வெளியீட்டு நாளன்று காலைக் காட்சி தொடங்கும் வரை அப்படத்துக்கான கேடிஎம் (Key Delivery Message) எனப்படும் ஒளிபரப்பு அனுமதி கிடைக்காமல் இருக்கும். 

இதனால் திரையரங்குக்காரர்கள் பதற்றத்துடனும் பரபரப்புடனும் விநியோகஸ்தர்களைத் தொடர்பு கொள்வார்கள். விநியோகஸ்தர்கள் தயாரிப்பாளரைத் தொடர்பு கொள்வார்கள். அவர்களோ அழைப்பை ஏற்கவியலா நிலையில் இருப்பார்கள்.

பொதுவாக ஒரு படம் வெளியாகும் முன்பு அப்படம் தயாரிப்பதற்காக வாங்கிய கடன்களை மொத்தமாகத் திருப்பிக் கொடுத்தாக வேண்டும், அப்படத்தில் நடித்த நடிகர்கள், நடிகைகள், பணியாற்றிய தொழில்நுட்பக் கலைஞர்கள் மற்றும் தொழிலாளர்கள் என அனைவருக்கும்  உரிய ஊதியத்தைக் கொடுத்திருக்க வேண்டும்.

வாங்கிய கடனைத் திருப்பித் தந்திருக்காவிட்டால் பணம் கொடுத்தவர் தன்னிடம் அடமானம் வைக்கப்பட்டிருக்கும் படத்தின் உரிமையைத் தரமாட்டார். தொழிலாளர்களுக்கு ஊதியம் தரவில்லையென அவர்கள் புகாரளித்தால் படத்தை வெளியிடும் இடத்தில் அதை நிறுத்திவைத்துவிடுவார்கள். இதுதான் பொதுவான நடைமுறை.

அதேபோல் முன்தொகையாகப் பெரிய பணம் கொடுத்து படங்களைத் திரையிடும் திரையரங்குக்காரர்கள், அத்தொகையை ஈடுகட்டும் அளவுக்கு வசூல் வரவில்லையெனில் கொடுத்த பணத்தைத் திரும்பக் கேட்பார்கள். 

அதைப் பேசியபடி திருப்பித் தராவிட்டால் குறிப்பிட்ட விநியோகஸ்தர் வெளியிடும் படத்தைத் திரையிட மாட்டோம் என்று தடைபோடுவார்கள். சில நேரங்களில் சம்பந்தப்பட்ட படத்தின் தயாரிப்பாளர், இயக்குநர் மற்றும் நடிகர் உட்பட யாராலும் எந்தச் சிக்கலும் இல்லாதபோதும் விநியோகஸ்தரால் இப்படி ஒரு சிக்கல் வந்துவிடும்.

சில செயற்கையான சிக்கல்களும் அவ்வப்போது உண்டாக்கப்படுவதுண்டு.படம் எடுக்கும்போதே இந்தப் படத்தின் செலவுக்கு ஏற்ற வியாபாரம் இருக்காது என்று தெரிந்தே எடுப்பார்கள். 

அப்படம் வெளியாகும் நேரத்தில் பணம் இல்லை என்கிற காரணத்தைச் சொல்லி நடிகர்களின் சம்பளத்தைத் திரும்பப் பெறுவது, கடன் கொடுத்தவர்களிடம் வட்டியை மொத்தமாகத் தள்ளுபடி செய்யக் கேட்பது, முடிந்தால் அசலிலும் குறைக்கச் சொல்லிக் கேட்பது என்பதெல்லாம் நடக்கும்.

இதுபோன்ற சிக்கல்கள் ஏற்படும் நேரங்களில் தயாரிப்பாளர்கள் சங்கம் தலையிட்டு சம்பந்தப்பட்ட படத்தின் சிக்கல்களைப் பட்டியலிட்டு அது தொடர்பானவர்களுடன் சமரசம் பேசி படம் வெளியாக உதவி செய்வார்கள்.சில படங்களில் அப்படத்தின் நாயகனே களமிறங்கி படத்தை வெளியிட முயற்சி எடுப்பார். 

தன் சம்பளத்தை விட்டுக்கொடுத்து அல்லது குறைத்துக்கொண்டு சம்பந்தப்பட்டவர்களிடம் பேசி அவர்களுக்குத் தேவை பணமோ அல்லது அவர் நடிப்பில் ஒரு படமோ தருவதாக ஒப்புக்கொண்டு படத்தை வெளியிடத் துணை புரிவார்கள். இப்படித்தான் பல படங்கள் வெளியாகின்றன. சில படங்கள் வெளியாக முடியாமல் முடங்கிக்கிடக்கின்றன. இந்த சிக்கல்கள் குறித்து இத்துறையைச் சார்ந்தவர்களின் பதில்கள்:

ஆனால், இங்கு ரிலீஸுக்கு முந்தைய இரவுதான் லாப, நட்ட கணக்குப் பார்த்து செட்டில்மென்ட் செய்யப்படும் முறை உள்ளது. அதில் சிக்கல் வரும்போது, அது பட வெளியீட்டைப் பாதிக்கிறது. ஸ்டூடியோ மாடல் சிஸ்டம் எப்போது வருகிறதோ அல்லது படத்துக்கான மொத்தப் பணத்தை ஏற்பாடு செய்தபிறகு படம் எப்போது தயாரிக்கப்படுகிறதோ, பேசப்பட்ட பட்ஜெட்டில் படம் எப்போது தயாரிக்கப்படுகிறதோ அல்லது பிளான் பண்ணிய பட்ஜெட்டுக்கு எப்போது வியாபாரம் அமைகிறதோ என எல்லாம் சேர்ந்து நடக்கும்போதுதான் ரிலீஸ் பிரச்சனையைத் தவிர்க்க முடியும்.

இது தமிழ் சினிமாவுக்கு மட்டுமல்ல, எல்லா இண்டஸ்டிரியிலும் நடக்கக் கூடியது. இந்த மாதிரி பிரச்சனைகள் எல்லா தயாரிப்பாளர்களுக்கும் நேரிடும். அதை தயாரிப்பாளர்கள் சமாளித்துதான் ஆகவேண்டும்.

ரிலீஸ் சமயத்தில் இரண்டு விஷயம் பார்க்கப்படும். ஒண்ணு பொருளாதாரப் பற்றாக்குறை. தயாரிப்பாளர் படம் வெளியாகும்போது யார், யாருக்கு செட்டில் பண்ணணும் என்ற கணக்கும், எந்தெந்த இடங்களில் இருந்து பணம் வர வேண்டும் என்ற கணக்கும் வைத்திருப்பார். 

தமிழ்நாடு தியேட்டரிக்கல், ஆந்திரா தியேட்டரிக்கல், கேரளா தியேட்டரிக்கல், இந்தி ரைட்ஸ், வெளிநாடு உரிமம், சேட்டிலைட் அண்ட் டிஜிட்டல் உரிமம், ஆடியோ உரிமம் போன்றவை ஒரு படத்துக்கான முக்கிய வியாபாரமாகப் பார்க்கப்படுகிறது.