‘பிரிந்தவர் மீண்டும் சேர்ந்திடும்போது, அழுதால் கொஞ்சம் நிம்மதி’ கட்டுரை, திரைப்படக் காட்சிகள் போல மனதில் பதிந்தது. ஒரு போர், மக்களின் வாழ்வில்தான் எத்தனை வடுக்களை ஏற்படுத்தி விடுகிறது!

எழுத்தாளர் எஸ்.ராமகிருஷ்ணனின் மனித நேய கருத்தை தன் உணவகத்தில் பயன்படுத்தி பலனடைந்ததாக ஒரு அன்பர் கூறிய தகவல், வாள் முனையை விட பேனா முனை கூர்மையானது என்பதை மெய்ப்பித்துள்ளது!

இதுவரை தொலைக்காட்சியில் சிரிப்பு மூட்டிய இமான் அண்ணாச்சி, இப்போது, ‘சொல்றேண்ணே... சொல்றேன்!’ என குங்குமத்தில் சிரிப்பு சரவெடியைத் தொடங்கியிருப்பது அசத்தல்.

‘உள்ளம் நல்லாருந்தா ஊனம் ஒரு குறையில்ல...’ என்பதை நிரூபித்திருக்கிறார் திருச்சியைச் சேர்ந்த ‘சதுரங்க ராணி’ ஜெனிதா ஆன்டோ. பாராட்டுக்கள்!

காதலுக்கு எதிராக ஜாதித் தலைவர்களும், மதத் தலைவர்களும் கூப்பாடு போட்டு வரும் இந்நேரத்தில், காதல் என்பது ஒரு நோயாக, வன்முறைக்களமாக மாற்றப்படுவது பற்றி தெளிவாக விளக்கியுள்ளார் மனுஷ்யபுத்திரன். புரிய வேண்டியவர்களுக்குப் புரிந்தால் சரி!

‘சினிமாவுக்கு வரிவிலக்கு... கல்விக்கு வரியா?’ என்பது சரியான நேரத்தில் எழுப்பப்பட்டிருக்கும் சரியான கேள்வி. ஏற்கனவே, ‘கல்விக் கொள்ளை’களால் பரிதவிக்கும் பெற்றோருக்கும் இந்த வரி, கூடுதல் வொரி!

‘நடிக்க ரெடி... சம்பளத்தை குறைக்க ரெடி’ என டைரக்டர்களிடம் பேசி, டாப்ஸி, ஹன்சிகாவை எல்லாம் அப்செட் ஆக்கிய அப்சரஸ் அஞ்சலிக்கு ஜே!

கேஸ் விபத்துகளைத் தடுக்க பேராசிரியர் மூர்த்தி கண்டுபிடித்துள்ள, ‘ஸ்மார்ட் கேஸ் சிலிண்டர் மெஷின்’, லட்சோப லட்சம் இல்லத்தரசிகளின் வயிற்றில் பால் வார்க்கும் கருவி. இத்தனைக் காலம் இப்படியொரு கருவி இல்லாததே அவமானகரமானது!

படக் காதல், நிஜக்காதல் இரண்டிற்கும் சேர்த்து சிம்பு-ஹன்சிகா ஜோடியின் எழில் கொஞ்சும் வண்ணப் படங்களில் வாரி வழங்கிவிட்டீர்... ஒரே கல்லில் இரு மாங்காய் அடிப்பதில் கில்லாடி பாஸ் நீங்க!

கடலுணவும் கட்டுப்படியாகாமல், அடித்தட்டு மக்களின் கைக்கு எட்ட வந்த சிக்கனும் வாய்க்கு எட்டாமல் போய்விட்ட சூழ்நிலையைப் பயன்படுத்தி மக்களின் ஆரோக்கியத்துடன் விளையாடத் தொடங்கிவிட்ட சிலரை என்னவென்று சொல்வது?

மனித இனத்துக்கு சவக்குழி தோண்டும் மணல் கொள்ளை உண்மையை தாங்கள் தோண்டி எடுத்து அம்பலப்படுத்தியதற்கு நன்றிகள் பல!