அழகுப் போட்டிக்கு வயது, நிறம்,தோற்றம் தடை இல்லை!

‘‘காரைக்குடியில் 12வது படிக்கும் போது, நான் தான் எங்கள் மாவட்டத்திலேயே முதலிடம். நாக்பூரில் என்.ஐ.டியில் பி.டெக். ஐ.ஐ.ஐ.டி. பெங்களூரில் எம்.டெக் என மேற் படிப்புகளையும் படித்து முடித்து, இப்போது சிங்கப்பூரைச் சேர்ந்த ஒரு நிறுவனத்தில் முன்னணி தரவு பொறியாளராக பணியாற்றி வருகிறேன்” எனப் பேசத் தொடங்குகிறார் பவித்ரா வெங்கட்ராமன். ‘திருமதி தமிழ்நாடு’ அழகி பட்டத்தை வென்று, சமீபத்தில் நடந்த ‘திருமதி. இந்தியா’ அழகிப்போட்டியிலும் 2-ம் இடத்தை பிடித்து சாதித்து இருக்கிறார்.

தொடர்ந்து பேசிய பவித்ரா, ‘‘சிறு வயதிலேயே இசை, பரதநாட்டியம், யோகா எனப் பல கலைகளை முறையாகப் பயின்றுள்ளேன். ஆனால் கொஞ்சம் வளர்ந்ததும் வெறும் படிப்பில் மட்டுமே கவனம் செலுத்த முடிந்தது. மற்ற கலைகளுக்கு நேரம் இருக்கவில்லை. படிப்பு முடிந்து வேலை, திருமணம் என வாழ்க்கை பிஸியானது. எனக்கு இப்போது ஐந்து வயதில் ஒரு மகள் இருக்கிறார். நான் கருவுற்ற போது என்னால் தொடர்ந்து வேலைக்கு போக முடியவில்லை.

அதனால் குழந்தை பிறக்கும் போது மகப்பேறு விடுப்பு எடுத்தேன். குழந்தையை பார்த்துக் கொண்ட சமயம் போக நேரம் இருந்ததால், நான் பொழுதுபோக்கிற்காகப் பயின்ற கலைகள் மீது என்னுடைய கவனம் திரும்பியது. பள்ளிப் படிப்பு அதைத் ெதாடர்ந்து கல்லூரி வாழ்க்கை... வேலை என வாழ்க்கை முறையே மாறி இருந்தது. அதனால் எனக்கு கிடைத்த நேரத்தை என் வேலை சாராத பிற துறைகளில் கவனம் செலுத்த ஆரம்பித்தேன். அந்த சமயத்தில் தான் திருமதி தமிழ்நாடு அழகிப் போட்டி நடக்க இருப்பது குறித்து என் கணவர் என்னிடம் தெரிவித்தார். என்னை அதில் பங்கேற்கவும் ஊக்கமளித்தார்.