயிற்சி செய்கின்றனர். ஆனால் இவர்கள் தேசிய, சர்வதேச போட்டிகளில் இன்னும் கலந்துகொள்ளவில்லை. உள்ளூர் போட்டிகளில் மட்டுமே பங்கேற்று வருகின்றனர்.