முதல் நாள் ஷூட்டிங் கொடைக்கானலில் கோஸ் பேக்ரவுண்ட் செட்டப்ல ஷூட் ஏற்பாடு பண்ணிட்டேன். வண்டி வண்டியா கோஸ் ஆர்டர் பண்ணிய நிலையில செலக்ட் பண்ணிவெச்சிருந்த சிறுவனால அங்கவர முடியல. 

எல்லாம் போச்சுன்னு நெனைச்ச சமயத்துல ஷூட்டிங்கை வேடிக்கை பார்த்த சிறுவன் என் கண்ணுல பட்டதும் அவனையே நடிக்க வெச்சுட்டேன். நம்ம தொழிலுக்கு நாம நேர்மையா இருந்தா அது நம்மை கைவிடாதுன்னு ‘உன்னைக் கொண்டாடு’ கான்செப்ட் புரிய வெச்சது...’’ நிதானத்தோடு பேச ஆரம்பித்தார் இயக்குநர் சிவா ஆர்.

சிவனுடைய 1008 நாமங்களில் ஒன்றுதான் ‘ஆலன்’. சிவன் என்றால் படைப்பாளி. காசியையும் சிவனையும் பிரிக்க முடியாது. காசிக்குப்போன பிறகுதான் ஹீரோவுடைய வாழ்க்கையில பல திருப்பங்கள் நடக்குது. ‘ஆலன்’ கதைக்கு தொடர்புடைய டைட்டிலா இருந்துச்சு. க்யூட்டான டைட்டிலா இருந்ததால அதையே ஃபைனல் பண்ணிட்டோம்.

வெற்றி கதை பிடிச்சு உள்ளே வந்தார். 

அவரை காஸ்டிங் பண்ண முக்கிய காரணமா இருந்தது அவருடைய கண்கள். ஆன்மிகத்துக்கு கண்ணுதான் பேசணும். தியாகு கேரக்டருக்கு அந்த கண் போதுமானளவுக்கு நியாயம் செய்யும்னு தோணுச்சு. வாயோ வேற எதுவும் பேசவேண்டிய அவசியமிருக்காது. கேரக்டருக்கு பலம் சேர்க்கும் உயரம்.

இது என்னுடைய மனசுக்கு நெருக்கமான கதை மட்டுமல்ல, மக்களிடம் முழுமையா சேரணும்னு நினைச்ச கதை. ஆனால், எல்லோரும் ‘இது நார்மலான கதை. இந்த மாதிரி கதை எடுபடாது. ஃபைட், டான்ஸ்னு கமர்ஷியலா கொண்டுபோனாதான் ஆடியன்ஸ் பார்ப்பாங்க’ன்னு பயம் காட்டினாங்க.நான், என்னுடைய முடிவுல தெளிவா இருந்தேன். 

நான் நினைச்சிருந்தா இந்தக் கதையில நிறைய ஃபைட் வெச்சிருக்கலாம். ஹீரோ ரிவெஞ்ச் எடுப்பதற்கு கதையில நிறைய ஸ்பேஸ் இருக்கு. ஆர்ட்டிஸ்ட், லொகேஷன் உட்பட எதையும் சமரசம் பண்ணிக்கல. படம் முடிச்சு பார்க்கும்போது ஆடியன்ஸை ஏமாத்தாம உண்மையா ஒரு ஃபீல் குட் படம் கொடுத்த திருப்தி வந்துச்சு.