லக்ஷ்மியில் கலக்கிய ஐஸ்வர்யா ராஜேஷின் அண்ணி!

பிரபுதேவா நடித்த ‘லக்ஷ்மி’ படத்தில் டான்ஸ் கோச்சாக நடித்து ரசிகர்களின் கவனத்தை ஈர்த்திருக்கிறார் சோபியா. தமிழின் முன்னணி ஹீரோயினான ஐஸ்வர்யா ராஜேஷின் அண்ணி இவர் என்பது குறிப்பிடத்தக்கது. ‘‘நான் பக்கா சென்னை கேர்ள். எனக்கு நினைவு தெரிந்த நாள் முதல் அதாவது முதல் வகுப்பு படித்த காலகட்டத்திலிருந்து டான்ஸ் பண்றேன்.

என் வயசுல அப்போது யாரும் ஸ்டேஜ் டான்ஸ் ஆடவில்லை. முந்நூறு ரூபாயில் ஆரம்பித்து லட்சக்கணக்கில் சம்பளமாக வாங்கும் டான்ஸராக பல மேடைகளை பார்த்துள்ளேன். தனியார் டி.வி. நிகழ்ச்சியில் டைட்டில் ஜெயித்த பிறகும் சினிமாவில் சாதிக்க பெரிய போராட்டம் நடத்த வேண்டியிருந்தது” என்று பேச ஆரம்பித்தார் சோபியா.

“சினிமாவுக்கு வந்தது எப்படி?”

“ஸ்கூல் படிக்கும்போது பா.ரஞ்சித்தின் ‘அட்டக்கத்தி’ படத்தில் நானும் என் அக்காவும் இணைந்து நடித்தோம். நவ்யா, திவ்யா என்ற அந்த கேரக்டரில் வந்தது நாங்கள்தான். ‘குடும்பம் ஒரு கதம்பம்’ என்ற தலைப்பில் கால் டான்ஸாடுகிறது... கை மொபைலில் அதுக்கு மேல டான்ஸ் ஆடுது என்று குங்குமம் இதழில் எங்கள் பேட்டியும் வந்தது. தொடர்ந்து மிஷ்கின் சாரின் ‘அஞ்சாதே’, ‘நந்தலாலா’ உட்பட ஏராளமான படங்களில் நடித்தேன். ‘அட்டக்கத்தி’யில் நடிக்கும்போதே ஐஸ்வர்யா ராஜேஷ் பழக்கம்.”

“ஐஸ்வர்யா ராஜேஷுக்கு எப்படி அண்ணி ஆனீங்க?”

“ஒரு நடன நிகழ்ச்சியில் ஐஸ்வர்யாவின் அண்ணன் மணிகண்டன் அறிமுகமானார். நட்பில் ஆரம்பித்து பிறகு காதல், கல்யாணம் என்று எங்கள் உறவு நீடித்தது. நாங்கள் இருவேறு மதத்தைச் சேர்ந்தவர்கள். இரு வீட்டாரின் சம்மதத்தோடுதான் திருமணம் நடந்தது. திருமணத்துக்குப் பிறகு மதர்வுட்டுக்கு மாறியதால் தற்காலிகமாக நடிப்பு, நடனத்துக்கு முழுக்குப் போட்டேன்.