இரண்டாவது முறையாக அமெரிக்க அதிபராகி இருக்கும் டொனால்ட் டிரம்ப், தான் பதவியேற்றது முதலே முந்தைய ஆட்சியாளர்களின் நடைமுறைகளை விமர்சிப்பதோடு அண்டை நாடுகளுடன் வர்த்தகம், அயல் உறவு உள்ளிட்டவற்றை தலைகீழாக மாற்றவும் துடிக்கிறார்.

அதன் ஒருபகுதியாக உலக நாடுகள் அமெரிக்காவின் ஏற்றுமதி பொருளுக்கு தமது நாடுகளில் எத்தகைய வரியை விதிக்கின்றனவோ அதே அளவு வரியை அமெரிக்காவும் அந்தந்த நாடுகளின் ஏற்றுமதி பொருட்களுக்கு விதிக்கப் போவதாக டிரம்ப் அறிவித்தார்.

டிரம்ப்பின் மிரட்டலுக்கு அஞ்சாமல் சீனா, கனடா, மெக்சிகோ போன்ற  நாடுகள் அமெரிக்கா எந்த அளவு வரியை உயர்த்துகிறதோ அதேபோல் அமெரிக்க பொருட்களுக்கு தம் நாட்டில் மேலும் கூடுதல் வரியை விதித்து வருகின்றன.

டிரம்ப்பின் பரஸ்பர வரியைத் தவிர கனடா, மெக்சிகோ நாடுகளில் இருந்து அமெரிக்காவிற்கு இறக்குமதி செய்யப்படும் அனைத்து பொருட்களுக்கும்  தனியாக 25% வரிவிதிப்பும் இந்த மாதம் முதல் அமலுக்கு வந்திருக்கிறது.

அமெரிக்காவின் புதிய பரஸ்பர வரிவிதிப்பு முறை மூலமும், தனிச்சிறப்பாக தனக்கு பணியாத நாடுகளின் மீது போடப்படும் கூடுதல் வரியையும் சேர்த்தால் ஆண்டுக்கு 50 லட்சம் கோடி ரூபாய் கூடுதல் வரி வசூலாக அமையும் என அமெரிக்கா எதிர்பார்க்கிறது.

மோடியின் ஆட்சிக் காலம் முழுவதும் இந்தியாவானது அமெரிக்காவின் நட்பு நாடாகவுமே இருந்து வந்துள்ளது. இந்திய மக்களின் உழைப்பையும், இந்தியாவின் கனிம வளங்களையும், இந்தியாவின் சந்தையையும் பயன்படுத்தி அமெரிக்கா உயர்ந்துதான் வந்துள்ளது. ஆனால், அதை மறுத்து ஏதோ நாம் அமெரிக்கர்களை வஞ்சிப்பதாக வாய்கூசாமல் அவதூறும் செய்கின்றனர்.

ஒரு நாடு இன்னொரு நாட்டிலிருந்து இறக்குமதியாகும் பொருட்கள் மீது வரியை விதிப்பது எப்படி அந்நாடுகளில் உள்ள தொழிலாளர்களின் மீதான வெறுப்பாக இருக்க முடியும் என்ற கேள்விக்குத்தான் பதிலில்லை. 

இத்தனைக்கும் அமெரிக்காவின் வரி விதிப்பு தாக்குதலுக்கு எதிராக இந்தியா எதுவும் சொல்லவில்லை; செய்யவில்லை. அத்துடன் அமெரிக்காவின்  ஹார்லி டேவிட்சன் உள்ளிட்ட மோட்டார் பைக்குகள் மீதான வரி 50% என்று இருந்ததை 40% ஆக்கியது. போர்பன் விஸ்கிக்கு 150% இருந்த வரியை 100% என்று குறைத்தது.

இன்றைய கார்ப்பரேட் உலகில் ஒரு பொருளை உற்பத்தி செய்வதற்கான அதிநவீன தொழில்நுட்பத்தை பயன்படுத்துவதில் உலக நாடுகள் சமநிலையில் இல்லை.ஒப்பீட்டு அளவில் முன்னேறிய தொழில்நுட்பத்தை பயன்படுத்துபவர்கள்தான் மிக மலிவான விலையில் தமது உற்பத்தி பொருட்களை விற்பனைக்கு சந்தையில் குவிக்க முடியும். 

அதே நேரம் பின்தங்கிய தொழில்நுட்பத்தில், குறிப்பாக அதிக மனித உழைப்பைக் கொண்டு உற்பத்தி செய்யப்படும் பொருட்கள் விலை அதிகமானதாகவே சந்தைக்கு வரும்.அதாவது வளரும் பின்தங்கிய நாடுகளில் உற்பத்தி செய்யப்படும் பொருட்களின் விலையானது முன்னேறிய நாடுகளின் கார்ப்பரேட் நிறுவனங்களது உற்பத்தி செலவுகளை விட அதிகமானதாக இருக்கும்.

வளரும், பின்தங்கிய ஏழை நாடுகளின் உற்பத்தி பொருட்கள் முன்னேறிய நாடுகளின் உற்பத்தி பொருட்களோடு சந்தையில் போட்டி போட முடியாததாகவும் இருக்கும். இதைச் சமப்படுத்தவே ஒவ்வொரு பின்தங்கிய நாடும் தனது நாட்டுக்குள் குறைவான விலையில் இறக்குமதியாகும் பொருட்களின் மீது வரிகளை போடுகின்றது.

ஒவ்வொரு துறையிலும் குறிப்பாக எந்தப் பொருட்கள் முன்னேறிய நாடுகளிடம்  இருந்து இறக்குமதி ஆகிறதோ அந்தத் துறையில் அந்தப் பொருட்களின் உற்பத்தியானது அந்த நாட்டின் நுகர்வுச் சந்தையை முழுமையாக ஆக்ரமித்து விடுகிறது.

அமெரிக்காவின் பரஸ்பர வரி விதிப்பு தொடர்பான குழப்ப நிலை சர்வதேச வியாபாரம் மற்றும் பங்குச் சந்தைகளில் எதிரொலிக்கிறது. குறிப்பாக, அதன் தாக்கத்தால் இந்திய பங்குச் சந்தைகளில் கடந்த வாரம் வர்த்தகம் கடும் சரிவுடன் முடிவடைந்தது. அவரின் 26 சதவீத வரிவிதிப்பால் இந்தியாவில் எந்தெந்த துறைகளுக்கு பாதிப்பு ஏற்படும் என ‘க்ளோபல் டிரேட் ரிசர்ச் இனிஷியேடிவ்’ என்ற அமைப்பு கணித்துள்ளது.

இந்தியா மட்டுமல்ல, கம்போடியா 49%, வியட்நாம் 46%, இலங்கை 44%, சீனா 34%, ஜப்பான் 24%, ஐரோப்பிய யூனியன் 20% என  வரி விதிப்பு அமலாகிறது. மேலும், ஆட்டோமொபைல் இறக்குமதிக்கு சுமார் 20% பொதுவான இறக்குமதி வரியை விதிப்பதாக டிரம்ப் அறிவித்துள்ளார்.

இதனைத் தொடர்ந்து டிரம்ப்பின் வரி விதிப்பால் பங்குச்சந்தைகளில் கடும் சரிவு ஏற்பட்டது. இதனுடன் உலக கோடீஸ்வரர்கள் பலர் கோடிக்கணக்கில் சொத்துகளை இழந்துள்ளனர். அவர்களில் பலர் அமெரிக்காவைச் சேர்ந்தவர்கள் என்பது கவனிக்கத்தக்கது.

இந்த பட்டியலில் முதலாவது இடத்தில் இருப்பவர் ஃபேஸ்புக், வாட்ஸ்அப் உள்ளிட்டவற்றின் தாய் நிறுவனமான மெட்டாவின் உரிமையாளர் மார்க் ஜூக்கர்பெர்க். இவருக்கு சுமார் ஒரு லட்சத்து 53 ஆயிரம் கோடி ரூபாய் இழப்பு ஏற்பட்டுள்ளது. இதற்கு அடுத்த இடத்தில் அமேசான் நிறுவனத்தின் ஜெப் பெசோஸ் உள்ளார். இவருக்கு ஒரு லட்சத்து 35 ஆயிரத்து 993 கோடி ரூபாய் இழப்பு ஏற்பட்டு உள்ளது.