இந்தியாவின் முன்னணி பாட்மிண்டன் வீராங்கனையான பி.வி.சிந்துவின் திருமணம் வரும் டிசம்பர் 20ம் தேதி உதய்ப்பூரில் நடைபெறுகிறது.29 வயதான பி.வி.சிந்து, ரியோ ஒலிம்பிக் போட்டியில் வெள்ளிப் பதக்கமும், டோக்கியோ ஒலிம்பிக் போட்டியில் வெண்கலப் பதக்கமும் வென்றவர். 

இதைத்தவிர 2019ல் உலக சாம்பியன்ஷிப் தொடரில் ஒற்றையர் பிரிவில் பட்டம் வென்றுள்ளார். காமன்வெல்த், ஆசிய போட்டிகள், ஆசிய சாம்பியன்ஷிப் மற்றும் ஜூனியர் அளவிலும் பல பட்டங்களை வென்று இந்தியாவுக்கு பெருமை சேர்த்துள்ளார்.

இந்நிலையில் ஹைதராபாத்தைச் சேர்ந்த வெங்கட தத்தா சாய் என்பவரை சிந்து திருமணம் செய்து கொள்ள உள்ளார். “இரு குடும்பங்களுக்கும் இடையே பல ஆண்டுகளாகவே நெருக்கம் உள்ளது. 

ஆனால், திருமணம் தொடர்பான பேச்சுவார்த்தைகள் கடந்த ஒரு மாதமாகத்தான் நடந்து வருகிறது. ஜனவரி மாதம் முதல் சிந்து பல்வேறு பாட்மிண்டன் தொடர்களில் பங்கேற்க உள்ளதால் டிசம்பர் மாதத்தில் திருமணத்தை நடித்த முடிவு செய்தோம்...” என்கிறார் பி.வி.சிந்துவின் அப்பா பி.வி.ரமணா.