லவ் ஸ்டோரி-காதல் என்ற ஃபீலிங் இளையராஜாவிடம் இருந்தே புரிந்தது!

‘96’ இயக்குநர் ச.பிரேம்குமார்

ஒரு பூனைக் குட்டி வாயில் நூல் கண்டை கவ்விக் கொண்டு சந்தோசமாக நகர்வதைப்போல் நான் இளையராஜா இசையை பெரும் துணையாகக் கொண்டேன். அவரோ என்னிடம் இசையின் உணர்வில், காதலின் உன்மத்த நிலையை உணரச் செய்துகொண்டே இருந்தார். என் காட்டு வழிப் பயணத்தில் வந்த குயிலின் கீதம் போன்றதே அவரின் பாடல்கள். பல காதல்களுக்கு அவர் எங்கேயோ இருந்துகொண்டு, இசையமைத்துக் கொண்டிருந்தார்.

நான் இப்படி இருக்க, அப்பா இந்திப் பாடல்களில் உருகிக் கரைந்து கொண்டிருப்பார். நெடிய உயரத்தில் அமிதாப் பாடிவரும், ‘சில்சிலா’ படப் பாடல்களுக்கு அவர் அடிமையாகி இருந்தார். காதல் என்ற ஃபீலிங் இளையராஜாவிடம் இருந்தே புரிந்தது. அவர் காதலில் அகழ்ந்து சென்ற மனமே என்னுடையது. அவரின் சில பாடல்கள் நீண்ட உறக்கத்தின் கனவுபோல எனக்குப் படும்.

போதாதென்று இதற்கு நடுவில் ‘தளபதி’ பார்த்தேன். ரஜினி காதல் வயப்பட்டு அந்தக் காதலும் முறியும். அப்படியே அந்தப் பிரிவை ராஜா உயிரைப் பிழிந்து உணர்த்துவார். அவரால் மட்டுமே அது முடியும். பார்த்துக்கொண்டிருந்த தியேட்டரைவிட்டு வெளியே வந்து யாரையாவது பார்த்து ‘ஐ லவ் யூ’ சொல்லிவிடுவேன் போலிருந்தது.

மேலும் அடுத்து ரஜினியிடம் சொல்லிவிட்டு நீண்ட அமைதியில் அந்தப்பெண் போய் மறையும். நான் சுக்கு நூறாக உடைந்து அழுதுவிட்டேன். எனது கண்ணீரும், புன்னகையும் இளையராஜா இசைக்கான விடைகள்.அப்புறம் சிலரிடம் சின்னதான ஒரு பிரியம் இருந்தது. சிறப்பான நட்பிருந்தது. டிகிரி முடித்ததும் ஒரு பெண் என் மேல் விருப்பப்பட்டு, ‘உங்களுக்கு ஓகேன்னா என் வீட்டில் சொல்றேன்னு’ காதலைப் பரிந்துரைத்தார்.

நான் அப்போது போட்டோஃக்ராபி சினிமாவில் நுழையத் தொடங்கி இருந்தேன். நன்றியுடன் மறுத்த என் முதல் காதல் சில நிமிடங்களில் முடிந்து
விட்டது. அம்மாவிடம் சென்று ‘எனக்கு கல்யாணத்தில் ஆர்வமில்லை... மனிதர்களோடு இருக்கப் பிடிக்கலை... உங்களுக்கு என்னால ஒரு பேரக் குழந்தை வேணும்னா அந்த ஆசைய விட்டுடுங்க’ என்றேன்.

அம்மா ‘உன்ன மாதிரி ஓர் ஆளை கல்யாணம் பண்ணிக்கிட்டு அந்தப் பொண்ணு அவஸ்தைப் படுவதைவிட, நீ தனியாவே இருந்துக்க’ என்றார்கள்.