2022ம் ஆண்டுக்கான நோபல் பரிசு பெற்றிருக்கும் அன்னி எர்னோவின் வாழ்வும் எழுத்தும் உணர்த்தும் செய்தி இதுதான்...சமூகவியல் மற்றும் சமகால வரலாற்றைக் கலந்து வாழ்வை எழுதும் இலக்கியமாக, தன் எழுத்தைப் பற்றி, தன் வார்த்தைகளில் விவரிக்கும் அன்னி எர்னோ இலக்கியத்துக்கான நோபல் பரிசை இவ்வருடம் வென்றுள்ளார். 82 வயதான அன்னி, இலக்கியத்துக்காக இப்பரிசை வெல்லும் முதல் ஃபிரஞ்சுப் பெண்மணி. இந்த விருது தொடங்கப்பட்ட வருடமான 1901ல் இருந்து, இதைப் பெற்றுள்ள 119 பேர்களில் அன்னியைச் சேர்த்து 17 பேர் பெண்கள்.

ஃப்ரெஞ்ச் நாட்டின் அதிபர் மாக்ரோன், அன்னியின் புத்தகங்களை “ நம் நாட்டின் (ஃப்ரான்ஸ்) 50 வருட கால கூட்டு நினைவுகளின் தொகுப்பு...” என்கிறார்.நார்மண்டியில் வீத்தோ என்ற சிறு நகரத்தில் 1940ம் ஆண்டு பிறந்தவர் அன்னி. அவரது பெற்றோர் ஒரு மளிகைக் கடையும் ஒரு சிறிய கஃபேயும் நடத்தி வந்தனர்.

அவரது தந்தை இறந்த அன்று அவரது தாய் கீழே தனது வாடிக்கையாளர்களை கவனித்த பின், இரவில்தான் இறுதிச் சடங்குகளை முடித்தார் என்று ஒரு பேட்டியில் உருக்கமாக சொல்கிறார். தாயாரது தன்முனைப்பான உழைப்பும் உந்துதலும்தான் அவர் படித்து பட்டம் பெற்று ஆசிரியராக பணிபுரிய முக்கிய காரணமென்று சொல்கிறார்.