வரும் ஜனவரி மாதம் அமெரிக்காவில் ஆட்சிப் பொறுப்பேற்கும் டிரம்ப், தனது ஆட்சிக்காலத்தில் செயல்திறன் துறைக்கு தொழில் அதிபர் எலன் மஸ்க் மற்றும் விவேக் ராமசாமி ஆகியோர் தலைமை தாங்குவர் என்று அறிவித்துள்ளார்.

அமெரிக்க அதிபர் தேர்தலில் டொனால்ட் டிரம்ப் போட்டியிட்டபோது அவருக்கு ஆதரவாக தீவிர பிரசாரத்தில் ஈடுபட்டவர் எலன் மஸ்க். உலகின் நம்பர் ஒன் பணக்காரரான எலன் மஸ்க், பல்வேறு கூட்டங்களில் டொனால்ட் டிரம்புக்கு ஆதரவாகப் பேசினார். அவரது ‘எக்ஸ்’ (முன்பு ‘டுவிட்டர்’) சமூக வலைதளமும் டிரம்புக்கு ஆதரவாக செயல்பட்டதாக கூறப்படுகிறது.

இவரது பெற்றோர் கேரளாவைச் சேர்ந்த தமிழ் பேசும் குடும்பத்தைச் சேர்ந்தவர்கள். விவேக் ராமசாமியின் தந்தை பெயர் கணபதி ராமசாமி. இவர் கொல்கத்தாவில் உள்ள தேசிய தொழில்நுட்பக் கல்லூரியில் படித்து இன்ஜினியராகப் பணியாற்றினார். அதன்பிறகு ஜெனரல் எலக்ட்ரிக் நிறுவனத்தில் பொறியாளராகப் பணியாற்றினார்.

 விவேக் ராமசாமியின் தாய் பெயர் கீதா. இவர் மைசூர் மருத்துவக் கல்லூரி மற்றும் ஆராய்ச்சி நிறுவனத்தில் படிப்பை முடித்து சைக்கியாட்ரிஸ்டாக பணியாற்றினார். விவேக் ராமசாமியின் பெற்றோர் கேரளாவின் பாலக்காடு மாவட்டம் வடக்கஞ்சேரியில் வசித்து வந்தனர். அதன்பிறகு அமெரிக்காவுக்கு குடிபெயர்ந்தனர்.

முப்பத்தி ஒன்பது வயதாகும் ராமசாமி, தற்பொழுது ஏழு பில்லியன் டாலர் மதிப்பிருக்கும் (இந்திய மதிப்பில் சுமார் ரூ.59,000 கோடி) ‘ராய்வென்ட் சயின்சஸ்’ (Roivant Sciences) என்ற உயிரி தொழில்நுட்ப நிறுவனத்தை ஓஹியோவில் நிறுவியுள்ளார்.இவர், முதலீடு தொடர்பான நிறுவனத்தின் இணை நிறுவனராகவும் உள்ளார்.

 ‘போர்ப்ஸ்’ (Forbes) வெளியிட்ட அறிக்கையின்படி இவருடைய மொத்த சொத்துக்களின் மதிப்பு 630 மில்லியன் டாலர்கள்.விவேக்கின் மனைவி அபூர்வா, அறுவை சிகிச்சை நிபுணர். இவர் தனது குடும்பத்துடன் கொலம்பஸில் வாழ்கிறார். இவருக்கு இரண்டு மகன்கள்.

கடந்த ஜூன் மாதம் ‘ஏசிபி நியூஸ்’ ஊடகத்திடம், ‘‘இந்தப் போரை கொரிய போரை நிறுத்தியதைப் போல உடன்படிக்கை கொண்டு நிறுத்த வேண்டும். அப்போதுதான் இரு நாடுகளும் தங்களுக்கான எல்லைகளுக்குள் தங்களது அதிகாரத்தை செலுத்தமுடியும்...’’ என்று தெரிவித்திருந்தார்.

விவேக்கைப் பொறுத்தவரை உக்ரைனுக்கு அதிக ஆயுதங்களை வழங்குவது என்பது ரஷ்யாவை சீனாவின் பக்கம் தள்ளுவது போன்றது.இதுமட்டுமல்ல... வாக்களிப்பதற்கான குறைந்தபட்ச வயதை 25 ஆக உயர்த்த வேண்டும் என்றும் விவேக் கூறுகிறார்.

18 வயது வரை உள்ளவர்கள் ‘தேசிய சேவைத் தேவைகளை’ பூர்த்தி செய்தால் மட்டுமே அவர்களுக்கு வாக்களிக்கும் உரிமை வழங்கப்பட வேண்டும் என்பது இவரது எண்ணம். அதாவது, அவர்கள் அவசரகாலத்தில் உதவியாக இருந்திருக்க வேண்டும் அல்லது ராணுவத்தில் ஆறு மாதங்கள் பணியாற்றியிருக்க வேண்டும்.

இத்துடன் 18 வயதைக் கடந்தவர்கள் அமெரிக்கக் குடியுரிமை தேர்வில் வெற்றி பெற்றால் மட்டுமே வாக்களிக்கும் உரிமை அவர்களுக்கு வழங்கப்பட வேண்டும் என்றும் கூறி வருகிறார்.

ஹைலைட்டாக, உளவு அமைப்பான ‘எஃப்.பி.ஐ’-இன் நிதிகளை பிரித்து ரகசிய சேவை, நிதிக் குற்றங்களுக்கான அமலாக்கத் துறை மற்றும் பாதுகாப்பு புலனாய்வு நிறுவனம் ஆகியவற்றுக்கு வழங்கலாம் என்ற யோசனையை பலகாலமாக முன்வைத்து வருகிறார்.

சின்ன ஃப்ளாஷ்பேக். அதிபராக தேர்வு செய்யப்பட்டுள்ள டிரம்ப் தனக்கு எதிராக நடத்தப்பட்ட எஃப்.பி.ஐ-இன் செயல்களை வன்மையாகக் கண்டித்து வருவதை இந்த இடத்தில் நினைவு கூருங்கள்! ஆக, டிரம்ப் என்னும் செல்போனுக்கு ஏற்ற சிம்கார்ட்தான் விவேக் ராமசாமி.இந்திய வம்சாவளியைச்சேர்ந்த இவருக்கு வாழ்த்துகள். இவரால் இந்தியர்கள் பயனடைவார்களா என்பதை பொறுத்திருந்து பார்ப்போம்.