ரேஸ் கோர்ஸ்

அறிந்த இடம் அறியாத விஷயம்

- பேராச்சி கண்ணன்

எத்தனையோ மனிதர்கள். எத்தனையோ முகபாவங்கள். எத்தனையோ மொழிகளில் உரையாடல்கள். சிலர் லுங்கியுடன் லோக்கலாக. சிலர் பேன்ட், ஷர்ட்டில் டிப்-டாப்பாக. இன்னும் சிலர் கோட், டை சகிதம் லக்சரியாக. சென்னை ரேஸ் கோர்ஸ் மைதானம் விதவிதமான மனிதர்களால் களைகட்டுகிறது. ‘குதிரைப் பந்தயமா? இப்பவும் நடக்குதா?’ ஆச்சரியக் கேள்விக்கு, ‘ஆமாப்பா ஆமாம்’ என்பதே பதில்! கிண்டி ரயில் நிலையத்தின் எதிரில் இருக்கும் மெட்ராஸ் ரேஸ் கோர்ஸினுள் நடக்கிறோம்.

லக்சரி மனிதர்களைத் தவிர மேற்சொன்ன மற்றவர்கள் நுழைவுவாயிலில் ஆங்காங்கே மரத்தடிகளில் அமர்ந்திருக்கிறார்கள். யாரும் சும்மா இல்லை. கையில் மஞ்சள் நிறத்திலான ஒரு புத்தகத்தில் எண்களைக் கிறுக்கியபடியே பரபரப்பாகக் காணப்படுகிறார்கள். எதற்காக இந்தக் கணக்கு? ‘ஜாக்பாட்’ அடிப்பதற்காக! மட்டுமல்ல, எந்தக் குதிரை முதலில் வரும், எது இரண்டாவது இடத்தைப் பிடிக்கும் என்பதை கணித்துச் சொல்வதற்காகவும்தான்.

சீரியஸாக கணக்குப்போட்டுக் கொண்டிருந்த ஒருவரின் அருகில் போய் நின்றோம். நம்மை ஏறெடுத்தும் அவர் பார்க்கவில்லை. கணக்கிலேயே பிஸியாக இருந்தார். ‘‘பொறுங்க தம்பி. தில்லி ரேஸ் நடக்கப் போகுதுல!’’ என்கிறார் சீரியஸ் தொனியில். சென்னை ரேஸ் கோர்ஸில் எப்படி தில்லி ரேஸ்? குழப்புகிறது. கூடார வடிவிலான நீண்ட வளாகம். அதன் நடுவே பெரிய ஸ்கிரீன். பழைய டூரிங் டாக்கீஸ் போல காட்சியளிக்கிறது. அதில், வரிசையாக சேர்களும், பெஞ்சுகளும் போடப்பட்டிருக்கின்றன. எல்லாவற்றிலும் ஆட்கள். பலர் நின்று கொண்டே விளையாட்டில் மும்முரம் காட்டுகின்றனர்.

இதைச்சுற்றிலும் டிக்கெட் கவுண்டர்கள். அதில் நாலைந்து பேர் அமர்ந்திருக்கிறார்கள். அவர்கள் புக்மேக்கர்ஸ் எனப்படு கிறார்கள். ஷார்ட்டாக புக்கீஸ்! ரேஸ் கிளப்பால் சட்டபூர்வமாக அங்கீகரிக்கப்பட்ட இந்த புக்கிகளிடமும் பெட் கட்டி ஆடலாம். அந்தப் பெரிய ஸ்கிரீனில்தான் ஒளிபரப்பாகிறது தில்லி ரேஸ். அதை இங்கிருந்து பார்த்தவாறே பந்தயம் கட்டி விளையாடுகிறார்கள்.

‘எப்படி விளையாடுவது?’ அங்கிருந்த ஒருவரிடம் விசாரித்தோம். ‘‘‘Win, Place, Forecast, Jackpot’ எனக் கேட்டு டிக்கெட் எடுக்கணும். ‘வின்’ என்பது எந்தக் குதிரை முதல்ல வரும்னு கணிச்சு எடுக்குற டிக்கெட். ‘பிளேஸ்’னு சொல்றது ஏழெட்டு குதிரைகளுக்கும் மேல ஓடுற ரேஸ்ல எந்த குதிரை இரண்டாவது இடத்துக்கு வரும்னு கணிக்கிறது. அப்படி கணிக்கிற குதிரை முதலாவதா வந்தாலும் காசுதான்.

ஆனா, ‘Second horse pool’னு ஒரு டிக்கெட் இருக்கு. இதுல ரெண்டாவதா வர்ற குதிரையை மட்டும் சரியா கணிக்கணும். அடுத்து, ஃபோர்காஸ்ட்டும் இதுபோலத்தான். இதுல முதல் இரண்டு இடங்களைப் பிடிக்கிற குதிரைகள் எதுனு துல்லியமா கணிச்சு சொல்லிடணும்.
அப்புறம் ஜாக்பாட். சில ரேஸ்களை மட்டும் ஜாக்பாட் பட்டியல்ல வச்சிருப்பாங்க. உதாரணத்துக்கு பாருங்களேன்...’’ எனத் தன் கையிலுள்ள அந்த புக்கை நம்மிடம் காட்டுகிறார்.

‘‘இதுல, 4, 5, 6, 7, 8 ரேஸ்கள்தான் ஜாக்பாட்னு போட்டிருக்காங்க. குதிரை மற்றும் ஜாக்கி பெயர்கள், குதிரை வெயிட், இதுக்கு முன்னாடி போட்டிகள்ல அது எப்படி ஃபினிஷிங் பண்ணியிருக்கு, அதன் ஓனர் யார்... எல்லாமே விவரமா இந்த புக்ல இருக்கும். இதை வச்சு கணக்குப்போட்டு எந்த குதிரை வரலாம்னு கணிப்போம். ஜாக்பாட்டை பொறுத்தவரை குறிப்பிட்ட அந்த அஞ்சு ரேஸ்கள்லயும் எந்த குதிரை முதல் இடத்துல வரும்னு கணிச்சு டிக்கெட் எடுக்கணும். கரெக்ட்டா சொல்றவங்களுக்கு பணம் போய்ச் சேரும்.
 
ஒரு ரேஸ்ல கணிக்கிறதே கஷ்டம். அஞ்சு ரேஸ்ன்னா பார்த்துக்கோங்க. ஆனாலும், கணிச்சு சொல்லி பணம் ஜெயிப்பாங்க. இந்தப் பணத்துல அரசுக்கான வரி, கிளப் கமிஷன் போக மீதித் தொகை கிடைக்கும்!’’ என்றவர், வேகமாக ரேஸ் நடக்கும் இடத்துக்குப் பாய்ந்தார். நாம் ரேஸ் கோர்ஸின் உறுப்பினர்களுக்கான வாயிலுக்குள் நுழைந்தோம்.

இங்கேயும் பெரிய ஸ்கிரீனில் லைவ் ரேஸ் ஓடிக்கொண்டே இருக்கிறது. கிளப் உறுப்பினர்களின் பந்தயம் தூள் பறக்கிறது. இதனுடன் மெட்ராஸ் ரேஸ் கிளப்பின் பந்தயமும் மைதானத்தில் நடக்கிறது. ‘‘கமான், கமான், கமான்...’’ எனக் குரல் வரும் திசை நோக்கி நகர்ந்தோம். அந்தப் புல்வெளி மைதானத்தில் பத்து பனிரெண்டு குதிரைகள் பாய்ந்து வருகின்றன. குதிரைகள் எல்லையைத் தொடும் வரை கைதட்டலும், கூச்சலும் ஓயவில்லை.

பிறகு, சட்டென அடங்கி விடுகிறது சத்தம். டிக்கெட்டைப் பார்த்து பணம் பெற ஓடுகிறார்கள் சிலர். வின்னரா, பிளேஸா, ஃபோர்காஸ்ட்டா என்பது தெரியவில்லை. தொடர்ந்து ரேஸ் கிளப்பின் பழைய கட்டிடத்தின் முன் வந்து சேர்ந்தோம். அங்கிருந்த புல்வெளியில் அடுத்த ரேஸ்க்கான குதிரைகள் வலம் வருவதைப் பார்த்தோம். ஜாக்கிகள் குதிரையின்மீது அமர்ந்து கொள்கிறார்கள். குதிரைகளைப் பராமரிக்கும் பையன்கள் அத்தனை அழகாக குதிரைகளை இழுத்து வருகிறார்கள்.

‘‘ஒவ்வொரு ரேஸ் ஆரம்பிப்பதற்கு முன்பும் இந்த நிகழ்வு நடக்கும். இந்தப் பக்கம் உறுப்பினர்களும், அந்தப் பக்கம் பொதுமக்களும் பந்தயம் கட்டியிருக்கிற தங்கள் ஆஸ்தான குதிரைகளையும், ஜாக்கிகளையும் பார்க்க இப்படியொரு ஏற்பாடு...’’ என்றார் அங்கிருந்த ஒருவர். இந்த cat walkகுக்குப் பிறகே, குதிரைகள் மைதானத்திற்குள் வருகின்றன.

ரேஸ் கிளப்பின் அனுமதியுடன் ரேஸ் தொடங்கும் இடத்திற்குப் பயணித்தோம். மைதானத்தின் அந்தப்பக்கமாக இருக்கிறது ஸ்டார்ட்டிங் பாயின்ட். தூரத்தைப் பொறுத்து இந்த ஆரம்பப்புள்ளி மாறுபடும். இரண்டு ஆம்புலன்ஸ்களில் மருத்துவக் குழுக்கள், ரேஸ் கிளப்பின் செயலாளர் டாக்டர் கார்த்திகேயன் தலைமையில் ஒரு கண்காணிப்புக் குழு, பயிற்சியாளர்கள் அல்லது உரிமையாளர்கள் கொண்ட ஒரு வண்டி ஆகியவையும் ஸ்டார்ட்டிங் ஏரியாவிற்குள் வந்து விடுகின்றன. இந்த நான்கு வண்டிகளும் ஓடும் குதிரைகளுடன் பாதுகாப்பிற்காக அருகிலுள்ள தார் சாலையில் பயணிக்கின்றன.

‘‘ஒரு ஆம்புலன்ஸ் கிளப்புக்கு சொந்தமானது. இன்னொன்று தனியார் மருத்துவமனைக்கானது. ஏதாவது அசம்பாவிதம் நடந்ததுன்னா ஒரு ஆம்புலன்ஸ் நின்னு மருத்துவம் பார்க்கும். இன்னொண்ணு ரேஸ் கூடவே போகும். கண்காணிப்புக் குழு, ரேஸின் விதிகளைச் சரியா பாலோ பண்றாங்களானு பார்த்திட்டே வரும். இதுல தவறு நடந்தா குறிப்பிட்ட அந்தக் குதிரையை நிராகரிச்சிடுவோம்.

அதேமாதிரி, ஒவ்வொரு போட்டிக்கு முன்னாடியும் பின்னாடியும் குதிரையை ஓட்டுற ஜாக்கி களுக்கு எடையை செக் பண்ணுவோம். ஏன்னா, ஜாக்கியோட எடைதான் குதிரையின் வேகத்தைத் தீர்மானிக்கும். இதனால போட்டியின் முடிவு மாறலாம். இதுல எந்த தவறும் நடக்கக்கூடாதுனு இந்த செக்அப். அப்புறம், ஸ்பாட்லயே குதிரைக்கும் டோப் டெஸ்ட் முடிச்சிடுவோம்...’’ என்கிறார் நம்மோடு வந்த ஒருவர்வரிசையாக நம்பர்கள் இடப்பட்ட ஹைட்ராலிக் பாக்ஸினுள் குதிரையைக் கொண்டு வந்து நிறுத்துகிறார்கள்.

சில குதிரைகள் இதற்குள் வருவதற்கு முரண்டு பிடிக்கின்றன. அவற்றின் கண்களில் துணிகளைப் போட்டு உள்ளே நிறுத்துகின்றனர். இந்த பாக்ஸிற்குள் குதிரை வருவதற்கு தனிப் பயிற்சியே இருக்கிறதாம். அந்தப் பயிற்சி முடித்ததும், ‘ஸ்டார்ட்டிங் ஸ்டால் சர்ட்டிபிகேட்’ என்கிற சான்றிதழை, போட்டியைத் தொடங்கி வைக்கும் ஸ்டார்ட்டரிடம் பெற வேண்டும். அப்படியான குதிரைகள் மட்டுமே போட்டிக்கு அனுமதிக்கப்படுகின்றன. இதில், நீண்ட நேரம் முரண்டு பிடிக்கும் குதிரைகள் நிராகரிக்கப்பட்டுவிடும். சில நொடிகளில் பச்சைக் கொடி காட்டியதும் ஹைட்ராலிக் பாக்ஸ் திறக்க, சீறிப் பாய்கின்றன குதிரைகள்.