முத்துக்கள் முப்பது-மகத்தான வாழ்வு தரும் மாசி மக நீராட்டம்

ஒவ்வொரு தமிழ் மாதத்தின் அமாவாசையும், பௌர்ணமியும் வழிபாட்டுக்கும், விரதத்திற்கும், கோயில் உற்சவங்களுக்கும் உகந்த நாட்களாக இருக்கின்றன. அந்த வகையில், மாசி மாதம் பௌர்ணமியை ஒட்டி, மக நட்சத்திரத்தில் நடைபெறும் நீராட்டம், ‘‘மாசி மகம்’’ என்று அழைக்கப்படுகிறது. மாசி மகத்தின் பல்வேறு சிறப்புகளை முப்பது முத்துக்களாகக் காண்போம்.

1. சூரியனும் சந்திரனும்

நம்முடைய வாழ்வுக்கு மிக முக்கியமான இரண்டு விஷயங்கள் சூரியனும் சந்திரனும். ஆண்டாள், பகவானை “சூரிய சந்திர இணைப்பாகக் காண்கிறாள். “கதிர் மதியம் போல் முகத்தான்” என்று வர்ணிக்கிறாள். மற்ற கிரகங்களைப் பற்றி சாத்திரத்தில் சொல்லப்பட்டிருந்தாலும், அவைகள் பிரதானமானவை அல்ல. ஒரு நாளின் இரண்டு அங்கங்கள் பகலும் இரவும். பகல்நேர ஒளிக்குச்சூரியனும், இரவு நேர ஒளிக்குச்சந்திரனும் பொறுப்பு ஏற்றுக் கொள்கின்றன.

பகல் நேரத்தில் சூரியன் நேரடியாகவே தன்னுடைய ஒளியை பூமிக்கு வழங்குகிறான். இரவு நேரத்தில் சந்திரன் மூலமாகச்சூரியன் பூமிக்கு ஒளியை வழங்குகின்றான். எனவே இந்த இரண்டும் மிக முக்கியமானவை. பெரும்பாலான உற்சவங்களையும் விழாக்களையும் தீர்மானிப்பவை சூரிய சந்திரநதிகள்தான். மாசி மகமும் சூரிய சந்திரனின் அமைப்பை ஒட்டித்தான்தீர்மானிக்கப்படுகிறது.

2. கும்ப மாதம்

மாதங்களைக் கணக்கிடும் பொழுது, சூரியனின் கதியை ஒட்டி, மாதங்களின் பெயர்களை நிர்ணயித்திருக்கிறார்கள். இதை சௌரமான முறை என்று சொல்வார்கள். வான மண்டலத்தை 360 பாகைகளாகப் பிரித்து, ராசி மண்டலமாகப் பிரித்து வைத்திருக்கிறார்கள். (கற்பனைக்கோடுகள்தான்) ராசி மண்டலத்தை 12 பாகங்களாகப் பிரித்து, தோராயமாக முப்பது பாகைக்கு ஒரு ராசி என்று, “மேஷம் முதல் மீனம்” வரை 12 ராசிகளாகப் பெயர்சூட்டி வைத்திருக்கிறார்கள். ராசியின் பின்னணியில் நட்சத்திர மண்டலங்களும் இருக்கின்றன. இதில் முதல் ராசியான மேஷ ராசியின் முதல் நட்சத்திரமான அஸ்வினி நட்சத்திரத்தில் சூரியன் பிரவேசிக்கும் காலம் சித்திரைமாதத் தொடக்கம்.

அப்படியே வைகாசி, ஆனி, ஆடி என்று 12 மாதங்களைச் சொல்கிறோம். இந்த அடிப் படையில் சூரியன், தன்னுடைய 300-வது பாகையில் இருந்து 330-வது பாகை வரை செல்லும் காலம் கும்பமாதம் அல்லது மாசிமாதம் என்று வழங்கப்படுகிறது.

3. அமாவாசையும், பௌர்ணமியும்

மாசி மாதத்தில் சூரிய சந்திர சேர்க்கையை ஒட்டி இரண்டு பெரிய திருவிழாக்கள் நிர்ணயிக்கப்பட்டு இருக்கின்றன. சூரிய சந்திர சேர்க்கை என்பது அமாவாசை பௌர்ணமி என்று இரண்டு நிலைகளில் வரும். சூரியனும் சந்திரனும் ஒரே ராசியில் ஒரே நட்சத்திரத்தில் இணையும் காலம் அமாவாசை என்றும், சூரியன் இருக்கும் ராசிக்கு நேர் எதிர் ராசியில் இருந்து கொண்டு சூரியனும் சந்திரனும் ஒருவரை ஒருவர் பார்த்துக் கொள்ளும் காலம் பௌர்ணமி என்றும் அழைக்கப் படுகிறது. மாசி மாதம் அமாவாசையை ஒட்டி சிவராத்திரிப் பெருநாளும், பௌர்ணமியை ஒட்டி மாசி மகமும் கொண்டாடப்படுகிறது.

4. பௌர்ணமியா? மக நட்சத்திரமா?

மாசி மகத்திருவிழாவின்போது, கும்ப ராசியில் சூரியனும், நேர் எதிர் ராசியான சிம்ம ராசியில் சந்திரனும் இருப்பார்கள். சிம்ம ராசியில் மகம், பூரம், உத்திரம் என்று மூன்று நட்சத்திரங்கள் உண்டு. மக நட்சத்திரம் கேதுவுக்கு உரிய நட்சத்திரம். பூர நட்சத்திரம், சுக்கிரனுக்கு உரிய நட்சத்திரம். உத்திர நட்சத்திரம், சூரியனுக்கு உரிய நட்சத்திரம்.

இதில் மக நட்சத்திரத்தின் நாலு பாதங்களும், பூர நட்சத்திரத்தின் நான்கு பாதங்களும், சூரியனுக்குரிய சிம்ம ராசியில் இருக்கும். சிம்ம ராசியில் சந்திரன் பிரவேசித்து, சூரியனைப் பார்க்கும் காலம் பௌர்ணமி. அந்த பௌர்ணமி சில நேரங்களில் மக நட்சத்திரத்திலேயே வரும். சில நேரங்களில் பௌர்ணமிக்கு அடுத்த நாளில் மக நட்சத்திரம் வரலாம்.

சில கோயில்களில், பௌர்ணமியை முக்கியமாகக் கருதி தீர்த்தவாரியை வைத்துக்கொள்வார்கள். சில கோயில்களில் மக நட்சத்திரம் இருக்கும் நாளை தீர்த்தவாரிக்குத் தேர்ந்தெடுப்பார்கள்.

5. ‘‘மாசி மகம்” பெயர்க்காரணம்

சூரிய கதிமுறையில், அதாவது சௌரமான முறையில், கும்ப ராசியில் சூரியன் பிரவேசிக்கும் காலம் மாசி மாதம் என்று வழங்கப்படுகிறது. சாந்திரமான முறையில், அதாவது சந்திரகதியைக் கொண்டு, மாதங்களை நிர்ணயிக்கும் முறையில், மாசிமாதத்திற்கு “மாக மாதம்” என்று பெயர். பெரும்பாலும், பௌர்ணமியில் என்ன நட்சத்திரம் வருகிறதோ, அந்த நட்சத்திரத்தை ஒட்டி, மாதங்களின் பெயர்கள் சூட்டப்படுவதுண்டு.

சித்திரை நட்சத்திரத்தில் பௌர்ணமி வருவதால், சித்திரை மாதம் என்றும், விசாக நட்சத்திரத்தை ஒட்டி பௌர்ணமி வருகின்ற பொழுது வைகாசி மாதம் என்றும், திருவோண நட்சத்திரத்தை ஒட்டி பௌர்ணமி வருவதால் ஸ்ரவணமாதம் அல்லது ஆவணி மாதம் என்றும் பெயர் சூட்டுவது போல, மக நட்சத்திரத்தில் பௌர்ணமி வருவதால் அந்த மாதத்தை மாக மாதம் என்று பெயர் சூட்டி அழைத்தனர்.

சாந்திரமான மாசத்துள் பதினொன்றாவது மாதம் என்று சேது புராணத்தில் உள்ளது. மாகம் என்பது பின் மகமாகியது. இந்த மாதத்தில் நீராடி அகத்தூய்மையும் புறத் தூய்மையும் பெற வேண்டும் என்பதால் மாசி மக நீராட்டத்தை சிறப்பாகச் சொன்னார்கள்.

6. மாசி மகமும், மஹாமகமும்

குரு பகவான் ஒவ்வொரு ராசியிலும் ஒவ்வொரு வருடம் இருப்பார். இப்பொழுது அவர் மீன ராசியில் தன்னுடைய ஆட்சி வீட்டில் இருக்கிறார். இவர் சிம்ம ராசியில், மக நட்சத்திரத்தில், சந்திரனோடு இணைந்து சூரியனைப் பார்க்கும் காலம் `மகா மகம்’ என்று கொண்டாடப்படுகிறது. இது 12 ஆண்டுகளுக்கு ஒரு முறை நிகழும் திருவிழாவாகும்.

புனித நதிகளான கங்கை, யமுனை, கோதாவரி, சரஸ்வதி, நர்மதை, சிந்து, காவேரி, சரயு, தாமிரபரணி ஆகிய 9 நதிகளும், பிறர் பாவங்களைப் பெற்றுக் கொண்டதால் வந்த, தங்கள் பாவங்களை, இந்த நாளில் போக்கிக் கொள்வதால், மகாமக நீராட்டம் என்பது புனிதத்திலும் புனிதமாகக் கருதப்படுகிறது. இந்த ஒன்பது நதிகளும் தங்கள் பாவங்களைப் போக்கிக் கொண்ட ஊர் கும்பகோணம்.

போக்கிக் கொண்ட தீர்த்தம் மகாமக குளம் அல்லது மகாமக தீர்த்தம் என்று வழங்கப்படுகிறது. கடைசியாக மகாமகம் நடைபெற்ற ஆண்டு 2016. அடுத்த மகாமகம் ஐந்து வருடங்கள் கழித்து, 2028-ல் நடைபெற உள்ளது.

7. பஞ்சபூதங்களும், மாசி மகமும்

மாசி மகத்திற்கும் பஞ்சபூதத்திற்கும் தொடர்பு உண்டு. மாசி என்பது கும்ப ராசியைக் குறிக்கும். கும்ப ராசி காற்று ராசி. சிம்ம ராசியில் சந்திரன் இருக்கும் காலம்தான் மாசிமகம் நடைபெறுகிறது. சந்திரன் நீர் தத்துவத்தைக் குறிக்கும் கிரகம். சந்திரன் இருக்கும் சிம்ம ராசி நெருப்பு ராசி. மாசி மகம் இந்த பூமியில்தான் நடைபெறுகின்றது எனும் பொழுது பூமியாகிய மண் தத்துவம் வந்துவிடுகிறது. இந்த பூமிக்கு மேல்தான் ஆகாயம் இருக்கிறது என்பதால் ஆகாய தத்துவமும் வந்துவிடுகிறது.

இந்த பூமியின் மேல், ஆகாயத்திற்கு கீழ் நாம் உயிரோடு இருக்க காற்று அவசியம் (கும்ப ராசி); நீர் அவசியம் (சந்திரன்); நெருப்பு அதாவது உஷ்ணம் அவசியம் (சிம்ம ராசியும், சூரியனும்); இத்தனைத் தொடர்புகளும் மாசி மக தீர்த்த வாரியில் கிடைத்துவிடுகிறது.

8. நீராட்டம் ஏன் அவசியம்?

ஆண்டாள் நாச்சியார் ஒரு பாசுரத்திலே வழிபாடு எப்படி அமைய வேண்டும் என்பதை விவரித்துப் பாடியிருக்கிறார். “தூயோமாய் வந்து, தூ மலர் தூவித் தொழுது, வாயினால் பாடி, மனத்தினால் சிந்திக்க, போயப் பிழையும் புகுதருவான் நின்றனவும், தீயினில் தூசாகும் செப்பு” என்பது பாசுரம். வழிபாட்டுக்கு முக்கியம் தூய்மை. தூய்மைக்கு முக்கியம் நீராடுதல். இந்த நீராடுதல் இரண்டு வகைப்படும். ஒன்று அகநீராட்டம். இன்னொன்று புறநீராட்டம். புறத்தூய்மை தண்ணீரில் குளிப்பதால் உண்டாகும்.

அகத்தூய்மை, உண்மையைப்பேசுவதாலும், நல்ல வார்த்தைகளைப் பேசுவதாலும், நல்ல சிந்தனையை வளர்த்துக் கொள்வதாலும், இறைவழிபாட்டின் மூலமும் உண்டாகும்.
இதை வள்ளுவரும்,
புறத்தூய்மை நீரால் அமையும்
அகத்தூய்மை
வாய்மையால் காணப் படும்
 - என்றார்.

அகம், புறம் தூய்மையாகிவிட்டால்,நம்முடைய பாவங்கள் தீயினில் பட்ட தூசாக மாறிவிடும். இந்த அகத்தூய்மையும் புறத்தூய்மையும் பெறுவதற்காகத்தான் மாசிமகத்திலே நீராடி பகவானை வணங்குகின்றோம்.

9. பூர்வ புண்ணிய பலன்களைத் தரும்

பழங்காலம் தொட்டு மக்கள் இயற்கையோடு இணைந்த வாழ்வின் ஒரு பகுதியாக மாசி மகத் திருவிழாவை நடத்திவந்தனர். மாசிக் கடலாடுதல் என்று இந்த விழாவிற்கு பெயர். கடலும், நீர்நிலைகளும் இந்த புனித நாள்களில் சற்று மாறுபட்டே இருக்கும். எல்லா பௌர்ணமி நாள்களிலும் கடலில் நீராடலாம் என்றாலும், மாசி மகத்திலே நீராடுவது மிகவும் சிறப்பு. ஆயிரக்
கணக்கான மக்கள் அன்று இறைவழிபாடு செய்து நீராடுவதால், மாபெரும் கூட்டு வழிபாட்டின் சக்தியும் அன்றைக்குக் கிடைத்துவிடுகிறது.

மாசி மகத்தன்று நீராடுவதால் ஆபத்துக்கள் போகும். பாவங்கள் கழியும். புண்ணியங்கள் சேரும். காரணம், மக நட்சத்திரம் உள்ள ராசி சிம்ம ராசி. கால புருஷனுக்கு ஐந்தாவது ராசி, புண்ணியங்களைத் தரும். எனவே மக நட்சத்திரம் உள்ள பூர்வ புண்ணிய ராசியில் சந்திரன் இருக்க, கும்ப ராசியில் சூரியன் இருக்க, மாசி மகத்தில் நீராடுவது மகத்தான பூர்வ புண்ணிய பலன்களைத் தரும்.

10. நீர் நிறைந்த குடம்

கும்பமாதமாகிய மாசி மாதத்தில் மகாமகம் வருகிறது. கும்ப ராசி ஒரு கும்பத்தில் அல்லது குடத்தில் நீர் நிறைந்து இருப்பதைக் குறிக்கும் ராசி. நீர் நிறைந்த குடம் அதன் அடையாளம். அண்டம் ஒரு குடம். பிண்டம் ஒரு குடம். குடம் என்பது இந்த சரீரத்தைக் குறிக்கும், நம்முடைய சரீரத்தின் பெரும் பகுதி நீர்தான். சித்தர் பாடல்களில், இந்த உடம்பு நீர் நிறைந்த குடமாக வர்ணிக்கப்படுகிறது.

நந்தவனத்தில் ஒரு ஆண்டி - அவன்
நாலாறு மாதமாய் குயவனை வேண்டி
கொண்டு வந்தான் ஒரு தோண்டி - அதை
கூத்தாடி கூத்தாடிப் போட்டு உடைத்தாண்டி
நீர் நிறைந்த குடத்தைக் குறிக்கும் கும்பமாதமாகிய மாசி மாதத்தில், நீர் நிறைந்த இந்த சரீர குடத்தை தூய்மையாக்கி நிலைநிறுத்தவே, மாசி நீராட்டம் அமைந்திருக்கிறது.

11. மாசி மகத்தின் நோக்கம்

அடுத்து, கும்ப ராசி என்பதை காற்று ராசி என்று பார்த்தோம். காற்று எங்கே இருக்கிறதோ, நீர் எங்கே இருக்கிறதோ, அந்த இடத்திலே உயிரினங்கள் வாழும். இந்த பிரபஞ்சத்தில் எத்தனையோ நட்சத்திர மண்டலங்கள் உண்டு. எத்தனையோ கிரகங்கள் உண்டு. ஆனால் உயிர் வாழத் தகுதியான, நீரும் காற்றும் உள்ள ஒரே இடம் பூமிதான்.

இந்த காற்று இருக்கும் வரை உயிர் இருக்கும். “காற்றுள்ள போதே தூற்றிக்கொள்” என்ற பழமொழி உண்டு. அதனால், காற்று ராசியில் சூரியன் பிரவேசிக்கும் மாசிமாதத்தில் நாம் நீராடி இறைவனை வணங்கி ஆன்மப்பலனை அடைய வேண்டும் என்பதுதான் மாசி மகத்தின் நோக்கம்.

12. காற்றுள்ள போதே தூற்றிக்கொள்