ஹோட்டல் நடத்துகிறார் ஏ.ஆர்.ரஹ்மான் சகோதரியும் ஜி.வி.பிரகாஷ் அம்மாவுமான ஏ.ஆர்.ரெஹானா!

அறிமுகம் தேவைப்படாத பிரபலம் ஏ.ஆர்.ரெஹானா. பாடகி, இசையமைப்பாளர் என பல தளங்களில் இயங்கும் அவர் இப்போது சென்னை சாலிகிராமத்தில் தன் அம்மா பெயரில் ‘கரீமா ஹோட்டல்’ திறந்துள்ளார். மியூசிக், ஹோட்டல் என பிசியாக இருந்தவரிடம் பேசினோம். பேட்டிகளில் உங்கள் சகோதரர் ஏ.ஆர்.ரஹ்மான், மகன் ஜி.வி.பிரகாஷ் பற்றி நிறைய சொல்லியிருக்கீங்க.

 உங்களுக்கு எப்படி மியூசிக்ல ஆர்வம் வந்துச்சு?

எங்க குடும்பமே இசைக் குடும்பம். தாத்தா பாகவதர். கோயில்களில் கதாகாலட்சேபம் பண்ணியவர். அப்பா மியூசிக் டைரக்டர். ரஹ்மானை எல்லோருக்கும் தெரியும்.
அப்பாவுக்கு மியூசிக்னா உயிர். கம்போஸிங், ரிக்கார்டிங் என எப்பவும் பிசியா இருப்பார். அந்த சூழ்நிலையில் வளர்ந்ததாலயோ அல்லது ஜீன் என்பதாலயோன்னு தெரியல... எனக்கும் மியூசிக் மேல ஆரவம் வந்துடுச்சு. அப்பா மியூசிக் டைரக்டர் என்பதால நானும் மியூசிக்ல இருக்கணும்னு பியோனோ, கிடார் கத்துக்க வெச்சார்.

நாங்க சின்ன பசங்களா இருக்கும்போதே அப்பா தவறிட்டார். அம்மா கொஞ்சம் கன்சர்வேடிவ். அப்போது எங்களை கல்யாணம் பண்ணிவெச்சுட்டாலே போதும்னு இருந்தார் அம்மா. ஆனாலும் படிச்சு வேலைக்குப் போகணும்னு தைரியமும் கொடுத்தாங்க. படிச்சாதான் தைரியமா லைஃபை ஃபேஸ் பண்ணமுடியும்னு நல்லா படிக்க வெச்சாங்க.பொதுவா வீட்ல மூத்தவங்களுக்கு பொறுப்பு அதிகமா இருக்கும்.

உங்கள் இளமைக் காலத்தில் என்னென்ன பொறுப்பு இருந்துச்சு?

அப்பா இல்லையே தவிர, தாத்தா, பாட்டி, சித்தி, சித்தப்பா என ரிலேட்டிவ்ஸுடன்தான் வளர்ந்தோம். தனிமையா இருக்கிறோமே என்ற ஃபீலிங் வந்ததில்லை. எனக்கு பொறுப்புகளும் அதிகமில்லை. குட்டிக் குட்டியா வேலை கொடுப்பாங்க. அதை செஞ்சுட்டு படிக்க போயிடுவேன்.

திடீர்னு ஹோட்டல் அதிபரா மாறிட்டீங்க?

அம்மாவை இழந்தபிறகு போகக்கூடிய இடம் எதுவுமில்லை என்ற சூழ்நிலை உருவாச்சு. அம்மா இருக்கும் வரை எதுவும் தெரியல. அம்மா இறந்த பிறகுதான் நமக்கு இருந்த ஒரு சப்போர்ட்டும் இல்லாமப் போயிடுச்சேன்னு தோணுச்சு.நிறைய டைம் இருந்துச்சு. சோகத்தை மீட்டெடுக்க எதாவது ஒரு விஷயத்துல ஆக்டிவ்வா இருந்தா மட்டுமே அம்மாவை இழந்த சோகத்திலிருந்து மீள முடியும்ன்னு நெனைச்சு அம்மா பேர்ல ‘கரீமா ஹோட்டல்’ திறந்தேன். ஹோட்டல் அதிபர் என்று சொல்லுமளவுக்கு ரொம்ப பெரிய ஹோட்டல் கிடையாது. 20 பேர் உட்கார்ந்து சாப்பிடலாம். வீட்டு ஃபீல் இருக்கும்.