அமெரிக்காவின் மிகப்பெரிய பால் பண்ணைகளில் ஒன்று, ‘டுல்ஸ் பால் பண்ணை’. நூறு வருடங்களுக்கும் மேலாக, நான்கு தலைமுறைகளாகத் தொடர்ந்து வெற்றிகரமாகச் செயல்பட்டு வரும் பண்ணை இது. தினமும் 50 லட்சத்துக்கும் அதிகமான அமெரிக்கர்கள் ‘டுல்ஸி’ன் பாலையும், அதன் பால் பொருட்களையும் நுகர்கின்றனர். இதை நிர்வகித்து வருகிறார் டொட் டுல்ஸ். 

ஒரு நாள் ஏனோதானோவென்று கன்றுக்குட்டிகளைக் கவனித்து வந்த பேரன் டொட்டிடம், ‘‘தரமான, ஆரோக்கியமான பாலை உற்பத்தி செய்வதும், பசுக்களைப் பத்திரமாகப் பார்த்துக்கொள்வதும் ரொம்பவே பெருமையான விஷயம்...’’ என்று தாத்தா சொல்லியிருக்கிறார்.

இதை வேதவாக்குப் போல கெட்டியாகப் பிடித்துக்கொண்டார் டொட். ஆம்; இன்று கலிபோர்னியாவில் தரமான பாலைக் கொடுப்பதில் முன்னணியில் இருப்பது ‘டுல்ஸ் பால்பண்ணை’தான். அன்றிலிருந்து மிகுந்த சிரத்தையுடன் கவனிக்கத் தொடங்கினார். இதற்காக நண்பர்களுடன் சேர்ந்து விளையாடுவதைக்கூட தவிர்த்தார். பசுக்களும், கன்றுகளுமே அவரது நண்பர்களாக மாறின.

அதனால் 1979ம் வருடம் பசுக்களின் எண்ணிக்கை ஆயிரமாக உயர்த்தப்பட்டது. தாத்தா, அப்பாவுடன் சேர்ந்து டொட்டும் பால்பண்ணையை நிர்வகிக்கத் தொடங்கினார். அப்போது அவருக்கு வயது 17தான். ஒரு நாள் டொட்டின் அப்பாவும், தாத்தாவும் பண்ணைக்கு வெளியில் நின்று புகைபிடித்துக் கொண்டிருந்தனர்.

அப்போது அங்கு வந்திருக்கிறார் டொட். 10 பசுக்களுடன் பண்ணை ஆரம்பித்ததாக தாத்தா சொல்ல, நான் 1000 பசுக்கள் கொண்ட ஒரு பண்ணையாக மாற்றிவிட்டேன் என்று டொட்டிடம் ஜாலியாக சொல்லியிருக்கிறார் அவரது அப்பா.

டொட்டும் கல்லூரிப்படிப்பை முடித்தார். தாத்தாவும், தந்தையும் வழிகாட்ட  குடும்பத்துக்குச் சொந்தமான பால்பண்ணைகளைத் தனியாக நிர்வகிக்க ஆரம்பித்தார் டொட். அவர் நிர்வாகத்துக்கு வந்த ஐந்து வருடங்களிலேயே பசுக்களின் எண்ணிக்கை 3,800 ஆக உயர்ந்தது. கலிபோர்னியாவின் மிகப்பெரிய பால் பண்ணைகளில் ஒன்றாக வளர்ந்தது ‘டுல்ஸ் பால் பண்ணை’.

பசுக்களைப் பராமரிக்கவும், மேய்ச்சல் விடுவதற்காகவும், இயந்திரங்களின் மூலம் பால் கறப்பதற்காகவும், பாலை விநியோகிக்கவும் நூற்றுக்கும் மேலானோர் வேலைக்கு அமர்த்தப்பட்டனர்.