ஃபேஷன் A - Z

மாறிவரும்  ஃபேஷன்  குறித்து  அலசுகிறார் ஃபேஷன்  டிசைனர்  ஷண்முகப்பிரியா

பெண் குழந்தைகளுக்குதான் எத்தனை டிசைன்கள். ஒவ்வொன்றும் ஒரு ரகம். ஆனால் அதுவே ஆண் குழந்தைகளுக்கு என்று பார்த்தால்... பேன்ட், சட்டை, டீ ஷர்ட், வேஷ்டி என்று தான் சொல்ல முடியும். இதுவே முன்பெல்லாம் குழந்தைகளுக்கான உடைகளுக்கு நாம் பெரிய அளவில் கவனம் செலுத்த மாட்டோம். காரணம் அவர்களுக்கு ஒரு அழகான மற்றும் விலை உயர்ந்த உடைகளை வாங்கினாலும் அதை ஒரு வருடத்திற்கு மேல் போட முடியாது. குழந்தைகள் வளர்ந்துவிடுவதால் அவர்களுக்கு பத்தாமல் போய்விடும்.

அதனாலேயே வளரும் வரை இவர்களின் உடைகளுக்கு நாம் பெரிய அளவில் கவனம் செலுத்துவதில்லை. ஆனால் இன்றைய நிலையே வேறு. குழந்தை பிறந்த நாள் முதல் அவர்கள் வளரும் வரை அழகான உடைகளை அணிந்து பார்த்து சந்தோஷப்படுகிறார்கள் இன்றைய காலத்து பெற்றோர்கள். அதுவும் அன்றைய ஃபேஷன் உலகிற்கு ஏற்ப. பெண் குழந்தைகளுக்கு பல வகை உடைகள் மார்க்கெட்டில் உள்ளது. ஆனால் அதுவே ஆண் குழந்தைகளுக்கு பல வகை உடைகளை தேர்வு செய்வது என்பது சவாலான விஷயம் தான். இந்த இதழில் உங்களின் செல்லக் கண்ணன்களுக்கு எவ்வாறு உடை அணிவிக்கலாம் என்பதைப் பற்றி தெரிந்து கொள்ளலாம்.

பொதுவாகவே ஆண் குழந்தைகளுக்கு உடைகள் தேர்வு செய்ய வேண்டும் என்றாலே பெற்றோர்கள் கொஞ்சம் திணறித் தான் போகிறார்கள். காரணம் ஆண் குழந்தைகளின் தேவை என்ன என்று பலருக்கு புரிவதில்லை. இன்றைய தலைமுறையினர் தங்களின் ஃபேஷன் என்ன என்று புரிந்து வைத்துள்ளனர். அதற்கு ஏற்ப தான் நாம் அவர்களுக்கான உடையினை தேர்வு செய்ய விரும்புகிறார்கள்.

எந்த குழந்தையாக இருந்தாலும் அவர்களின் உடைகளை தேர்வு செய்யும் முன்பு எந்த துணியில் இருக்க வேண்டும் என்பதை கவனத்தில் கொள்ள வேண்டும். அதிலும் குறிப்பாக அந்த சமயத்திற்கு ஏற்ற சீதோஷ்ண நிலைக்கு ஏற்ப உடையும் இருக்க வேண்டும். நவம்பர் மாதம் முதல் பிப்ரவரி வரை உலகம் முழுதும் குளிர்காலம் என்பதால், அந்த சீசனுக்கு ஏற்ற உடையினை தேர்வு செய்யலாம். பருத்தி அல்லது பருத்தியுடன் கம்பளி இணைக்கப்பட்ட துணியினாலான பேன்ட், ஓவரால், முழுக்கை கொண்ட டி-ஷர்ட் சரியான தேர்வாக இருக்கும். மிதமான கிளைமேட் என்பதால் உடையின் நிறங்களும் கண்களுக்கு குளிர்ச்சியான நீலம், வெள்ளை, கிரே என நியூட்ரல் நிறங்களை தேர்வு செய்யலாம்.

அதே சமயம் கம்பளி உடைகள் மற்றும் ஹுட்டீஸ்கள் பிரைட் நிறங்களான சிகப்பு, மெரூன். மஸ்டர்ட் மஞ்சள் நிறங்கள் குறிப்பாக ஓவரால் உடைகளுக்கு மேல் அணியும் போது குழந்தைகளை மேலும் பளிச்சென்று எடுத்துக்காட்டும். செம்மரி ஆட்டின் தோலில் இருந்து செய்யப்படும் கோட் தான் ஃபிளீஸ். இதில் குழந்தைகளுக்கு அழகான ஸ்வெட்டர் அல்லது ஓவர்கோட் போல செய்யலாம். பராமரிப்பதும் எளிது. கதகதப்பாக இருக்கும் உடை என்பதால் குளிர்காலத்தில் குழந்தைகளுக்கு மிகவும் ஏற்றது. இதனுடன் கழுத்தை சுற்றி குரங்கு குல்லா அணியும் போது மேலும் உங்களை ஸ்டைலிஷாக எடுத்துக் காட்டும்.

வெயில் காலத்தில் மெல்லிய காற்றுப் புகக்கூடிய பருத்தி மற்றும் மஸ்லின் துணிகள் பெஸ்ட். குழந்தைகளின் மென்மையான சருமம் போல் பருத்தி ஆடைகளும் மென்மையாக இருக்கும். வியர்வையை உறிஞ்சும். சருமத்தை பாதுகாக்கும். தற்போது இயற்கை முறையில் விளைவிக்கப்பட்ட பருத்தி மூலம் நெய்யப்படும் காட்டன் உடைகளும் மார்க்கெட்டில் உள்ளன. மேலும் சிந்தடிக் உடைகள் சில குழந்தைகளுக்கு சருமத்தில் அலர்ஜியினை ஏற்படுத்தும்.