இந்திய விடுதலைப்போராட்டம், சுயமரியாதை இயக்கம், இந்தி எதிர்ப்புப் போராட்டம், எமர்ஜென்சி, இந்துத்துவ அரசியல் எழுச்சி, தலித், முஸ்லீம் போன்ற அடையாள அரசியல் அடிப்படையிலான இயக்கங்கள், உலகமயமாக்கல், நவீன தொழில்நுட்பம்... என ஏராளமான மாற்றங்களைத் தன் கண்முன் கண்டவர், டாக்டர் கலைஞர்.

ஓர் எழுத்தாளராக, திரைப்படம் என்னும் மாபெரும் செல்வாக்கு பெற்ற ஊடகத்தில் மகத்தான தாக்கம் செலுத்திய படைப்பாளியாக, இதழியலாளராக, சிந்தனையாளராக, ஆட்சியாளராக, அரசியல் தலைவராக... என்று சொல்லிக்கொண்டே போகலாம். அடையாளங்களுக்குள் அடங்காததே அவர் அடையாளம். 

முற்றுமுழுதாகத் தமிழ்வழியாகவே இயங்கிய கலைஞர், இன்று இந்தியளவிலும் நினைவுகூரப்படும் தலைவராக இருப்பதற்கு காரணம் இருக்கிறது. பகுத்தறிவு, சமூகநீதி, பெண்ணுரிமை, பன்மைத்துவம் ஆகியவற்றை முன்வைத்த திராவிட இயக்கத்தின் கருத்தியல் விழுமியங்கள் இன்று இந்திய அளவில் கூர்ந்து கவனிக்கப்படுகின்றன. அப்படி கூர்ந்து கவனிக்கும்படி கலைஞர், தன் செயலால் அனைத்து மாநிலத்தவரையும் கொண்டு வந்திருக்கிறார் என்பதுதான் முக்கியம்.