எழுத்தாளர் லீ இஸ்ரேல்

நியூயார்க்கில் உள்ள ஓர் எளிமையான யூத குடும்பத்தில் பிறந்தவர் லீ இஸ்ரேல். அவருடைய உடல் பருமன் தாழ்வு மனப்பான்மையை ஏற்படுத்த தன்னந்தனியாகவே வாழ்ந்து வந்தார். அவருக்கு நண்பர் என்று சொல்லிக்கொள்ள யாருமில்லை. எழுத்தின் மீதான தீராத காதலால் பத்திரிகைகளுக்குக் கதைகள், கட்டுரைகள் எழுதினார். அதில் கொஞ்சம் வருமானம் கிடைத்தது.

புனைப்பெயரில் எழுதுவதால் அவர் வாடகைக்குத் தங்கியிருந்த வீட்டின் சொந்தக்காரர்களுக்குக் கூட லீயைப் பற்றிய விவரம் தெரியாது. ஒரு அலுவலகத்தில் எழுத்தாளராக வேலைக்குச் சேர்ந்தார். பெண்ணாக இருப்பதால் வீடு, அலுவலகம் தாண்டி அவருக்கு வேறு இடம் கிடையாது. தனிமைச் சூட்டில் இருந்து விடுபட தினமும் குடித்தார்.

குடித்துவிட்டு அலுவலகத்துக்குப் போன போது வேலையிலிருந்து தூக்கியெறியப்பட்டார். அவருக்கு ஆத்ம துணையாக ஒரு பூனை மட்டுமே இருந்தது. வேலையை விட்டதால் சாப்பிடக்கூட லீ கஷ்டப்பட்டார். வீட்டுக்கு வாடகை கொடுக்கமுடியாமல் அவமானங்களைச் சந்தித்தார். பூனைக்குக் கூட பால் வாங்க முடியவில்லை. ஒரு நாள் பூனைக்கு உடல் நலம் சரியில்லாமல் போய்விடுகிறது. பூனையைக் காப்பாற்ற மருத்துவ மனைக்குப் போகிறார் லீ. ஆனால், அவர்கள் ஆயிரக்கணக்கில் பணம் கேட்கிறார்கள்.

நிலைகுலைந்து போன லீ, என்ன செய்வ தென்று தெரியாமல் திணறுகிறார். கையறு நிலையை மறப்பதற்காக ஒரு நூலகத்துக்குச் சென்று தனக்குப் பிடித்தமான எழுத்தாளருடைய புத்தகத்தை வாசிக் கிறார். அந்தப் புத்தகத்தினுள் பிரபல எழுத்தாளர் எழுதிய ஒரு கடிதம் கிடைக்கிறது. அமெரிக்காவில் பிரபலமான நடிகர்கள், எழுத்தாளர்கள், ஓவியர்களின் கடிதங்களுக்கு பயங்கர மவுசு. பிரபலங்களின் கடிதங்களைப் பொக்கிஷம் போல பாதுகாக்கிறார்கள். அதுவும் அந்தப் பிரபலமானவர் இறந்துபோயிருந்தால் ஒரு கடிதத்துக்கே ஆயிரக்கணக்கான டாலர்கள் கிடைக்கும்.