காந்தியை மிகச்சிறந்த மனிதர் என்றே ஓஷோ மதிப்பிட்டார்.மதவெறியன் ஒருவனால் மகாத்மா மாய்க்கப்பட்டபோது, இளைஞனாக இருந்த ஓஷோ துக்கம் தாளாமல் கதறியதே, காந்தி மீது அவருக்கு இருந்த அன்புக்குச் சான்று.

ஆனால் - காந்தியின் கூட்டுப் பிரார்த்தனை முறைகளெல்லாம் ஓஷோவுக்கு கேலியாகப் பட்டன. தியானம் குறித்து காந்திக்கு எவ்வித புரிதலும் இல்லாமல், எப்படி ஆசிரமம் நடத்தினார், அதில் சீடர்களுக்கு என்ன சொல்லிக் கொடுத்திருப்பார் என்றெல்லாம் ஆச்சரியப்பட்டார்.

ஒரு மதம் சார்ந்த கருத்துகளை மட்டுமே பேசிக் கொண்டிருந்ததால்தான் காந்தியால் இந்து - முஸ்லீம் ஒற்றுமையை ஏற்படுத்த முடியவில்லை என்கிற கருத்து ஓஷோவுக்கு இருந்திருக்கிறது. எனவேதான் காந்தியை இந்துக்களும் சரி, இஸ்லாமியர்களும் சரி... முழுமையாக நம்பவில்லை என்றார்.

வளர்ந்த நாடுகளுக்குத் தான் சோஷலிசம் தேவை, வறுமையிலிருக்கும் இந்தியாவில் சோஷலிசத்தை அமல்படுத்தினால், மக்களிடையே முன்னேற்றம் ஏற்படாது. இந்தியாவில் இன்னும் ஐம்பது ஆண்டுகள் கழித்து, பிரயோகிக்க வேண்டிய பிரம்மாஸ்திரம் சோஷலிசம் என்றார் ஓஷோ.