“முடி என்பது அழகு மட்டுமல்ல பலரின் தன்னம்பிக்கை” எனப் பேசத் தொடங்கினார்  சாய்ராம் ஹேர் இன்டெஸ்ட்ரி நிறுவனத்தில் குடும்பமாக இயங்கி வரும் லேகா சாய்ராம். அட, ‘வெறும் முடி தானே’ என நாம் சாதாரணமாக நினைத்துப் பேசுகிற ஒரு விஷயம் மதிப்புள்ள ஒன்றாக இங்கே மாறி விலை போகிறது.

கோயில்களுக்கு காணிக்கையாக கொடுக்கும் முடி என்னவாகும் என்பது பெரும்பாலானவர்களுக்கு தெரியாதுதான். கிராமம் மற்றும் சென்னை மாதிரியான நகரங்களிலும் கோயிலுக்கு காணிக்கையாக  ஒருவர் செலுத்துகிற முடி, எங்கோ லாஸ் ஏஞ்சல்ஸ் அல்லது கலிபோர்னியாவில் வசிக்கும் யாரோ ஒருவர் தலையில் விக்காகச் சென்று உட்காரப் போகிறது என்பதை நாம் நினைத்துக்கூடப் பார்த்திருக்க மாட்டோம். ஆனால் அதுதான் உண்மை.

முடியின் அடர்த்தியை அதிகப்படுத்த, ஐ டிப் ஹேர் எக்ஸ்டென்ட்ஸ் என்ற  ஒன்று உண்டு. இதை இந்தியாவில் பெர்மெனன்ட் ஹேர் எக்ஸ்டென்ட்ஸ் என்பார்கள்.  பெரிய பெரிய பார்லர்களில் இதையே பயன்படுத்துகிறார்கள். இதனை நம் முடியுடன் இணைத்துவிட்டால் ஒரு வருடம் கூட அப்படியே இருக்கும்.

குளிக்கும்போதும் நீக்க வேண்டாம். ஹேர் கலரிங் விரும்புபவர்கள், தங்கள் உண்மையான முடி வீணாகிவிடும் என நினைத்தால், இந்த மாதிரியான ஐ டிப் ஹேர் எக்ஸ்டென்ட்ஸ் வாங்கி முடிக்குள் இன்செட் செய்துகொள்ளலாம். அது பார்க்க அழகாக ஸ்டீக்ஸ் (streaks) மாதிரி தோற்றம் கொடுக்கும். அழகு நிலையங்களை நடத்துபவர்கள் பெரும்பாலும் எங்களிடம் இருந்துதான் இந்த மாதிரியான ஸ்டீக்ஸ்களை வாங்கிச் செல்கிறார்கள்.