‘‘ஒரு புதுமுக இயக்குநருக்கு இவ்வளவு பெரிய வாய்ப்பு கிடைக்குமா என்று தெரியவில்லை. ஆனால் என் விஷயத்தில் அந்த அதிசயம் நடந்தது. நான் இயக்கிய ‘டீக்கடை பெஞ்ச், ‘என் காதலி சீன் போடுறா’, ‘என்னை சுடும் பனி’  படங்கள் மூலம் கே.பாக்யராஜ், ராமகிருஷ்ணன், டி.பி.கஜேந்திரன், சிங்கம்புலி மனோபாலா, சித்ரா லட்சு மணன் ஆகிய ஆறு இயக்குநர்களுடன் பணிபுரிய முடிந்தது.

இயக்குநரான சில நாட்களிலேயே சினிமா ஜாம்பவான்களுடன் வேலை செய்த அனுபவம் மறக்க முடியாதது’’ என்கிறார் இயக்குநர் ராம்ஷேவா. ஏவி.எம்.மில் டப்பிங் பணியில் பிஸியாக இருந்தவரிடம் பேசினோம்.

“நானே எதிர்பார்க்காத வகையில் நல்ல ரிசல்ட் கிடைத்துள்ளது. என்னுடைய முதல் படமான ‘டீக்கடை பெஞ்ச்’ இன்னும் வெளிவரவில்லை. இரண்டாவதாக ஆரம்பித்த ‘என் காதலி சீன் போடுறா’ வெளியானதோடு படத்துக்கு நல்ல வரவேற்பும் கிடைத்துள்ளது.

வெற்றிகரமாக மூன்று வாரங்களாக படம் ஓடிக்கொண்டிருக்கிறது. இந்தப் படம் வெளிவந்ததன் மூலம் ஒரு இயக்குநராக அங்கீகரிக்கப்பட்டுள்ளேன். ரசிகர்கள் பாராட்டை மறக்க முடியாது. படம் பார்த்தவர்கள் குடும்பத்துடன் பார்க்கலாம் என்றார்கள். சினிமா உலகத்திலிருந்தும் நிறையப் பேர் பாராட்டினார்கள்.”

‘என் காதலி சீன் போடுறா’ படத்தை 23 நாட்களிலும் ‘என்னை சுடும் பனி’ படத்தை 25 நாட்களிலும் முடித்தேன். ஆர்ட்டிஸ்ட்களிடம் குறைந்த தேதிகள் வாங்கி டபுள் கால்ஷீட்டில் படப்பிடிப்பை முடித்துவிடுவேன்.

பாடல் காட்சிகள், சண்டைக் காட்சிகளை அதிகபட்சமாக இரண்டு நாட்களில் எடுத்து முடித்துவிடுவேன். என்னுடைய படங்களில் ஹீரோ, ஹீரோயின் மட்டும்தான்  புதுமுகங்கள். மற்ற நடிகர்கள் அனைவரும் புகழ்பெற்றவர்கள். அப்படி இருந்தாலும் வேகமாக படத்தை முடித்துவிடுவேன்.”

“என்னுடைய நண்பர்கள் நிறையப் பேர் நடிக்க கூப்பிடுகிறார்கள். நடிக்கும் ஐடியா இல்லை.  இயக்குநராக வேண்டும் என்ற கனவில்தான் சென்னைக்கு வந்தேன். ‘கண்ணெதிரே தோன்றினாள்’ ரவிச்சந்திரனின் மாணவன் நான். குறுகிய காலத்தில் மூன்று படங்களை இயக்கி முடித்துள்ளேன்.

தொடர்ந்து டைரக்‌ஷன் பண்ணுவதுதான் என்னுடைய லட்சியம். பெரிய நடிகர்களை வைத்து படம் பண்ணும் ஆசை எல்லா இயக்குநர்களுக்கும் இருக்கும். எனக்கும் அப்படிப்பட்ட ஆசை இருக்கிறது. தொடர்ந்து நான் பண்ணுகிற படங்கள் மூலம் பெரிய நடிகர்களின் கவனத்தை ஈர்க்கமுடியும் என்ற நம்பிக்கை இருக்கிறது.”