‘‘புது ஜெயிலை திறந்து வச்சு தலைவர் ஏன் கடுப்பா இருக்கார்..?’’
‘‘ ‘முதல் கைதியா நீங்களே வரணும்’னு ஜெயிலர் கேட்டுக்கிட்டாராம்..!’’

‘‘இந்த ஜாதகப்படி உங்க பையனுக்கு பதவி கிடைக்கும்... ஆனா அதிகாரம் வேற ஒருத்தர் கைல இருக்கும்!’’
‘‘அப்படீன்னா என் பையன் ‘பிரதமர்’ ஆயிடுவான்னு சொல்றீங்களா..?’’

‘‘நம்ம கபாலி ஒழுங்கா மாமூல் தர்றானான்னு இன்ஸ்பெக்டருக்கு டவுட் வந்துடுச்சு...’’
‘‘அதுக்காக?’’
‘‘ஏட்டய்யா தலைமையில
‘கபாலி கண்காணிப்புக் குழு’ அமைக்கப் போறாராம்!’’

‘‘என்னதான் நடிகையாக இருந்தாலும், இப்படியெல்லாமா கல்யாணப் பத்திரிகையை அச்சடிக்கறது..?’’
‘‘ஏன்... என்னாச்சு?’’
‘‘இந்தத் திருமணம் எதிர்கால விவாகரத்துக்குட்பட்டதுன்னு பின்
குறிப்பு போட்டிருக்கே!’’

‘‘ஆனாலும் தலைவர் இவ்வளவு
வெளிப்படையா இருக்கக் கூடாது...’’
‘‘ஏன்... என்னாச்சு?’’
‘‘தொண்டர்கள் ‘கட்சி தாவ அங்கீகாரம் கொடுக்கும் ஒரே கட்சி’ன்னு விளம்பரம் பண்ணியிருக்காரே!’’

‘‘பையன் விளம்பரத்துறையில இருக்கறான்னு சொல்லி ஏமாத்திட்டாங்க...’’
‘‘ஏன்... பையன் அப்படி இல்லையா?’’
‘‘பஞ்சாயத்துல தண்டோரா போடுறதைத்தான் அப்படிச் சொன்னாங்களாம்..!’’

‘‘தலைவர் ஊருக்கு ஊர் பொதுக் கூட்டம் போடறதை ஏன் சுத்தமா நிறுத்திட்டாரு..?’’
‘‘செருப்புக்கு பதிலா இப்பல்லாம் கருங்கல்லும் பெட்ரோல் குண்டும் வீச ஆரம்பிச்சிட்டாங்களாம்..!’’