திரைப்படங்களின் வெற்றிக்குப் பத்திரிகைகளே காரணம் என்று பாராட்டிய காலம் போய், இப்போது திரைப்படங்கள் வெளியாகி முதல் மூன்று நாட்கள் விமர்சனம் செய்யத் தடை விதிக்க வேண்டுமென நீதிமன்றம் போயிருக்கிறது திரைப்படத் தயாரிப்பாளர்கள் சங்கம்.

இதற்கு, ஜூலை 12, 2024 அன்று வெளியான ‘இந்தியன்-2’ மற்றும் நவம்பர் 14, 2024 அன்று வெளியான ‘கங்குவா’ ஆகிய படங்களுக்கு வெளியான கடும் எதிர்மறை விமர்சனங்களே காரணம் என்றும், குறிப்பாக யூடியூப் விமர்சகர்கள் திரைப்படத்தைத் தாண்டி கதாநாயகன் மற்றும் இயக்குநர் உள்ளிட்டோர் மீது தனிமனிதத் தாக்குதல்கள் நடத்துவதுடன் அவர்கள் மீதான வன்மத்தை திரைப்பட விமர்சனம் என்ற பெயரில் வெளிப்படுத்துகிறார்கள் என்பதுமே காரணம் என்று தயாரிப்பாளர்கள் தரப்பில் சொல்லப்படுகிறது.

இவ்விரு படங்களிலும் கதாநாயகர்களாக நடித்த கமல்ஹாசன் மற்றும் சூர்யா ஆகியோர் மீது பாஜகவைச் சேர்ந்தோர் திட்டமிட்டே அவதூறு பரப்பினர் என்பதும், அதுவும் அந்தப் படங்கள் வெளியாவதற்கு முன்பே அவற்றுக்கு எதிரான வன்மங்களை வெளிப்படுத்தினர் என்பதும் அவர்கள் வெளிப்படையாகச் சொல்லாமல் தங்களுக்குள் பேசிக் கொள்ளும் கருத்து.

இதனால், திரையரங்கு உரிமையாளர்கள் சங்கத் தலைவர் திருப்பூர் சுப்பிரமணியன், இதற்கு எதிர்ப்புக் குரல் கொடுத்தார். திரையரங்குகளில் மக்கள் கருத்து கேட்கும் யூடியூபர்களை அனுமதிக்கக்கூடாது என்றதோடு, கேரளா போல் தமிழ்நாட்டிலும் திரைப்படத் தயாரிப்பாளர்கள் நீதிமன்றத்தை அணுகி இதற்கு முடிவு கட்ட வேண்டும் என்றும் கேட்டுக் கொண்டார்.

ஒரு திரைப்படத்தை மூன்று மணி நேரம் பொழுதுபோக்கு அம்சமாக மட்டுமே பார்க்காமல், அது ஏதோ மொத்த சமுதாயத்திற்கும் அநீதி விளைவித்துவிட்டதைப் போல பலர் பேசி வருவது அநீதியான செயல் என்று கருதுகிறோம். 

விமர்சகர்களுக்கு திரைப்படங்களை விமர்சனம் செய்ய அனைத்து உரிமையும் உள்ளது. ஆனால், தனிப்பட்ட காழ்ப்புணர்ச்சியின் காரணமாக ஒரு திரைப்படத்தைப்பற்றிய வெறுப்பை ஊடகங்களில் விதைக்கக் கூடாது என்பதை அனைத்து ஊடகவியலாளர்களும் மனதில் வைத்து திரைப்பட விமர்சனங்கள் செய்ய வேண்டும் என்று கேட்டுக் கொள்கிறோம்.  

ஹோட்டல் மட்டுமில்லை, எந்த பொருளை வாங்கும் அல்லது உபயோகிக்கும் இடத்தில், அது பிடிக்காத பட்சத்தில், அதை நாகரிகமாக எடுத்துச் சொல்லி அதற்கான தீர்வைக் காண்பார்களே தவிர, ஊடகங்களில் அது பற்றி மோசமாகப் பேசி, அந்த ஹோட்டலையோ, விற்பனை அங்காடியையோ, சர்வீஸ் சென்டரையோ- எவரும் வசைபாடி, பேசி நாம் பார்த்ததில்லை.

அவ்வாறு அவர்கள் பேசுவது எத்தகைய பாதிப்பை அத்திரைப்படத்திற்கு ஏற்படுத்தும் என்பதை நன்கு உணர்ந்தும் பல யூடியூப் சேனல்கள் அவற்றை ஊக்குவித்து வருகின்றன. எந்தவித எடிட்டிங்கும் செய்யாமல் அத்தகைய கருத்துக்களை உடனுக்குடன் வெளியிட்டு பிரபலப்படுத்துகின்றன.

சினிமா துறையை ஒட்டுமொத்தமாக அழிக்கும் இந்த செயல்களை உடனே தடுத்து நிறுத்த வேண்டிய கட்டாயம் திரைத்துறையைச் சார்ந்த அனைவருக்கும் உள்ளது. தமிழ்நாடு திரையரங்கு உரிமையாளர்கள் சங்கத் தலைவர் திருப்பூர் சுப்ரமணியம் அவர்கள் அறிவித்தது போல, திரையரங்கு வளாகம் மட்டுமில்ல, அதற்கு அருகிலும், எந்த யூடிப் சேனல்-களும் பார்வையாளர்கள், ரசிகர்களிடம் இனிமேல் புதிய திரைப்படங்களைப் பற்றி பேட்டி எடுக்க தமிழ்நாட்டில் உள்ள அனைத்து திரையரங்க உரிமையாளர்களும் அனுமதிக்கக் கூடாது.

Public Review/Public Talk என்கிற பெயரில் பார்வையாளர்களை திரைப்படங்கள் மீதும் அதில் சம்பந்தப்பட்டவர்கள் மீதும் வன்மத்தைக் கக்கும் மனிதர்களாக மாற்றும் இந்தப் போக்கை உடனே தடை செய்யுமாறு அனைத்து திரையரங்க உரிமையாளர்களையும் வேண்டி கேட்டுக்கொள்கிறோம். 

மேற்கொண்டு, திரைப்படங்களை தார்மீக முறையில் விமர்சிக்காமல், தனிமனித தாக்குதல்கள், வன்மத்தை கக்குதல் போன்ற செயல்களை ஊடகங்கள் மூலம் செய்யும் நபர்கள்/ரசிகர்கள் மீது சட்ட ரீதியாக கடுமையான நடவடிக்கை எடுக்க நமது சங்கம் அனைத்து முயற்சிகளையும் எடுக்கவிருக்கிறது என்பதையும் இந்த நேரத்தில் பதிவு செய்ய விரும்புகிறோம்.

அதன் முதல் முயற்சியாக, அனைத்து திரையரங்கு உரிமையாளர்களும் ரசிகர்களின் பேட்டியை தங்கள் வளாகங்கள் மற்றும் வளாகத்தின் அருகில் எந்த யூடியூப் சேனல்களும் எடுக்க தடை செய்து, இந்த FDFS Public Review/Talk நடைமுறையை ஒட்டு மொத்தமாக  வெளியேற்ற ஒத்துழைப்பு தர வேண்டுகிறோம்...’ என்று அந்த அறிக்கையில் சொல்லப்பட்டிருந்தது. 

அறிக்கையோடு நில்லாமல் அச்சங்கம் சார்பில், புதிதாக வெளியாகும் தமிழ்ப் படங்களை முதல் மூன்று நாட்களுக்கு விமர்சனம் என்ற பெயரில் அவதூறு பரப்ப தடை விதிக்கக்கோரி சென்னை உயர்நீதிமன்றத்தில் மனு தாக்கல் செய்யப்பட்டது.

அதில், ‘சமீபகாலமாக புதிதாக வெளியாகும் திரைப்படங்களை யூ-டியூப் உள்ளிட்ட சமூக வலைதளங்களில் விமர்சனம் என்ற பெயரில் திட்டமிட்டு அவதூறு பரப்புவது அதிகரித்து வருகிறது.

அதைத் தொடர்ந்து, விமர்சனம் என்ற பெயரில் அவதூறு பரப்பினால் அதுதொடர்பாக சம்பந்தப்பட்டவர்கள் மீது போலீஸில் புகார் அளிக்கலாம். அதே நேரம் பொதுவெளியில் விமர்சிப்பது என்பது தனிமனித கருத்துச் சுதந்திரம் என்பதால் பொத்தாம் பொதுவாக எந்த உத்தரவும் பிறப்பிக்க முடியாது. 

சில படங்களுக்கு நேர்மறையான, ஆக்கபூர்வமான விமர்சனங்களும் வருகின்றன. எனவே மனுதாரரின் கோரிக்கை தொடர்பாக மத்திய, மாநில அரசுகளும், யூ-டியூப் நிறுவனமும் 4 வார காலங்களில் பதிலளிக்க வேண்டும்...’ என உத்தரவிட்டு விசாரணையைத் தள்ளி வைத்துள்ளார்.

இந்த வழக்கு தொடர்ந்து நடக்கவிருக்கிறது.இந்நிலையில் இதுகுறித்து கருத்து தெரிவித்த மூத்த பத்திரிகையாளர், ‘‘எஃப்டிஎஃப்எஸ் எனப்படும் முதல்நாள் முதல்காட்சி பார்க்கும் ரசிகர்களிடம் கருத்து கேட்டு உங்கள் யூடியூபில் வெளியிடுங்கள் என்று நேற்றுவரை கோரிக்கை வைத்தது இதே தயாரிப்பாளர்கள்தாம்! இப்போது இவர்கள் இப்படிச் சொல்கிறார்கள்.

படத்தைப் பாதுகாக்கமுடியாது.‘என் அக்கா தப்பானவர்தான்... ஆனால், அதை நீ சொல்லக்கூடாது’ என்று ஒரு படத்தில் வசனம் வரும். 

அதுபோல் ‘எங்கள் படம் சரியில்லைதான்... ஆனால், அதை நீங்கள் சொல்லக்கூடாது’ என்னும் எண்ணம் திரைப்படத் துறையைப் பாதுகாக்கக் கூடியதல்ல.இதை சம்பந்தப்பட்டோர் உணரவேண்டும்...’’ என அழுத்தம்திருத்தமாகச் சொல்கிறார்.சமபந்தப்பட்டவர்கள் கவனிக்க வேண்டிய கருத்து.