தேவதை என்பது நல்ல குணங்களைக் கொண்ட மனிதர்களுக்கான பொது அடையாளம். அந்த வகையில் தேவதை என்கிற பதம் ஆண்களுக்கும் பொருந்தும். பாலினத்தை வைத்து தேவதையைப் பிரித்துப் பார்க்கமுடியாது.

எல்லாருக்கும் அவர்களுடைய அப்பா, அம்மாதான் முதல் தேவதைகள். அப்பா இப்போது உயிரோடு இல்லைன்னாலும் தேவதையாக இருந்து என்னை ஆசீர்வதித்துக் கொண்டிருக்கிறார். எனக்கு ஓர் அக்கா, ஒரு தம்பி. ஆனால் வீட்டுக்கு நான்தான் செல்லப் பிள்ளை. அப்பா என்னை ஒரு பையன் மாதிரிதான் வளர்த்தார்.

வாழ்க்கைக்கு இன்றியமையாத வேலைகள், பழக்க வழக்கங்கள் என்று எல்லாத்தையும் சொல்லிக் கொடுத்ததோடு இல்லாமல் அதில் பயிற்சியையும் கொடுத்தார். நான்காம் வகுப்பு படிக்கும்போதே என்னுடைய உடைகளை நானே துவைக்க ஆரம்பித்துவிட்டேன். அதுக்குக் காரணம் அப்பாவின் ட்ரைனிங்.

சின்ன வயதிலிருந்தே அப்பா எனக்கு தைரியத்தை மட்டும் ஊட்டி வளர்க்காமல் எல்லா விஷயங்களிலும் யாரையும் சார்ந்து வாழாமல் சொந்தக் காலில் நிற்பதற்கான பயிற்சியையும்  கொடுத்தார். தானாக வளரும் மரம் ஸ்ட்ராங்காக இருக்கும் என்று அப்பா அடிக்கடி சொல்வார். அப்படித்தான் என்னை சுயமாக பல வேலைகளைச் செய்ய ஊக்கம் கொடுப்பார்.

இது ஆம்பள செய்ற வேலை, இது பெண் செய்ற வேலை என்று பிரித்துப் பார்க்காமல் எல்லாருக்கும் எல்லா வேலையும் தெரிந்திருக்கணும் என்று சொல்லி சொல்லித்தான் எங்களை  வளர்த்தார். அந்த வகையில் சமைப்பது, துவைப்பது என்று வீட்டு வேலைகள் அனைத்தும் எனக்கு அத்துப்படி.

அடுத்த ஆண் தேவதை சமுத்திரக்கனி. படப்பிடிப்பில் கிடைக்கும் கொஞ்ச நேரத்தையும் வீணாக்கமாட்டார். டயலாக் எழுதுவார். ஷூட்டிங் முடிந்து ரிக்கார்டிங் என்று பிஸியாக இருப்பார். தேனீ போல் எப்போதும் தன்னை பிஸியாக வைத்திருப்பார். இது எல்லாரும் அவரிடைம் கற்றுக் கொள்ள வேண்டிய விஷயம்.

தொழில் சார்ந்து மட்டுமில்ல, சமூகம் மீதும் அக்கறை உள்ளவர். எல்லாத்தையும் நேர்த்தியா கையாள்வார். ஆண் தேவதை இயக்குநர் தாமிராவும் அன்புக்குரிய ஆண் தேவதைதான். முற்போக்குச் சிந்தனையாளர்.இந்த சமூகம் பெண்களை தேவதையாகப் பார்க்கிறது. ஆண்களையும் தேவதையாகப் பார்க்க வேண்டும்.