‘‘பொதுவா சின்ன வயசுல எல்லோருக்குமே டாக்டராகணும், எஞ்சினியராகணும், கலெக்டராகணும்னுதான் ஆசையிருக்கும். ஆனா, எனக்கு சமையலில் பெயர் சொல்லக்கூடிய இடத்துக்குப் போகணும்னு லட்சியமாகவே இருந்தது. இன்னைக்கு அந்த இடத்தை ஓரளவுக்கு அடைஞ்சிருக்கேன்னு நினைக்கிறேன்...’’ அத்தனை உற்சாகமாகப் பேசுகிறார் கணேசன்.

சில ஆண்டுகளுக்கு முன்புவரை இந்தியாவின் புகழ்பெற்ற பிரபல நட்சத்திர ஹோட்டலில் செஃப்பாக பணியாற்றியவர் இவர். இன்று எல்லோருக்கும் தன்னுடைய கைபக்குவத்தைக் கொண்டு சேர்க்கும் வகையில் கிராமத்து செட்அப்பில் கூரைகள் வேயப்பட்ட ஹோட்டலை நடத்தி வருகிறார். 

இந்த ஹோட்டலின் சிறப்பு என்னவென்றால் ரசாயனம் கலக்காத, பாரம்பரியமான முறையில், இயற்கையில் விளைவிக்கப்பட்ட பொருட்களைக் கொண்டு தரமான உணவுகளை வழங்கி வருவதுதான். இதனாலேயே பலரும் இவரின் ஹோட்டலைத் தேடி வந்து சாப்பிடுகின்றனர்.

இன்னைக்கு சென்னையில் பெயர் சொல்லக்கூடிய உணவகங்களில் என்னோட ஹோட்டலும் இருக்குனு நினைக்கிறப்ப மனசுக்கு ரொம்ப நிறைவா இருக்கு...’’ என ஆத்மார்த்தமாகச் சொல்கிற கணேசன் தொடர்ந்து பேசினார். 

‘‘பள்ளிப் படிப்பு முடிச்சதும் பட்டப்படிப்பாக கேட்டரிங்கைதான் தேர்வு செய்தேன். ஒரு தனியார் கல்லூரியில் கேட்டரிங் அண்ட் ஹோட்டல் மேனேஜ்மென்ட் படிப்பை மூணு வருஷம் படிச்சேன். அங்க படிச்சிட்டு இருக்கும்போதே கேம்பஸ் இன்டர்வியூ மூலம் ஜெய்ப் பூர்ல இருக்கிற தாஜ் ஸ்டார் ஹோட்டலில் வேலை கிடைச்சது.

இங்க வந்ததும் நமக்கு எந்த வகை சமையலில் ஆர்வம் அதிகம் இருக்கோ, அதை தேர்ந்தெடுத்துக்கலாம். அதாவது சைனீஸ், ஜப்பனீஸ், கான்டினென்டல், இத்தாலியன்னு பல வகையான உணவு வகைகள் இருக்கும். இதில் எந்த மாதிரியான உணவு சமைப்பதில் நமக்கு விருப்பமோ அதைத் தேர்வு செய்யலாம். அப்ப நான் செட்டிநாடு உணவு வகையைத் தேர்ந்தெடுத்தேன்.

கொரோனா காலம் என்பதால் எங்கும் வேலைக்குச் செல்ல முடியல. பிறகு, அம்பத்தூரில் உள்ள ஹோட்டல் மேனேஜ்மென்ட் கல்லூரியில் பேராசிரியராக வேலை கிடைச்சது. அங்க மூன்று ஆண்டுகள் வேலை செய்தேன்.

அங்குதான் எனக்கு வெவ்வேறான அனுபவங்கள் கிடைச்சது. நிறைய நண்பர்களும் கிடைச்சாங்க. அவங்க மூலம்தான் இயற்கை விவசாயம், பாரம்பரிய உணவுகள் பத்தியெல்லாம் தெரிய வந்தது...’’ என்கிறவர், இங்கிருந்துதான் கூரைக்கடைக்கான திட்டத்தை வகுத்திருக்கிறார்.

‘‘இந்த நண்பர்களுடன் சேர்ந்து தற்சார்பு வாழ்க்கையைக் கடைப்பிடிச்சேன். இயற்கை முறையில் விளைஞ்ச உணவுகளைச் சாப்பிட ஆரம்பிச்சேன். இப்ப நானும் என் குடும்பமும் எந்த பூச்சி மருந்துகளும் கலக்காத உணவுப்பொருட்களைக் கொண்டு தயாரிக்கப்படும் உணவுகளையே கடந்த ஆறு வருடங்களாக சாப்பிட்டு வர்றோம். 

இயற்கை முறையில் செய்யப்படும் உணவில் இருக்கிற சுவையும் தரமும் மருத்துவ குணமும் பயனுள்ளதாக இருந்ததை நேரடியாகவே உணர்ந்தேன். இதை அப்படியே மக்களிடம் கொண்டு சேர்க்கணும்னு ஆசைப்பட்டேன்.

அதாவது ஒரு கிராமத்து வீட்டில் அமர்ந்து சத்தான உணவை மக்கள் ருசிக்கணும்னு நினைச்சேன். அதனாலே, இந்த உணவகம் எங்கள் பகுதியில் பலருக்கும் விருப்பமான உணவகமாக மாறியிருக்கு...’’ என்கிறவர், மெஸ் உணவுகளை பட்டியலிட்டார். 

‘‘இப்ப எங்க உணவகத்தில வெஜ் மற்றும் நான்வெஜ் மீல்ஸ் இரண்டுமே 110 ரூபாய்க்கு கொடுக்குறோம். நான்வெஜ் மீல்ஸ்ஸில் நல்லெண்ணெய் மீன் குழம்பும், கடலை எண்ணெய் மட்டன் குழம்பும் வரும். அதுபோக சாம்பார், வத்தக்குழம்பு, ரசம், கூட்டு, பொரியல், மோர் என அனைத்துமே தர்றோம்.

இதனுடன் சைடு டிஷ்க்கு மட்டன், சிக்கன், கடல் உணவுகள்னு எல்லாமே இருக்கு. எங்க கடையின் ஃபேமஸ் என்றால் அது மட்டன் நெய் சுக்காதான். இதுதவிர மட்டன் ஈரல் கொடுக்குறோம். சிக்கனிலும் சிக்கன் சுக்கா தர்றோம். அடுத்து கடம்பா ஃப்ரை, இறால் கிரேவி, ஃபிஷ் ஃப்ரைனு கடல் உணவுகளும் இருக்குது. இவை அனைத்துமே செக்கு எண்ணெயில்தான் தயாரிக்கிறோம்.

இறாலைப் பொறுத்தவரை வளர்ப்பு இறாலில் எனக்கு விருப்பம் கிடையாது. அதனால் கடல் இறால் வாங்குறோம். இதனை ஒரு நண்பரின் உதவியால் ராமேஸ்வரத்தில இருந்து டிராவல்ஸ் மூலம் கொண்டு வர்றோம். இப்படி சமையலுக்கு தேவையான ஒவ்வொன்றையும் தரமான இடத்தில் இருந்து வரவழைப்பது எங்கள் ஸ்பெஷல்னு சொல்லலாம்.

அப்புறம், இங்க இருக்கிற அனைத்து ரெசிபியுமே நான்தான் சமைக்கிறேன். நான் ஹோட்டல் மேனேஜ்மென்ட் காலேஜ்ல பேராசிரியராக இருக்கும்போது என் டீச்சிங் பிடிச்சுப்போன மூன்று மாணவர்கள் எனக்கு உதவியாக என்னுடன் வேலை செய்றாங்க. 

இவர்களுடன் பெண்களுக்கு வேலை கொடுக்கும் நோக்கில் 8 பெண்களையும் வேலைக்கு அமர்த்தியிருக்கேன்...’’ என்கிற கணேசன், ‘‘உண்மையில் உணவுல தரமும் ஆரோக்கியமும் கொடுத்தால் யார் வேணாலும் உணவகம் நடத்தலாம். என்னைப் பொறுத்தவரை சமையல் தொழிலுக்கு நான் எப்பவும் உண்மையாக இருப்பேன். ஏன்னா, சமையலைத் தவிர எனக்கு வேறெதுவும் தெரியாது...’’ என முத்தாய்ப்பாக சொல்கிறார் கணேசன்.