அப்படிப்பட்ட ஓர் உலகளவிலான தேர்தலில்தான் முன்னாள் அமெரிக்க அதிபர் டொனால்ட் டிரம்ப் இரண்டாம் முறையும் வெற்றி பெற்று வெள்ளை மாளிகையில் கடந்தவாரம் அதிபராக ஜம்மென்று அமர்ந்தார். 

டிரம்ப் அதிபரானதும் இஸ்ரேல் - பாலஸ்தீனப் போர் நிறுத்தம் போன்ற சில பாசிட்டிவான நிகழ்வுகள் அரங்கேறினாலும் அமெரிக்காவிற்கு வேலை நிமித்தம் செல்லும் வெளிநாட்டினர் குறித்து அவர் கடந்த ஆண்டிலேயே கண்டிப்பு  காட்டியது இந்தப் பிரிவினரை கலக்கத்தில் ஆழ்த்தியுள்ளது.

ஏனெனில் அமெரிக்காவில் வாழும் இந்தப் பிரிவினரில் 80 சதவீதம் பேர் இந்தியர்கள் என்பதால்தான். அதாவது வேலைக்காக எச் 1 பி விசா பெற்று அமெரிக்காவை சுவைக்கும் இந்த முதலிடம் வகிக்கும் இந்திய பிரஜைகளின் அமெரிக்கக் கனவில் அமெரிக்கா மண்ணைத் தூவுமா அல்லது அமெரிக்கக் கனவை நிறைவேற்றுமா என்பது ட்ரில்லியன் டாலர்  கேள்வி.

கடந்த 34 வருடங்களாக இந்த எச் 1 பி  விசா அமெரிக்காவில் நடைமுறையில் இருக்கிறது. 2023ம் ஆண்டு கணக்குப்படி இந்த விசாவில் அமெரிக்காவில் வேலை பார்க்கும் மொத்த வெளிநாட்டினரின் எண்ணிக்கை 2,65,777. இதில் இந்தியத் தொழிலாளர் மட்டும் 2,06,591. இது மொத்த எண்ணிக்கையில் 78 சதவீதம். 

இந்தியர்கள்தான் இந்த விஷயத்தில் கொடி நாட்டுகிறார்கள் என்பது இதிலிருந்து தெரிகிறது. அதற்கு அடுத்துதான் சீனா. சீனர்களின் எண்ணிக்கை 23,482. அதாவது மொத்த தொழிலாளர்களில் வெறும் 9 சதவீதம்.

பதிலாக இந்த கம்பெனிகள் அமெரிக்கப் பிரஜைகளை வேலைக்கு அமர்த்தும் போக்குகள் அண்மைக் காலமாக வேகமாக நடைபெற்றுக் கொண்டிருக்கிறது. காரணம் அமெரிக்காவிலேயே வெளிநாட்டு வேலையாட்கள் பற்றிய எதிர்மறையான கருத்துக்கள் நிலவுவது. 

‘திறமையான அமெரிக்கப் பிரஜைகள் ஐடி துறையில் வேலை செய்யக் காத்திருக்கையில் குறைந்த சம்பளத்துக்காக வெளிநாட்டினரை இந்த ஐடி நிறுவனங்கள் பணியில் அமர்த்துகின்றன’ என்ற குற்றச்சாட்டும் அமெரிக்கர்களிடையே பிரபலம்.

வெளிநாட்டு நிறுவனங்களும் கொஞ்ச காலத்துக்கு ‘சட்டியில் இருந்தால்தானே அகப்பையில் வரும்’ என்று இதற்கு செவிசாய்க்காமல் இருந்தார்கள். ஆனால், தொடர்ச்சியான அமெரிக்க கருத்தியல் அழுத்தம் இந்த நிறுவனங்களை அடிபணியவைத்தது. சரி. இனி இந்த எச் 1 பி விசா வளர்ந்த கதையைப் பார்ப்போம்.

அமெரிக்காவின் பக்கத்து நாடு, மெக்சிகோ. இதனால் மெக்சிகோ நாட்டினர் பலகாலமாகவே அமெரிக்க மண்ணில் ஊடுருவியபடி இருக்கின்றனர். இதனால் அமெரிக்கா குட்டிச்சுவராக மாறுவதாக ஒரு கருத்து - குற்றச்சாட்டு - அந்நாட்டில் நிலவி வருகிறது. இன்றும் அதே நிலைதான்.

இந்நிலையில் 1942 முதல் 64 வரை சுமார் 40 லட்சம் மெக்சிகோ நாட்டினரை விவசாயத்தில் பயன்படுத்திக்கொள்ள அமெரிக்கா ஒரு சமரச முடிவுக்கு வந்தது. இதற்கான சட்டமும் 1952ல் இயற்றப்பட்டது. 

இந்த விவசாய விசாவை எச் 2 (H 2) என்றழைத்தனர். அதே ஆண்டு நற்பேறு (மெரிட்), திறன் (எபிலிட்டி) அடிப்படையில் விளையாட்டு, கலை, அறிவியலில் சிறந்த வெளிநாட்டினர் அமெரிக்காவுக்கு வரலாம் என்றும் சட்டம் போட்டனர். இந்த விசாவுக்குப் பெயர் எச் 1 (H 1). ஆனால், 1969 வரை ஒரு அறிவாளிகூட அமெரிக்காவில் கால் வைக்கவில்லை என்கிறார்கள்.

1970ல் 3 வருடத்துக்கு அமெரிக்காவில் தங்கிக்கொள்வதற்கான விசா வழங்கப்பட்டது. ஆனால், இதற்கு நீங்கள் ஒரு பேச்சுலர் டிகிரியாவது படித்திருக்கவேண்டும். இருந்தாலும் மெரிட் அடிப்படையில்தான் விசா வழங்கப்பட்டது. இந்த நேரத்தில், அதாவது 1990 வாக்கில் அமெரிக்காவில் வளர்ந்துவந்த தொழில் நிறுவனங்கள் மெரிட்டை எல்லாம் வைத்து தொழிலை சாதிக்கமுடியாது என்பதற்காக அதை தளர்த்தவேண்டும் என்று அழுத்தம் கொடுத்தன. 

இதனைத் தொடர்ந்து 2023ம் ஆண்டு அமெரிக்கா இன்றைய விசா வடிவமான எச் 1 பி விசாவை அறிமுகப்படுத்தி பேச்சுலர் தகுதி, மெரிட் எல்லாவற்றையும் தூக்கிவிட்டு ‘சிறப்புத் தொழில்’ (Specialist Occupation) என்ற தகுதியை உருவாக்கியது. இது பெரிய பலனைக் கொடுத்தது.

உதாரணமாக பேச்சுலர் டிகிரி இல்லாமலேயே 1/3 ல் பங்கினர் அமெரிக்காவில் வேலைக்காக வெளிநாடுகளில் இருந்து வந்தனர். தொழிலை நசியவிடக்கூடாது என்பதற்காக இந்த விசாவில் வருபவர்கள் 6 வருடம் அமெரிக்காவில் இருக்கலாம் என்றும் இந்த ஆண்டில் சட்டம் கொண்டுவந்தனர். 

ஆனால் 90களிலேயே வெளிநாட்டு வேலையாட்கள் பற்றி அமெரிக்க வெள்ளை இனத்தினரிடையே ஒரு காழ்ப்புணர்ச்சி ஏற்பட்டது. இதை ஒட்டி 90களில் வருடத்துக்கு 65 ஆயிரம் விசாதான் கொடுக்கப்படவேண்டும், அதுவும் நல்ல சம்பளமாக உள்ள வேலைகளுக்காக மட்டுமே விசா என்ற கூடுதல் சட்டமும் அமல்படுத்தப்பட்டது.

ஒருகாலத்தில் 6 வருடம் அமெரிக்காவில் வேலை செய்தால் அங்கேயே நிரந்தரமாகக் குடியேறுவதற்கான கிரீன் கார்ட் முறை எல்லாம் இருந்தது. ஆனால், இப்போதைக்கு இந்த விசாவில் 3 வருடம்தான் அமெரிக்காவில் வேலை செய்யமுடியும் என்ற நிலை. 

காரணம், கிரீன் கார்ட் முறையை ஒழிப்பதற்காக இந்த 3 ஆண்டு முறையைக் கொண்டு வந்திருப்பதாக நிபுணர்கள் குற்றம் சாட்டுகிறார்கள். இச்சூழலில்தான் இப்படியொரு தடாலடி. பார்ப்போம், டிரம்ப் பம்முவாரா அல்லது பாய்வாரா என்று.

இதில் Undocumented ஆசாமிகளை விட்டுவிடுவோம். அது புரிந்துகொள்ளக்கூடியது. Documented ஆக, குறிப்பாக ஐடி போன்ற துறைகளில் வேலை விசாக்களில் வேலை பார்க்கும் லட்சோபலட்சம் இந்தியர்களுக்கு பெரிய அடி இது. 

ஏற்கனவே இந்தியர்களுக்கான Priority date ஒவ்வொரு கிரீன்கார்ட் கேட்டகரியிலும் பத்திருபது வருடங்கள் என தள்ளிப்போய்க்கொண்டே இருக்கிறது. கிரீன்கார்டுக்காக காத்திருக்கும் மக்கள், பல்லைக் கடித்துக்கொண்டு இருப்பது தம் குழந்தைகளுக்காவது அமெரிக்க குடியுரிமையும், வாழ்வும் அமையட்டும் என்றுதான்.

இந்த சட்டச்சிக்கலுக்கு (legal battle) முடிவு தெரியும் வரை பிறக்கப்போகும் குழந்தை அமெரிக்கன் இல்லை என்றால், தற்போது டெலிவரிக்கு காத்திருக்கும் பல இந்தியர்கள் பெட்டியைக் கட்டிவிடுவார்கள். ‘போங்கடா, உங்களோட மாரடிக்கறதுக்கு இந்தியாலேயே நல்ல உதவியோட பெத்துக்கறோம்’ என கிளம்ப வாய்ப்புண்டு.