தமிழ் சினிமாவின் ஆக்‌ஷன் நடிகர் என்று பெயர் எடுத்தவர் விஷால். நடிகராக மட்டுமல்லாமல், தயாரிப்பாளராகவும் பல படங்களைத் தயாரித்தவர். தயாரிப்பாளர்கள் சங்கத் தலைவராகவும் இருந்தவர்.

47 வயதான விஷால் தற்போது நடிகர் சங்கத்தின் தலைவராக பொறுப்பு வகித்து வருகிறார். கடந்த சில வருடங்களாகவே விஷால் திருமணம் எப்போது என்ற கேள்வி திரைத்துறையில் மட்டுமல்லாமல், ரசிகர்களிடமும் இருந்தது. நடிகர் சங்கக் கட்டடம் முடிந்தபிறகுதான் திருமணம் என்று விஷால் வெளிப்படையாகக் கூறினார்.

இந்த நிலையில், வரும் ஆகஸ்ட் மாதம் நடிகர் சங்கத்துக்கான புதிய கட்டடம் திறப்பு விழா காண இருப்பதால், தனது பிறந்த தினமான ஆகஸ்ட் 29 அன்று  தனக்கும் நடிகை சாய் தன்ஷிகாவுக்கும் திருமணம் நடைபெறும் என்று ‘யோகி டா’ பட விழாவில் அறிவித்திருக்கிறார்.இது ரசிகர்களுக்கு மட்டுமல்லாமல், திரைத் துறைக்கும் ஆச்சர்யத்தைக் கொடுத்திருக்கிறது.

தஞ்சாவூர் மாவட்டத்தைச் சேர்ந்த தன்ஷிகாவுக்கு சினிமா நடிகையாக வேண்டும் என்பது லட்சியமாக இருந்தது. சினிமா கனவுகளுடன் கோடம்பாக்கம் வந்த அவருக்கு அடைக்கலம் கொடுத்தவர் அவருடைய மாமா அருண். தற்போது அவர் உயிருடன் இல்லை. ஆர்ட்டிஸ்ட் மேேனஜரான அருண் அனைவருக்கும் பரிச்சயமானவர்.

ஆரம்பத்தில் துணை நடிகையாக பல படங்களில் நடித்தவருக்கு கன்னடத்தில் ‘கேம்பா’ என்ற படத்தில் கதாநாயகி வாய்ப்பு கிடைத்தது. தொடர்ந்து தமிழில் சில படங்களில் நாயகியாக நடித்தவருக்கு ஜனநாதன் இயக்கத்தில் வெளியான ‘பேராண்மை’ கதாநாயகி என்ற நட்சத்திர அந்தஸ்தைக் கொடுத்தது.

அதன்பிறகு தன்ஷிகாவின் மார்க்கெட் சூடு பிடிக்க ஆரம்பித்து, ‘மாஞ்சா வேலு’, ‘நில் கவனி செல்லாதே’, ‘அரவான்’, ‘பரதேசி’ என்று பெரிய பட்ஜெட் படங்களிலும், பெரிய இயக்குநர்களின் படங்களிலும் நாயகி வாய்ப்பு கிடைத்து முன்னணி நடிகைகளின் பட்டியலில் தன்னையும் இணைத்துக் கொண்டார்.

மனதை ஒருமுகப்படுத்த பல சமய கோயில்களைச் சுற்றி வந்தார். ஒரு கட்டத்தில் சாய் பாபாவின் பக்தையாக மாறியவர் சாய் தன்ஷிகாவாக தனது பெயரை மாற்றிக்கொண்டார். பெயர் மாற்றம் அவருக்கு சில பல பட வாய்ப்புகளைக் கொடுத்தது.இந்த நிலையில்தான் விஷாலின் நட்பு அவருக்கு எதிர்பாராதவிதமாகக் கிடைத்தது. 

சில ஆண்டுகளுக்கு முன் ‘விழித்திரு’ என்ற படத்தில் நடித்தார் தன்ஷிகா. அந்தப் பட விழாவில் பல சினிமா பிரபலங்கள் கலந்துகொண்டார்கள். அப்போது தன்ஷிகா தனது பெயரைக் குறிப்பிடாததால், விழாவில் கலந்துகொண்ட டி.ராஜேந்தர் கோபத்தில் தன்ஷிகாவை அடுக்குமொழியில் வசை பாடினார்.

அந்தத் தாக்குதலை சற்றும் எதிர்பார்க்காத தன்ஷிகா கண்ணீரை அடக்க முடியாமல் தேம்பித் தேம்பி அழுதார். டி.ராஜேந்தரை சமாதானப்படுத்தும் விதமாக அவர் காலில் வீழ்ந்து மன்னிப்பும் கேட்டார். ஆனால், டி.ராஜேந்தர் மன்னிக்காமல் அங்கிருந்து கடந்து சென்று விட்டார். இந்த நிகழ்வு அப்போது திரையுலகில் பரபரப்பாகப் பேசப்பட்டது.

நடிகர் சங்கத்துக்கும் தகவல் சென்றது. நடிகர் சங்கத் தலைவர் என்ற முறையில் தன்ஷிகாவுக்கு ஆறுதல் சொல்லி தைரியப்படுத்தினார் விஷால். ஏறத்தாழ அதுதான் விஷால் - தன்ஷிகாவின் முதல் சந்திப்பு என்று சொல்லப்படுகிறது. அது முதல் இருவரும் நட்பாகப் பழகத் தொடங்கியிருக்கிறார்கள். ஒரு கட்டத்தில் நட்பு காதலாக மாறியது.

அதற்கு காரணம் இல்லாமல் இல்லை. பல ஆண்டுகளாகவே விஷாலுக்கு திருமணம் செய்து வைக்க அவருடைய வீட்டில் தீவிரமாக முயற்சி செய்து வருகிறார்கள். குறிப்பாக தங்கள் மகனுக்கு ஒரு நடிகையைக் கட்டி வைக்க வேண்டும் என்று தீர்மானமாக இருந்தார்கள் என்று விஷால் தரப்பில் சொல்லப்படுகிறது.

ஏனெனில், விஷால் அண்ணனும் நடிகருமான அஜய் கிருஷ்ணா, ‘திமிர்’ பட நடிகை ஸ்ரேயா ரெட்டியை மணந்து கொண்டார். மூத்த மகன் போல் இளைய மகனும் நடிகையை திருமணம் செய்துகொள்ளவேண்டும் என்று விஷாலின் பெற்றோர் ஆர்வமாக இருந்தார்கள் என்று சொல்லப்படுகிறது.

முதலில் பெண் பார்க்கும் படலத்தை கோடம்பாக்கத்தில் ஆரம்பித்தார்கள். த்ரிஷா, கீர்த்தி சுரேஷ், வரலட்சுமி சரத்குமார் என பல நடிகைகளின் பெற்றோரிடம் முறைப்படி பெண் கேட்டதாக சொல்லப்படுகிறது. ஆனால், அவை எதுவும் கைகூடாததால் பெண் பார்க்கும் படலத்தை டோலிவுட்டுக்கு மாற்றியுள்ளார்கள். 

நடிகை அனிஷா ரெட்டி வீட்டில் சம்பந்தம் பேசி திருமணத்துக்கான வேலைகளைத் தொடங்கினார்கள். ஆனால், அந்த வரன் நிச்சயத்தோடு நின்றுபோனது.அதிலிருந்து விஷால் கடுமையான மனச் சோர்வில் இருந்ததாக சொல்லப்படுகிறது. பெரும்பாலும் வீட்டிலேயே முடங்கி இருந்ததாகவும் சொல்கிறார்கள்.