மீனாட்சி சவுத்ரி... இணைய வைரல் பெயர் இதுதான். இயக்குநர் வெங்கட் பிரபு - விஜய் இணையும் முதல் படமான தளபதி 68 படத்தின் பூஜை வீடியோக்கள், படங்கள் வெளியானது முதலே இணையவாசிகளின் கண்கள் மீனாட்சி சவுத்ரி மீது விழுந்துவிட்டன. 

படத்தில் பெரிய நட்சத்திரப் பட்டாளமே நடித்தாலும் அனைவரின் கண்களுக்கும் பளிச்சென தென்பட்டவர் மீனாட்சி. படத்தில் விஜய் அப்பா - மகனாக நடிக்க இருப்பதாக பேசப்படும் நிலையில், நடிகை மீனாட்சி சவுத்ரி ஒரு விஜய்க்கு ஜோடியாக நடிக்க இருப்பதாக தகவல்கள் வெளியாகியிருந்தன.

இந்நிலையில், யார் இந்த மீனாட்சி சவுத்ரி, இவரது பின்னணி என்ன என்று நெட்டிசன்கள் பலரும் சமூகவலைத்தளங்களில் தேடத் துவங்கிய நிலையில் நாமும் நம் பங்குக்கு கூகுள் அங்கிளைத் தட்டினோம். 26 வயதா ன மீனாட்சி சவுத்ரியின் பூர்வீகம் அரியானா. 

மாநில அளவில் நீச்சல் வீராங்கனையாகவும், பேட்மின்டன் வீராங்கனையாகவும் திகழ்ந்த மீனாட்சி, செயின்ட் சோல்ஜர் இன்டர்நேஷனல் கான்வென்ட் பள்ளியில் பள்ளிப் படிப்பை முடித்திருக்கிறார். பஞ்சாப் நேஷனல் டென்டல் கல்லூரி மற்றும் மருத்துவமனையில் பல் மருத்துவத்தில் இளங்கலை பட்டம் பெற்றுள்ளார்.

இதோ வெளியாகியிருக்கும் தெலுங்கு பொங்கல் சிறப்பு மாஸ் மகேஷ் பாபுவின் ‘குண்டூர் காரம்’ படத்திலும் இரண்டு நாயகிகளில் ஒருவர். ரவி தேஜாவுடன் ‘கில்லாடி’, ஆத்வி சேஷுடன் ‘ஹிட்’ போன்ற பிளாக்பஸ்டர் படங்களில் நடித்த மீனாட்சி, விஜய்யின் ‘த கோட்’ படத்திலும் இன்னொரு நாயகியாக இணைந்ததன் மூலம் தமிழ் சினிமா வட்டாரத்தில் அதிகம் கவனம் ஈர்த்திருக்கிறார். விஜய்யின் தீவிர ரசிகை என்று அவரே பேட்டிகளில் கூறிய வீடியோக்கள் தற்போது வைரலாகியுள்ளன.