‘‘ஒரு புயல் முழுமையாக கரையைக் கடந்தபின்பும் கூட தென்மேற்கு மற்றும் வடகிழக்குப் பருவங்களில் பெய்யும் மழை அதற்குக் கூடுதல் ஈரப்பதத்தையும் ஆற்றலையும் வழங்கலாம் என்பதை பெஞ்சல் புயல் நமக்கு உணர்த்தியிருக்கிறது. 

இதனாலே, பெஞ்சல் புயல் கரையைக் கடந்த பின்னும் மழை அதிகம் பெய்தது...” என மும்பை ஐஐடி பேராசிரியர் ரகு முர்துகுடே தெரிவித்துள்ள கருத்து பல உண்மைகளை வெளிச்சத்துக்கு கொண்டு வந்துள்ளது.இது தொடர்பாக பேராசிரியர் ரகு முர்துகுடே எழுதியுள்ள ஆங்கிலக் கட்டுரையில் விளக்கமாகத் தெரிவித்துள்ளார்.

2023ல் எல்-நினோ வரும் என்ற கணிப்பை விரைவாகவே வெற்றிகரமாக முன்வைத்துவிட்டார்கள் என்பதால், 2024ல் தீவிரமான லா-நினா இருக்கும் என்ற கணிப்பும் வெற்றிகரமாக இருக்கும் என்ற எதிர்பார்ப்பு வானிலை ஆய்வாளர்களிடையே  நிலவியது. ஆனால், அது தவறாகிப் போனது. 

வெப்பமண்டல கிழக்கு பசிபிக் கடலின் மேற்பரப்பு வெப்பநிலைகள் விநோதமானவையாக மாறின. பூமத்திய ரேகைக்கு அருகில் எதிர்பார்த்த அளவு வெப்பநிலை குறையவில்லை. அந்தப் பட்டைக்கு வடக்கே கொஞ்சம் வெப்பநிலை அதிகரிக்கவும் செய்தது. இது ஒரு குழப்பமான சூழல்.

வடக்கு இந்தியப் பெருங்கடலில் நிலவிய பருவமழை சுழற்சியையும் குழப்பமானது என்று சொல்லலாம். வடகிழக்குப் பருவமழை மட்டுமல்லாது பெஞ்சல் புயலால் ஏற்பட்ட மழையையும் சென்னை எதிர்கொண்டது. 

ஆனால், வடகிழக்குப் பருவமழையைப் பொறுத்தவரை இந்தியாவின் பிற பகுதிகள், குறிப்பாக தீபகற்பப் பகுதியில் வழக்கத்தைவிட குறைவான மழையே இருந்தது.இந்தியப் பெருங்கடல் இருமுனை (Indian Ocean Dipole) உருவாகும் என்ற கணிப்பும் இருந்தது, அதுவும் வரவில்லை.

இன்னொரு வாரம் மெதுவாக நகர்ந்தபிறகுதான் இந்திய வானிலை ஆய்வு மையம் அதை ஒரு புயலாக அறிவித்து பெயர் கொடுத்தது.தென்மேற்குப் பருவமழை முடிந்த காலகட்டத்திலிருந்தே வடக்கு இந்தியப் பெருங்கடலில் வெப்பம் நிலவியது. ஒரு லா - நினா காலகட்டத்தின்போது இந்த வெப்பநிலை மேலும் பல புயல்களை உருவாக்கியிருக்கவேண்டும். 

ஆனால், அது நடக்கவில்லை.பெஞ்சலாக உருவான புயல் கிழக்கு நோக்கி நகர்ந்து வடக்கில் திடீரென்று திரும்பி மீண்டும் தள்ளாடியபடியே மேற்கு நோக்கி வந்தது. பின்னணியில் வடகிழக்கு காற்று மற்றும் மேற்கு நோக்கிய காற்று ஆகியவை வீசிக்கொண்டிருந்ததே இதற்குக் காரணம்.

வங்காள விரிகுடாவில் நிலவிய வெப்பம் பெஞ்சலை மெதுவாக நகர அனுமதித்தது. கரையைக் கடந்தபின்பு  நனைந்த கடற்கரை மணலில் இருந்து ஆற்றல் கிடைத்தது. ஆகவே விரைவில் வலுவிழக்காமல் அது புயலாகவே தொடர்ந்தது.இந்த முந்தைய மழைப்பொழிவுதான் பெஞ்சலை வழக்கத்தைவிட அதிகமான காலம் வாழவைத்தது, அரபிக்கடலுக்குச் செல்லும்வரைகூட இது உதவியது.

உலகின் பிற பகுதிகளிலும் விநோதத்தன்மை நிலவின. அமெரிக்காவின் புயல் கணிப்புகளைப் பொறுத்தவரை 2024ம் ஆண்டு விநோதமானதாக இருந்தது. வடக்கு அட்லாண்டிக் கடலில் வரலாறு காணாத புயற்காலம் இருக்கும் என்று கணிக்கப்பட்டது. ஆனால், அந்தப் பகுதியின் கோடைகாலம் முழுக்க மந்தநிலையே நிலவியது. தாமதமாகவே புயல்கள் வரத் தொடங்கின.

லா- நினாவின்போது அந்தப் பகுதியின் புயல்கள் தீவிரமானவையாக இருக்கும் என்று வல்லுநர்கள் கணித்தனர். ஆனால், வெப்பமண்டல பசிபிக் கடலில் சொல்லிக்கொள்ளும் அளவுக்கு வெப்பநிலை குறையவில்லை. ஆகவே புயற்காலம் குழப்பமானதாக இருந்தது. எதிர்பார்த்ததைவிட காலம் தாழ்த்தியபிறகே உலகளாவிய புயல்களின் எண்ணிக்கை அதிகரித்தது.

புவி வெப்பமயமாதல், பகடையை உருட்டுகிறது. இந்த விளையாட்டில் காலநிலை வல்லுநர்களால் முன்னேற முடியவில்லை. 

பகடையில் எந்த எண் விழுவதற்கான சாத்தியம் இருக்கிறது என்பதையே உறுதியாக கணிக்க முடியவில்லை. 2024ம் ஆண்டில் லா - நினா வரவில்லை என்பதால் எல்லாம் இயல்புநிலைக்கு வந்துவிடும் என்றும் சொல்ல முடியாது. நமது கணிப்புகளைப் புரட்டிப்போடும் அளவுக்கு எதிர்பாராத ஓர் அம்சம் எங்கோ உருவாகியிருக்கிறது. என்பது தெளிவாகத் தெரிகிறது.

2024ல் பருவமழை காலங்களுக்கு இடையில் நிலத்திலிருந்து வந்த காற்றழுத்தத் தாழ்வு மண்டலமானது அரபிக்கடலில் அஸ்னா புயலாக மாறியது. புயல் பற்றிய கணிப்புகள் மிகவும் சவாலானவையாக மாறிவிட்டன என்பதையே இது காட்டுகிறது.நிச்சயமற்ற தன்மைகள் இவ்வளவு இருக்கின்றன என்பதை நாம் மனதில் வைத்துக்கொள்ளவேண்டும். 

உலகளாவிய வெப்பமாதல் மற்றும் சில பகுதிகளில் ஏற்படும் வெப்பமாதல் நிகழ்வுகளை கவனிக்கவேண்டும். இயற்கையான காலநிலை அம்சங்களோடு அவை எப்படி இயங்குகின்றன என்பதையும் கவனிக்கவேண்டும்.  இதிலிருந்து இன்னும் நம்பகத்தன்மை கொண்ட கணிப்புகளை இந்தியாவுக்காக உருவாக்க முடியும்...” என்று பேராசிரியர் ரகு முர்துகுடே தெரிவித்துள்ளார்.