உலகின் பெரும் பணக்காரரான எலான் மஸ்க்கின் நிறுவனமான ‘டெஸ்லா’வின் எலெக்ட்ரிக் கார்களுக்குப் போட்டியாக இருக்கும் சீன நிறுவனம், ‘பிஒய்டி’. தோற்றத்தில் கூட இந்த இரண்டு நிறுவனங்களின் கார்களும் ஒரே மாதிரியாகத்தான் இருக்கும். 

மலிவான விலையில் எலெக்ட்ரிக் கார்களை உற்பத்தி செய்து, உலகமெங்கும் விநியோகிக்க வேண்டும் என்பது ‘பிஒய்டி’யின் முக்கிய நோக்கம். சமீபத்தில் ‘யாங்வாங் யூ9 எக்ஸ்ட்ரீம்’ என்ற மாடலை அறிமுகப்படுத்தியுள்ளது. இந்த எலெக்ட்ரிக் காரைப் பற்றித்தான் ஆட்டோமொபைல் உலகில் ஹாட் டாக்.

உலகிலேயே அதிவேகமாகச் செல்லக்கூடிய எலெக்ட்ரிக் கார் இதுதான். கடந்த வாரம் ஜெர்மனியில் உள்ள ஏடிபி டெஸ்டிங் டிராக்கில் இந்த காரின் வேகத்தை சோதனை செய்து பார்த்தனர். 

சர்வ சாதாரணமாக 480 கிலோமீட்டர் வேகத்தில் சீறிப் பாய்ந்த இந்த எலெக்ட்ரிக் கார், அதிகபட்சமாக மணிக்கு 496.22 கிலோ மீட்டர் வேகத்தில் பறந்திருக்கிறது.