ஆமாம்... இது பலாஸோ சேலை!

ஆண்கள் அலுத்துக்கொள்வதும் சரிதான். பெண்களின் ஃபேஷன் உலகம் மட்டும் எப்படி தினம் தினம் அப்டேட் ஆகிக்கொண்டே இருக்கிறது? பெண்களை அழகு படுத்தும் டிசைனர்களின் ஆர்வமா... இல்லை, பெண்களின் இன்னும் வேண்டும் என்னும் ஆசையா? தெரியவில்லை. புரியவில்லை.அடடே, இதோ அடுத்த டிரெண்ட் வந்தாச்சு!பலாஸோவுடன் அல்லது பேன்ட் உடன் இணைந்த புடவை! இதை பேன்ட் சேலை அல்லது பலாஸோ சேலை என்கிறார்கள்.

சமீபத்தில் டிவி நிகழ்ச்சியில் ‘பார் பார் தேகோ’ படத்தின் புரமோஷன் விழாவில் காத்ரீனா கைஃப் அணிந்து வந்த சிவப்பு நிற பலாஸோ சேலை பலரையும் ஈர்த்தது. இந்த உடை காத்ரீனா போன்ற பெண்களுக்கு மட்டும்தான் அழகாகத் தெரியுமா? எனில் மற்றவர்கள் எப்படி அணிந்தால் அழகாகத் தெரியலாம்..?

கேள்வி எழ பிடித்தோம் டிசைனர் பிரியா ரேகனை. ‘‘நிறைய நடிகைகளும், சின்னத்திரை பிரபலங்களும் இந்த பேன்ட் சேலைகளை கேட்டு வர்றாங்க. காத்ரீனா மட்டுமில்ல... யார் வேண்டுமானாலும் பலாஸோ சேலைகளை அணியலாம்!’’ என எடுத்ததுமே வயிற்றில் பால் வார்க்கிறார் பிரியா ரேகன்!‘‘பேன்ட் புடவை அல்லது பலாஸோ புடவைல ரெண்டு விதமான டிசைன்ஸ் செய்யறோம். ஒண்ணு தனியா டாப், பலாஸோ அல்லது பேன்ட் மேல புடவை.

இன்னொண்ணு பேன்ட் கூடவே இணைஞ்சு வருகிற துப்பட்டா ஸ்டைல் புடவை அல்லது லெஹெங்கா ஸ்டைல் புடவை. பேன்ட் புடவைக்கு ஒல்லியான, ஸ்டிரைட் பேன்ட் அதனுடன் இணைந்த புடவை. இதுக்கு மட்டும் கொஞ்சம் ஒல்லியா இருந்தா கூடுதல் அழகா தெரிவோம். இல்லைனாலும் இதுல இடுப்பு பகுதியை மறைச்சுக்கலாம்.