‘ஒரு கல்லூரியின் கதை’, ‘மாத்தியோசி’, ‘ஆனந்தம் விளையாடும் வீடு’ போன்ற படங்களை ரசனையோடும், கமர்ஷியலாகவும் தந்தவர் இயக்குநர் நந்தா பெரியசாமி.

இந்தியில் இவர் எழுதிய ‘ராஷ்மி ராக்கெட்’ பெரிய ஹிட். இப்போது சமுத்திரக்கனி கதையின் நாயகனாக நடித்துள்ள ‘திரு.மாணிக்கம்’ படத்தை இயக்கியுள்ளார். ரிலீஸ் பரபரப்பில் இருந்தவரிடம் படம் பற்றி பேசினோம்.

அப்படி என்னுடைய கதை நாயகன் திரு.மாணிக்கம் நேர்மையை வலியுறுத்துகிறார். அதைக்கேட்டு எல்லோரும் மாணிக்கமா வாழ ஆசைப்பட்டாலே அதுதான் இந்தப் படத்தோட வெற்றி.

சாதாரண மனிதனாக இருக்கும் மாணிக்கம், எப்படி ‘திரு.மாணிக்க’மா மரியாதைக்குரியவராக மாறுகிறார் என்பதை யதார்த்தமா சொல்லியிருக்கிறோம்.‘திரு’ என்ற அடையாளத்தை அடைவது அவ்வளவு எளிதான காரியம் இல்லை.

ஒருவர் செய்யும் செயலில், வாழும் வாழ்க்கையில்தான் அந்த ‘திரு’ என்ற அடையாளம் கிடைக்கும். அப்படி ஒவ்வொரு மனிதனும் தன் பெயருக்கு முன் ‘திரு’ என்று சேர்த்துக்கொள்வதற்கான தகுதியை வளர்த்துக்கொள்ள வேண்டும் என்பதுதான் படம் சொல்லும் நீதி.

வழக்கமா கருத்து பேசும் சமுத்திரக்கனியைப் பார்த்திருப்போம். இதுல பேசாத சமுத்திரக்கனியை, கருத்து சொல்லாத கனியைப் பார்க்கலாம். படத்துல அவருக்கு மொத்த டயலாக் அரை பக்கம்தான் இருக்கும்.கொஞ்சமா பேசினாலும் அது அழுத்தமா இருக்கும். அதாவது அவர் பேசமாட்டார். 

அவருடைய பாதை பேசும். அவரைப்பற்றி அவர் பேசாமல் மத்தவங்க அவரைப் பற்றி பேசுவாங்க. அந்த கான்செப்ட்ல இந்தப் படத்தை எடுத்தோம்.மலையாளம், தெலுங்கு, என பிசியா ஓடிட்டு இருக்கும் நெருக்கடியான காலகட்டத்துல இந்தப் படத்துக்கு மொத்தமா முப்பது நாட்கள் கால்ஷீட் கொடுத்தார்.

பாரதிராஜா ஐயாவுக்கு ஜோடியா வடிவுக்கரசி வர்றார். ‘முதல் மரியாதை’யில் அவருடைய டைரக்‌ஷனில் நடிச்சவர் முதன் முறையா இதுல அவருக்கு ஜோடியா நடிக்கிறார்.நாசர் சாருக்கு இதுவரை பார்க்காத கேரக்டர். தம்பி ராமையா சார் ஃபாரீன் ரிட்டர்னா வர்றார். 

அவர் வர்ற போர்ஷன் காமெடிக்கு கியாரண்டியா இருக்கும். சின்னிஜெயந்த், இளவரசு, கருணாகரன், சாம்ஸ், ‘தேன்’ தருண்குமார், ‘இரவின் நிழல்’ சந்துரு, யூடியூப் பிரபலங்கள் ரேஷ்மா, விக்கி, கிரேஸி, ஆகாஷ்ன்னு ஒவ்வொருவருடைய கேரக்டரும் பேசப்படும்.

விஷால் சந்திரசேகர் மியூசிக் பண்றார். அவருடைய ‘சீதாராமம்’ பாடல்களுக்கு நான் மிகப் பெரிய ரசிகன். அந்தப் பாடல்களைக் கேட்டதிலிருந்து அவருடன் ஒர்க் பண்ணணும்னு ஆசையா இருந்தேன். அது இதுல நடந்துச்சு. 

மனசைக் கரைக்கிற மாதிரி உருகி உருகி டியூன் போட்டுக்கொடுத்தார். பாடல்களை சினேகன், இளங்கோ கிருஷ்ணன் எழுதியுள்ளார்கள்.தயாரிப்பு ரவிக்குமார். ‘ஜெமினி லேப்’ல பல ஆண்டுகளாக வேலை செய்த அனுபவம் உள்ளவர். கதை மேல நம்பிக்கை வெச்சு தயாரிக்க முன்வந்தார். ‘மாஸ்டர்பீஸ்’ சார்பாக லிங்குசாமி, சுபாஷ் சந்திரபோஸ் ரிலீஸ் பண்றாங்க.

ஆடியன்ஸ் எல்லா காலத்திலும் எல்லா ஜானர் படங்களையும் ஏற்றுக்கொண்டுள்ளார்கள். ஆக்‌ஷன், லவ் என்று பிரித்துப் பார்க்கமாட்டாங்க. கடந்த காலங்களில் மோகன் சார் படங்கள் காதல் படங்களாக இருந்தால் ரஜினி சார், கமல் சார் படங்கள் ஆக்‌ஷனுக்காக பேசப்பட்டது.அதுமாதிரிதான் இப்போது எல்லா வகை படங்களும் வெளியாகிறது. 

ரசிகர்களைப் பொறுத்தவரை ஆக்‌ஷன் படமோ, காதல் படமோ ஏதோ ஒரு விஷயம் அவங்க இதயத்தின் ஒரு முனையைத் தொடணும். அந்த வகையில் இதயத்தைத் தொடும் அனைத்துப் படங்களும் நல்ல படங்களே. உதாரணத்துக்கு சமீபத்தில் வெளியான ‘வாழை’, ‘அமரன்’ படங்களின் வெற்றியைச் சொல்லலாம்.

எனக்கு சினிமாதான் சோறு போடுகிறது. ஃபங்ஷன், பார்ட்டி என்று எங்கும் போனதில்லை. கதை ரெடி பண்ணுவதுதான் என்னுடைய முழு நேர வேலை.