‘‘‘ஹரியும் சிவனும் ஒண்ணு, அறியாதவங்க வாயில மண்ணு...’ இது இப்ப இங்க தேவையில்ல... ‘அல்லாவும், அய்யனாரும் ஒண்ணு... இது அறியாதவங்க வாயில மண்ணு...’ இதுதான் இப்போ இங்க தேவை...’’ இப்படி ட்ரெய்லரிலேயே மத நல்லிணக்கம், சமத்துவம் எனப் பேசி கருப்பு சட்டை கருப்பு வேட்டி சகிதமாக மாஸ் காட்டுகிறார் ஆர்யா.

இயக்குநர் முத்தையாவின் இயக்கத்தில் பரபரவென தயாராகியிருக்கிறது ‘காதர் பாட்சா என்ற முத்துராமலிங்கம்’.‘‘என்னுடைய எட்டாவது படம் மறுபடியும் மண் சார்ந்த, உறவு சார்ந்த ஒரு கதை. என்னை தேர்வு செய்தது ஆர்யா சார்தான். அவருக்கு இப்படியான ஒரு கிராமத்து மண் சார்ந்த கதையில் நடிக்கணும்னு ரொம்ப நாளா ஒரு ஆசை இருந்திருக்கு. குறிப்பா என் இயக்கத்துல. அப்படித்தான் இந்தப் படம் உருவாச்சு.

கதையில் ஒவ்வொரு கதாபாத்திரமும் ஏதோ ஒரு நன்றி உணர்வை சொல்லிக்கிட்டே இருக்கும். பிரபு சார் பெயரும் காதர் பாட்சாதான். அவருக்கும் ஒரு நன்றி உணர்ச்சி இருக்கும். ஆர்யாவின் பெயரும் காதர் பாட்சா. அவரின் பெயர்க் காரணமும் கூட ஒரு நன்றி உணர்வால் வச்சதுதான். ஹீரோயின் சித்தி இத்னானி. அவங்க ஒரு மூணு குழந்தைகளுக்காகத்தான் தன்னுடைய வாழ்க்கையை வாழ்ந்துகிட்டு இருப்பாங்க.

அதுவும் ஒரு நன்றி உணர்வு சார்ந்ததுதான். அந்த குழந்தைகள் யாரு... இப்படி படம் முழுக்க நன்றி உணர்வும் விசுவாசமும் இருக்கும். இதற்கிடையிலே எதிர்மறை மனிதர்களும் சம்பவங்களும் இருக்கத்தானே செய்வாங்க... அவங்க யாரு... இந்த நன்றி உணர்வுள்ள நல்லவர்கள் ஒன்று சேர்ந்தா என்ன நடக்குது? இதுதான் கதைக்களம்.

ஆர்யா கதையின் நாயகன். அவர் பகுதி மாஸ் கிளாஸ் ஆக இருக்கும். ஹீரோயின் சித்தி இத்னானி. ‘வெந்து தணிந்தது காடு’ படத்தில் முழுக்க முழுக்க மும்பை தமிழ்ப் பெண்ணாக நடிச்சிருந்தாங்க. அவர்களை முழுமையாக தென்னாட்டுப் பெண்ணாக மாற்றி இந்தப் படத்தில் நடிக்க வைச்சிருக்கோம்.

படிச்ச பொண்ணு, அதனால சல்வார், தாவணினு மாறி மாறி வருவாங்க. ‘கே.ஜி.எஃப்’ அவினாஷ் இந்த படத்தில் வேறு ஒரு கெட்டப்பில் பார்க்கலாம். நரேன் அண்ணன்... அவர் பெயரே வெறியாண்டி. பேருக்கு ஏத்த மாதிரியே ஒரு கேரக்டர் அவருக்கு. ‘பசங்க’ படம் பார்த்துட்டு மதுசூதன் ராவ் அண்ணனை முதல் படத்திலேயே நடிக்க வைக்க முயற்சி செய்தேன். அது மிஸ் ஆகிடுச்சு. இந்தப் படத்தில் அவருக்கு முக்கியத்துவம் வாய்ந்த கேரக்டர்.