மிக உயரிய இலக்கிய விருதுகளில் ஒன்றான புலிட்ஸர் பரிசை வென்றிருக்கிறார் அமெரிக்கவாழ் இந்திய டாக்டர் சித்தார்த்தா முகர்ஜி. ‘தி எம்பரர் ஆஃப் ஆல் மெலடிஸ்: எ பயாக்ரபி ஆஃப் கேன்சர்’ என்ற அந்தப் புத்தகம், புற்றுநோய் பற்றிய அனைத்து விஷயங்களையும் சொல்கிறது. ஒரு மனிதனின் வாழ்க்கை வரலாறு போன்ற வடிவத்தில் உள்ள நூல் இது. ‘‘புற்றுநோயை புதிராக நினைக்கும் மக்கள் அந்த அவலத்திலிருந்து மீள வேண்டும். அதுவே எனக்கு நிஜமான பரிசு’’ என்கிறார் முகர்ஜி.

நார்மல்!

‘இந்த ஆண்டு பருவமழை இயல்பான அளவு பெய்யும்’ என்ற மகிழ்ச்சிதரும் செய்தியை அறிவித்திருக்கிறது இந்திய வானிலை ஆராய்ச்சித் துறை. ‘‘வடமாநிலங்களில் தாமதமாக கோடை துவங்கியது ஒன்றுதான் கவலை அளிக்கும் அம்சமாக இருக்கிறது. மற்றபடி இயல்பான அளவு பெய்வதற்கு 98 சதவீத வாய்ப்பு இருக்கிறது’’ என்கிறார் இந்தத் துறையின் இயக்குனர் ஜெனரல் அஜித் தியாகி.



விடுதலை!



பிரிவினைவாதத்தை தூண்டியதாகக் கைது செய்யப்பட்டு ஆயுள் தண்டனை விதிக்கப்பட்ட டாக்டர் பினாயக் சென்னுக்கு உச்ச நீதிமன்றம் ஜாமீன் வழங்கியிருக்கிறது. அவரது வழக்கு கையாளப்பட்ட விதம் குறித்து அதிருப்தியும் தெரிவித்தது உச்ச நீதிமன்றம். மனித உரிமைப் போராளிகளுக்கு கிடைத்த மிகப்பெரிய வெற்றியாக இது இருக்கிறது.





சாதனை!

நீர் மற்றும் நில ஆராய்ச்சிக்கான மூன்று செயற்கைக்கோள்களை கடந்த புதன்கிழமை விண்ணில் நிலைநிறுத்தி சாதனை படைத்திருக்கிறது பிஎஸ்எல்வி&சி16 ராக்கெட். ஸ்ரீஹரி கோட்டாவிலிருந்து ஏவப்பட்ட இது, முற்றிலும் இந்திய விஞ்ஞானிகளால் தயாரிக்கப்பட்டது. இந்த ஆண்டு இஸ்ரோ விண்ணில் செலுத்திய முதல் ராக்கெட் இது.