அறிமுகம் தேவையில்லை. பெட்டிக் கடையில் பயன்படுத்தப்படும் டிஜிட்டல் பணப்பரிவர்த்தனை முதல் சகல இடங்களிலும் இன்று ஏஐ புழக்கத்துக்கு வந்துவிட்டது.செயற்கை நுண்ணறிவு குறித்து நமக்கு எதுவும் தெரியாமல் இருக்கலாம். அதன் செயல்பாடுகளை நாம் அறியாமல் - புரிந்து கொள்ளாமல் இருக்கலாம்.

ஆனாலும் நம் அன்றாட பழக்க வழக்கங்களிலும் அறிந்தோ அறியாமலோ ஏஐ இரண்டறக் கலந்துவிட்டது என்பது மட்டும் உண்மை. சத்தியம். நிஜம்.அந்தளவுக்கு இன்று ஏஐ அறிவியல் துறையில் மிக வேகமாக வளர்ந்து கொண்டிருக்கிறது. அப்டேட் ஆகியபடியே இருக்கிறது.

இந்த ஏஐயை வைத்துக் கொண்டே கோடிங்கை நாம் எளிதாகப் போட்டுவிட முடியும். இது இப்போது சாட்ஜிபிடி ப்ரோ, Enterprise மற்றும் டீம் சந்தா வைத்திருப்போருக்கு மட்டுமே கிடைக்கும் வகையில் இருக்கிறது. 

கிளவுட்டில் இயங்கும் இந்த கோடிங் ஏஜெண்ட், ஐடி ஊழியர்களுக்கு ஒரு விர்ச்சுவல் உதவியாளராகச் செயல்படும் என்கிறார்கள். ஐடி ஊழியர்கள் விரைவாக கோடிங் எழுதவும், பிழைகளைச் சரி செய்யவும் இது உதவும் என்று சொல்லப்படுகிறது.

ஓபன் ஏஐ நிறுவனத்தின் தலைவர் சாம் ஆல்ட்மேன் Codex வெளியிடுவது குறித்த அறிவிப்பைத் தனது டுவிட்டர் - எக்ஸ் - பக்கத்தில் அறிவித்தார். “இன்று நாங்கள் Codexஐ அறிமுகப்படுத்துகிறோம். இது கிளவுட்டில் இருக்கும் ஒரு விர்ச்சுவல் கோடிங் ஏஜெண்ட். 

இது உங்களுக்காக பணிகளைச் செய்யும். மேலும், பிழைகளையும் சரி செய்யும். இதன்மூலம் நீங்கள் ஒரே நேரத்தில் பல வேலைகளைச் செய்ய முடியும்...” இந்த கோடெக்ஸில் ஒரே நேரத்தில் பல செக்‌ஷன்களையும் உருவாக்க முடியும். இதன் மூலம் ஒரே நேரத்தில் பல வேலைகளை ஏஐயிடம் தரவும் முடியும்.

இது தொடர்பாக ஓபன் ஏஐ வெளியிட்டுள்ள செய்திக்குறிப்பில், “இந்த கோடெக்ஸ் மூலம் கோப்புகளைப் படித்துத் திருத்த முடியும். அதே போல் சோதனை ஹார்னஸ்கள், லிண்டர்கள் மற்றும் டைப் செக்கர்ஸ்களையும் இயக்க முடியும். 

நீங்கள் இதற்குத் தரும் பணி எவ்வளவு சிக்கலானதாக இருந்தாலும் அதை அதிகபட்சம் 30 நிமிடங்களில் முடித்துவிடும்...” எனத் தெரிவிக்கப்பட்டுள்ளது.அதாவது ஒரு ஐடி ஊழியர் - அவரது டீம் - மாதக்கணக்கில் இரவு பகலாக அமர்ந்து செய்யும் வேலையை கோடெக்ஸ், ஜஸ்ட் லைக் தட் முடித்துவிடும்!

ஒருவர் இந்த கோடெக்ஸைப் பயன்படுத்த, சாட்ஜிபிடியில் இருக்கும் சைட் பாருக்கு செல்ல வேண்டும். அங்கு கோடிங் என்பதை கிளிக் செய்வதன் மூலம் உங்கள் ஏஐ உதவியாளருக்கு புதிய கோடிங் வேலையை அசைன் செய்ய முடியும்.நீங்கள் தந்த பணியைச் செய்யும்போது தேவையான பாதுகாப்பு நடவடிக்கைகளும் எடுக்கப்படும். 

அதன்பிறகே அது உங்கள் டாஸ்க்கை செய்யத் தொடங்கும்.பணியை முடித்தபிறகு, கோடெக்ஸ் உங்களிடம் அதற்கான விடையைத் தரும். கூடவே ஆதாரத்தையும் சமர்ப்பிக்கும்.அதேநேரம் டெஸ்டிங் நிச்சயமற்றதாக இருக்கும்போது அல்லது தோல்வி அடைந்தால் அதையும் யூசர்களிடம் மிகத் தெளிவாகக் கூறிவிடுமாம்.