நாம் அனைவரும் அறிந்ததுதான். பூமியின் சுழற்சியைப் பொறுத்தே ஒரு நாள் இருக்கும். இப்போது பூமி தன்னைத் தானே சுற்றிக்கொள்ள 24 மணி நேரமாகிறது என்பது நம் அனைவருக்கும் தெரியும். 

இதில்தான் இப்பொழுது மாற்றம் ஏற்பட்டிருக்கிறது.ஆம். இப்போது பூமியின் சுழற்சி மெல்ல வேகமாகி வருவதாகவும் இதனால் நாட்கள் குறைவானதாக மாறுவதாகவும் ஆய்வாளர்கள் தெரிவித்துள்ளனர்.

இதற்கேற்ப கடந்த ஜூலை 9ம் தேதி பூமி வேகமாகச் சுற்றியுள்ளது. 

இது மட்டுமின்றி வரும் ஜூலை 22 மற்றும் ஆகஸ்ட் 5 ஆகிய தேதிகளில் சந்திரனின் நிலை பூமியின் சுழற்சியைப் பாதிக்கும் என கணக்கிட்டுள்ளனர்.இதன் காரணமாக ஒவ்வொரு நாளும் வழக்கமான 24 மணி நேரத்தை விடக் குறைவாக இருக்குமாம்.

குறைவு என்றால் ரொம்ப குறையும் என நினைக்க வேண்டாம். வெறும் 1.3 முதல் 1.51 மில்லி விநாடிகள் வரை குறைவாக இருக்கும். இந்தளவுக்குத்தான் குறையும் என்பதால் நம்மில் பலரும் இதை உணர மாட்டோம்.பொதுவாக, பூமியில் ஒரு முழு நாள் என்பது 86,400 விநாடிகள் அல்லது 24 மணி நேரமாகும். 

ஆனால், பூமியின் சுழற்சி நிலையானது அல்ல. சந்திரன் மற்றும் சூரியனின் ஈர்ப்பு விசை, கிரகத்தின் காந்தப்புலம் மற்றும் இயற்கை அல்லது மனித நடவடிக்கைகளால் ஏற்படும் பூமியின் நிறையில் (mass) ஏற்படும் மாற்றங்கள் உள்ளிட்ட பல காரணங்களால் இது பாதிக்கப்படும்.

கடந்த காலத்தை நாம் எடுத்துப் பார்த்தோம் என்றால் பூமியின் சுழற்சி படிப்படியாகக் குறைந்து வருவது தெளிவாகத் தெரிகிறது. சுமார் 100 முதல் 200 கோடி ஆண்டுகளுக்கு முன்பு, ஒரு நாள் என்பது 19 மணிநேரம் மட்டுமே நீடித்தது. ஏனெனில் சந்திரன் பூமிக்கு மிக அருகில் இருந்ததால் அதன் ஈர்ப்பு விசை அதிகமாக இருந்தது. 

காலப்போக்கில், சந்திரன் தூரமாகச் செல்லச் செல்ல, நமது நாட்களின் நீளம் அதிகரித்தது.அதேநேரம் சில குறிப்பிட்ட காலத்தில் பூமியின் சுழற்சி அதிகரித்தும் இருக்கிறது. 1970களில் இருந்ததை விட 2020ம் ஆண்டில் பூமி வேகமாகச் சுழல்வதை விஞ்ஞானிகள் பதிவு செய்துள்ளனர். அந்த வகையில் மிகக் குறுகிய நாளாக ஜூலை 5, 2024 பதிவாகியுள்ளது. இது வழக்கத்தை விட 1.66 மில்லி விநாடிகள் குறைவானது.

குறிப்பிட்ட நாட்களில் சந்திரனின் தூரம் பூமியின் அச்சில் இருந்து மாறுபடுவதால், கிரகத்தின் சுழற்சி வேகமடைகிறது அல்லது மெதுவாகிறது. இது ஒரு பம்பரம் தனது அச்சை மாற்றும்போது வேகமாகச் சுழல்வது போன்றது. 

பனி உருகி நிலத்தடி நீர் நகர்வது உள்ளிட்ட காலநிலை மாற்றங்களும் கூட பூமியின் சுழற்சியில் மாற்றங்களை ஏற்படுத்துகின்றன. பூகம்பங்கள் மற்றும் பருவகால மாற்றங்கள் கூட சுழற்சியைப் பாதிக்கும்.குறிப்பாக 2011ம் ஆண்டு ஜப்பானில் பூகம்பம் ஏற்பட்டதல்லவா? அன்றைய தினம் வழக்கமான ஒரு நாளின் நீளத்தை விட 1.8 மைக்ரோ விநாடிகள் குறைத்திருந்தது.