கடந்த 13ம் தேதி அறிவிக்கப்பட்ட கர்நாடகா தேர்தல் தோல்வியைவிட அடுத்தநாள் அதே கர்நாடகா பெங்களூரில் வெளியிடப்பட்ட புத்தகம் ஒன்று பாரதிய ஜனதா கட்சியை ரொம்பவே அப்செட்டாக்கியது. இந்தப் புத்தகத்தை எழுதியவர் ஒரு எதிர்க்கட்சிக்காரர் என்றால் பாஜகவும் மக்களும் அதை துடைத்துவிட்டுப் போயிருக்கலாம்.

ஆனால், எழுதியிருப்பது இன்றைய மத்திய நிதி அமைச்சர் நிர்மலா சீதாராமனின் கணவர் என்பதுதான் ஹைலைட். புத்தகத்தை வெளியிட பல பதிப்பகங்கள் பின்வாங்கினாலும் இந்தப் புத்தகம் இந்தத் தருணத்தில் வருவது மிகத் தேவை என்பதால் மிக தைரியமாக பதிப்பித்திருக்கிறது ‘ஸ்பீக்கிங் டைகர்’ எனும் பதிப்பகம்.

ஆனால், 2008இல் ஆந்திர சூப்பர் ஸ்டார் சிரஞ்சீவி ‘பிரஜா ராஜ்யம்’ கட்சியை ஆரம்பித்து ஆந்திர அரசியலில் சிறு சலனத்தை ஏற்படுத்தியபோது பாஜகவில் இருந்து விலகி சிரஞ்சீவியுடன் இணைந்துகொண்டார் பிரபாகர். சந்திரபாபு நாயுடு 2014இல் சட்டமன்றத் தேர்தலில் ஜெயித்தபோது தெலுங்கு தேசம் கட்சி பிரபாகரை வளைத்துப்போட்டது. சந்திரபாபு ஆட்சியில் தகவல் தொடர்பு ஆலோசகராக கோலோச்சினார் பிரபாகர்.

இதற்கிடையில் 1986லேயே நிர்மலா சீதாராமனைத் திருமணம் செய்துகொண்டார் பிரபாகர் என்பது முக்கியமானது. தனது கருத்துகளை பல பத்திரிகைகளில் தொடர்ந்து பிரபாகர் எழுதி வருகிறார். அவற்றில் இருந்து தேர்வு செய்யப்பட்ட கட்டுரைகள்தான் ‘கோணல் மரத்தில் கட்டப்பட்ட புதிய இந்தியா’ (The Crooked Timber of New India) எனும் தலைப்பில் புத்தகமாகியிருக்கிறது.

புத்தக வெளியீட்டை ஒட்டி பிரபல ‘வயர்’ (thewire.in) எனும் வலைத்தள யூடியூபுக்கு பிரபாகர்பேட்டி கொடுத்தார். நேர்காணல் செய்தவர் பிரபல பத்திரிகையாளரான கரன் தாப்பர்.

பாஜகவின் வயிற்றில் புளியைக் கரைத்திருக்கும் இப்பேட்டியின் சாராம்சம் இதுதான்: ‘ஒன்றைத் தவிர மற்ற விஷயங்களில் மோடி ஞான சூனியம். பொருளாதாரம் மட்டுமல்ல... இன்னும் பல விஷயங்களில் திறனற்றவராகவே இருக்கிறார். அவருக்கு இருக்கும் ஒரே திறமை இந்துத்துவா கொள்கைகளை மிகத் திறமையாகப் பரப்புவதுதான்.

மோடி அரசு வளர்ச்சி வளர்ச்சி என்று கூப்பாடு போடுகிறது. ஆனால், இன்று விலைவாசி உயர்வால் பணவீக்கத்தின் அளவு சுமார் 6லிருந்து 7 சதவீதமாக உயர்ந்திருக்கிறது. வேலையில்லாதோர் சதவீதம் 7. அதிலும் இளைஞர்களின் வேலையிழப்பு சுமார் 18 சதவீதம். அண்மையில் ஆக்ஸ்ஃபாம் (Oxfam) எனும் பிரபல உலகளாவிய தனியார் நிறுவனம் இந்தியாவுக்கான ஒரு பொருளாதார அறிக்கையை தாக்கல் செய்தது.

அதில் இந்தியாவின் சமத்துவமின்மை அதிகரித்தபடியே இருக்கிறது... அதாவது சில பேரின் சொத்து குவிவது அதிகரித்துக்கொண்டும், பெரும்பான்மையானவர்கள் அனுபவிக்கும் சிறிய அளவிலான சொத்துக்கள் குறைந்து கொண்டே வருவதாகவும் சுட்டிக்காட்டுகிறது.

ஆரம்பத்தில் வாஜ்பாய் காலத்தில் சில மாநில கட்சிகளும் பாஜகவுடன் இணைந்திருந்ததால் அக்கட்சியின் இந்துத்துவா அஜெண்டாவைப் புரிந்து கொள்ளமுடியாமல் போய்விட்டது. இது இன்றைக்கும்கூட எதிர்க்கட்சிகளின் தோல்வியாக இருக்கிறது...’ என்று சொல்லும் பிரபாகர், மோடியின் அரசியல் குறித்தும் இந்தப் பேட்டியில் வரலாற்று ரீதியாக விவரித்திருக்கிறார்.

‘நமது பொருளாதாரம் கோவிட்டுக்கு முன்பே சரிய ஆரம்பித்து விட்டது. கோவிட் காலத்தில் மேலும் சரிந்தது. ஆனால், இன்று ஏற்படும் ஒரு சிறிய முன்னேற்றத்தை பூதாகரமாக ஊதி நாடு வளர்ச்சியில் செல்வதாகச் சொல்கிறது. உண்மையில் கோவிட்டுக்கு முந்தைய வளர்ச்சியைக்கூட இன்றைய வளர்ச்சி தொட்டுவிடவில்லை.

பொருளாதாரக் குறியீடுகள் அதைத்தான் உணர்த்துகிறது.உண்மையைச் சொல்வதென்றால் அன்று முதல் இன்று வரை பாஜகவில் ஒரு பெரிய பொருளாதார மேதைகூட இல்லை. மேதையை விடுங்கள்.