அரசிதழில் தீர்ப்பு வெளியானாலும், காவிரி நீர் இன்னும் நமக்கு கானல் நீராகத்தான் இருக்கிறது; இதில் சாதிக்க வேண்டியது இன்னும் நிறைய உள்ளது என்பதை சுட்டிக் காட்டிய கட்டுரைக்குப் பாராட்டுகள். அது முடியாதவரை முழு வெற்றி என்று யாரும் சொல்லிக்கொள்ள முடியாது.

‘மலட்டுத்தன்மை ஆண், பெண் இருவருக்கும் பொதுவே’ என்று வரலாற்றுத் தகவல்களின் மூலம் ‘மலடி’ பட்டம் சுமக்கும் பெண்களின் வயிற்றில் பாலை வார்த்திருக்கிறது ‘ச்சீய் பக்கங்கள்’ என்ற ஆச்சரியப் பக்கங்கள்.- நாயோன், திருச்சி.

பாலியல் வன்கொடுமையிலிருந்து இளந்தளிர்களைப் பாதுகாப்பது குறித்த மனுஷ்யபுத்திரனின் வேதனைக் குரல், அத்தனை பெற்றோர்களின் ஒருமித்த குரலாகவே எதிரொலித்தது.

‘விஸ்வரூபம்’ பட வில்லன் ராகுல் போஸின் பேட்டி நச்! ‘‘அடுத்த ‘விஸ்வரூபம் 2’வில் நான் இருக்கிறேனா தெரியாது’’ என்றதுதான் கொஞ்சம் ஓவர். முழுப் பூசணியை சோற்றில் மறைக்காதீங்க மிஸ்டர் போஸ்!

கை தட்டல்களுக்காக பரிந்து பேசும் பேச்சுகள், திருநங்கைகளை வாழ வைத்து விடாது. வாடகைக்கு வீடு கூடக் கிடைக்காமல் அவர்கள் படும் அவதியைச் சொல்லி, கலங்க வைத்து விட்டது உங்கள் கட்டுரை.

உறவுகளையே உதாசீனப்படுத்தும் இன்றைய மானிட உலகில், பிராணிகளை பாசத்துடன் பராமரிக்கும் சம்பத், தேவகி போன்றோர் பிரமிக்க வைக்கிறார்கள்.

‘அமலாபாலா... அப்படின்னா யாரு?’ என்று டாப்ஸி பேட்டியில் ஒரு இடத்தில் கூடச் சொல்லவில்லை. நீர் என்னடாவென்றால், தலைப்பு வைக்கிறேன் என்று அவர்களுக்குள் பத்த வைக்கிறீயே பரட்ட!

யார் படமென்றாலும் கதைதான் முக்கியம் என்ற டைரக்டர் விக்ரமனின் அதிரடிப் பேட்டி ஆகா. சிகரெட்டும் கையுமாக கேஷுவல் பேட்டி கொடுத்தவர், அப்படியே விஜய் கால்ஷீட் கிடைக்காத சீக்ரெட்டையும் போட்டு உடைத்திருக்கலாம்!

இளையராஜாவின் பேச்சால் பாரதிராஜாவுக்கு மட்டுமல்ல, ஒரு நல்ல நட்புக்கும் காயம்பட்டுள்ளது. ‘யாகாவாராயினும் நா காக்க...’ என்ற வள்ளுவனின் அமுதமொழி, ‘ராஜாக்களுக்கும்’ பொருந்தும்தானே?

சிங்கள இன வெறியர்களும் அந்நாட்டு அரசும் தமிழர் நிலங்களை அபகரித்துக் கொண்டிருப்பதை படித்து மனம் அதிர்ந்தது. ஈழத்தமிழர்களின் வாழ்வுரிமைக்காக இந்தியத் தமிழர்கள் எந்தத் தியாகத்தையும் செய்யத் தயாராக இருக்க வேண்டும்.