தலபுராணம்-தி. நகரும் மாம்பலமும்

இன்று ஏரிகளும் குளங்களும் வீடுகளாகவும், பேருந்து நிலையங்களாகவும் மாறி வருவதைப் பார்த்து வருத்தப்படுகிறோம்.

ஆனால், 1920களிலேயே மெட்ராஸின் புறநகரில் இருந்த ஒரு பெரிய ஏரி நகராக மாற்றப்பட்டிருக்கிறது!  1923ம் வருடம் ‘டவுன் பிளானிங்’ திட்டத்தில் உருவான அந்த நகரின் பெயர் தியாகராய நகர் எனப்படும் தி.நகர். லாங் டேங்க் என்றழைக்கப்பட்ட அந்த ஏரி, ஒருகாலத்தில் வடக்கே கூவம் நதியையும், தெற்கே அடையாறு நதியையும் இணைத்திருந்தது.

இதை இன்றும் வள்ளுவர் கோட்டத்திலுள்ள ஏரிக்கரை சாலையும், மாம்பலம் ஏரிக்கரை சாலையும் பறைசாற்றி நிற்கின்றன. அப்போது ஏரியைச் சுற்றிலும் விவசாய நிலங்கள்தான்.இந்தப் பகுதி முழுவதும் அன்று மாம்பலம் என்றழைக்கப்பட்டது. இன்று நகரின் மையப் பகுதியாக இருந்தாலும் கூட அன்று மெட்ராஸின் புறநகர்தான் மாம்பலம். இதைத்தான் நகர திட்டத்தில் மனைகளாக மாற்றினர்.

இதனால், ரயில் நிலையத்திற்கு மேற்குப் பக்கமாக இருந்த பகுதி மேற்கு மாம்பலமாகவும், கிழக்குப் பக்கமாக இருந்த பகுதி கிழக்கு மாம்பலமாகவும் மாறிப் போனது. இந்தக் கிழக்கு மாம்பலமே பின்னர் தியாகராய நகராக பெயர் மாற்றப்பட்டது. ஆனால், இன்றும் ரயில்வேயின் பெயர்ப்
பலகை மட்டுமே அந்தப் பழைய மாம்பலத்தை நமக்கு நினைவூட்டுகிறது.

1920ம் வருடம் முதல் முதலாக நடந்த தேர்தலில் வெற்றி பெற்று ெமட்ராஸ் மாகாணத்தில் ஆட்சியைப் பிடித்தது நீதிக்கட்சி. அதன் தலைவர் சர்.பிட்டி.தியாகராய செட்டியாரின் பெயர் இந்நகருக்கு இடப்பட்டது. இந்நகரின் நடுவில் ஒரு பூங்கா வடிவமைக்கப்பட்டது. இந்தப் பூங்காவிற்கு, நீதிக்கட்சியின் தலைவராகவும், மாகாணத்தின் இரண்டாவது முதல்வராகவும் இருந்த பனகல் அரசர் ராமராய நிங்காரை கௌரவப்படுத்தும் வகையில் ‘பனகல் பார்க்’ எனப் பெயர் சூட்டப்பட்டது.