ஒல்லியான உடம்பு. சுருள் சுருளான தலைமுடி. துறுதுறு பார்வை. ஐரோப்பிய தோற்றம். இப்படியான தோற்றத்தோடு ஒரு நடிகையைப் பார்த்த நினைவிருக்கிறதா?கங்கணா ரனாவத்தென்று சட்டென்று சொல்வீர்கள்.

இன்னும் கொஞ்சம் யோசியுங்கள்.ருக்மணி விஜயகுமாரை நினைவு வருகிறதா? யெஸ். அவரேதான்.பாரதிராஜா இந்தி மற்றும் தமிழில் இயக்கிய ‘பொம்மலாட்டம்’ படத்தின் நாயகி.பூர்வீகம் தமிழ்நாடு, பிறந்து வளர்ந்தது பெங்களூரு. இப்போது இருப்பது ஹைதராபாத். நியூயார்க் ஃபிலிம் அகாடமியில் நடிப்பு பயின்றவர்.

‘பொம்மலாட்டம்’ வெளிவந்த பிறகு ஆனந்த தாண்டவம் படத்தில் நடித்தார். இதிலும் நடனக் கலைஞராகத்தான் நடித்தார். அதன் பிறகு வாய்ப்புகள் எதுவும் தமிழில் இல்லை. நீண்ட இடைவெளிக்குப் பிறகு ‘கோச்சடையான்’ அனிமேஷன் படத்தில் சிறிய கேரக்டரில் நடித்தார். அதுவும் பெரிதாக பேசப்படவில்லை.

ஒரு வேளை ‘பொம்மலாட்டம்’ படம் இந்தியில் வெளிவந்திருந்தால் காலத்தின் கணக்கு  வேறாகக்கூட இருந்திருக்கலாம்.இடையில் கன்னடத்திலும் முயற்சித்துப் பார்த்தார். சிவராஜ்குமார் நடித்த ‘பஜ்ரங்கி’யில் அவரது நடிப்பு வெகுவாக பேசப்பட்டது. இருந்தும், அங்கும் அடுத்தடுத்து வாய்ப்புகள் அமையவில்லை.