விஜய்னாலே வெற்றிதான்!

தெலுங்குதேச இளம்பெண்கள் இவருக்கும்தான் இப்போது ஹாட்டின் பறக்க விட்டுக் கொண்டிருக்கிறார்கள். ‘நோட்டா’ மூலமாக தமிழிலும் படையெடுப்பு நடத்தியிருக்கிறார் இளம் ஹீரோ விஜய் தேவரகொண்டா. இவரது அப்பா ஒரு தியேட்டர் ஆர்ட்டிஸ்ட் என்பதால் நடிப்பு ரத்தத்திலேயே ஊறியிருக்கிறது.

ஏழு ஆண்டுகளுக்கு முன்பே சினிமாவுக்கு வந்துவிட்டாலும், கடந்த இரண்டே ஆண்டுகளில் ‘பெல்லி சூப்புலு’, ‘அர்ஜுன் ரெட்டி’, ‘கீதா கோவிந்தம்’ என்று மூன்றே படங்களில் முன்னணி நடிகர்கள் வரிசையில் இடம்பெற்றுவிட்டார்.தமிழ் ரசிகர்களுக்கும் ஏற்கனவே அறிமுகமானவர்தான். ‘நடிகையர் திலகம்’ படத்தில் சமந்தாவுக்கு ஜோடியாக பத்திரிகையாளர் வேடத்தில் வந்தாரே, இவரேதான்.

தமிழில் என்ட்ரி ஆகிறோம் என்பதால் சின்ஸியராக திருக்குறள் படிக்கிறார். யாரைச் சந்தித்தாலும் அழுத்தம் திருத்தமாக ‘வணக்கம்’ சொல்லித்தான் பேச ஆரம்பிக்கிறார்.“எங்கே திருக்குறள் கத்துக்கிட்டீங்க?”

“தமிழுக்கே பெருமை சேர்ப்பது திருக்குறள். அதனால்தான் உலகத்துக்கே பொதுமறையாக வேற்று நாட்டவர்கள் கூட ஏத்துக்கிட்டாங்க. என்னோட ஸ்கூல் ஃப்ரெண்ட்ஸ் மூலமாகத்தான் திருக்குறளோட பெருமையைப் புரிஞ்சுக்கிட்டேன். ஒரு மனிதனின் வாழ்க்கையில் எதிர்நோக்கக்கூடிய எல்லாப் பிரச்னைகளுக்குமே திருக்குறளில் தீர்வு இருக்கு.”

“எங்க தமிழ் மண் எப்படி இருக்கு?”

“இந்த மண் எல்லாருக்கும்தான். யார் வந்தாலும் அன்பாக வரவேற்று உபசரிக்கிற தமிழர்களின் பண்பாடு, உலகத்துக்கே முன்னுதாரணம். எங்க தெலுங்கு நடிகர்கள் பலரும் பிறந்து வளர்ந்து படிச்சது எல்லாம் தமிழ்நாடுதான். அவங்க நல்லா தமிழ் பேசுறாங்க. ரொம்ப ஈஸியா தமிழர்கள் கிட்டே நெருங்கிட்டாங்க. என்னாலே அவங்க அளவுக்கு முடியலைங்கிற வருத்தம் இருக்கு. ஆனா, ‘நோட்டா’ இப்போ என்னை தமிழர்கள் மத்தியிலும் பிரபலமாக்கி இருக்கு. ரொம்ப சந்தோஷமா இருக்கேன்.”

“போற போக்கைப் பார்த்தா தமிழ்நாட்டுக்கு மருமகன் ஆகிடுவீங்க போலிருக்கே?”

“அப்படி ஒரு அதிர்ஷ்டம் அமைஞ்சா மகிழ்ச்சிதான். யாதும் ஊரே யாவரும் கேளிர் என்பது உங்க தமிழ்நாட்டோட தாரக மந்திரம் இல்லையா? என்னைப் பொறுத்தவரைக்கும் இப்போதைக்கு நான் நல்லா தமிழ் பேசணும். தமிழ் கத்துக் கொடுக்க ஒரு நல்ல கேர்ள் பிரண்ட் அமைஞ்சா போதும். நடக்குமான்னு பார்ப்போம்.”

“உங்க ‘நோட்டா’ பற்றி...”“இப்போதைய அரசியல் சூழலுக்கு ஏற்றவகையில் வந்திருக்குன்னு நாலாபக்கமும் பாராட்டு மழை. இளைஞர்கள், அரசியலிலும் கவனம் செலுத்த வேண்டிய நிர்ப்பந்தம் ஏற்பட்டிருக்கு. அப்படியொரு இளைஞன், அரசியல் சூழலுக்குள் தள்ளப்பட்டு, அவனைச் சுத்தி என்ன நடக்குது, என்ன விளைவுகள் என்பதைத்தான் படம் சொல்லுது. பொதுவா அரசியல்னாலே கெட்ட வார்த்தைன்னு நெனைக்கிற நடுத்தர வர்க்கத்து மக்களை படம் சிந்திக்க வெச்சிருக்கு. எங்களோட நோக்கம் நிறைவேறி இருக்குன்னுதான் நெனைக்கிறேன்.”

“தமிழகத்தில் சமீபமாக சினிமாத்துறையினருக்கு நிறைய அரசியல் குடைச்சல் நடந்தது. உங்களுக்கு வரலையா?”