நான் நடித்த முதல் படமான ‘முந்தானை முடிச்சு’ படமே எனக்கு மிகப்பெரிய திருப்புமுனையாக அமைந்தது. அப்போது எனக்கு திருமணம்  ஆகவில்லை. லாட்ஜில் தங்கி சினிமா வாய்ப்பு தேடிக் கொண்டிருந்தேன்.

பாக்யராஜ் சாருக்கு பிரவீணாவுடன் திருமணம் நடந்திருந்தது. பிரவீணா எனக்கு திருமணத்துக்கு முன்பே நல்ல நண்பர். அதன் அடிப்படையில் லாட்ஜுக்கு போன் பண்ணி ‘முந்தானை முடிச்சு’ படத்துக்கு ஆடிஷன் நடப்பதாக சொல்லி ராஜாவை (பாக்யராஜ் சாரை அப்படித்தான் அழைப்பார்கள்) போய் பாருங்கள் என்றார்.

பாக்யராஜ் சாரும் ‘நல்ல கேரக்டர் இருந்தால் தகவல் கொடுக்கிறேன்’ என்றார். அதற்கு முன், பாக்யராஜ் சார் இயக்கத்தில் ‘தூறல் நின்னுப் போச்சு’ படத்தில் நம்பியார் நடித்த ரோலில் நான்தான் நடிப்பதாக இருந்தது. அந்தக் கேரக்டரில் நம்பியார் சாமி நடித்தால் நல்லா இருக்கும் என்று பாக்யராஜ் சார் ஃபீல் பண்ணியதால் நடிக்கமுடியவில்லை.

அதன்படி ‘முந்தானை  முடிச்சு’ ஆரம்பித்ததும் வாய்ப்பு தருவதாக உறுதி அளித்திருந்தார். ஆடிஷனுக்காக ஏவி.எம்.மில் கூட்டம் அலைமோதியது. ஒரு உதவியாளரிடம் ‘வைத்தியர் கேரக்டரை அண்ணனுக்கு கொடுத்துடுங்க’ என்று பாக்யராஜ் சொன்னதும் நான் அடைந்த மகிழ்ச்சிக்கு அளவே இல்லை.