கமர்ஷியல் ஆக்‌ஷன் படங்களுக்கு என ஒரு டெம்ப்ளேட் உண்டு. அதற்கேற்பவே எல்லா மொழிகளிலும் ஆக்‌ஷன் கமர்ஷியல் படங்களை மாஸ் ஹீரோக்களை வைத்து இயக்குநர்கள் எடுக்கிறார்கள்.இச்சூழலில் 12 ஆண்டுகளுக்கு ஒருமுறை குறிஞ்சிப் பூ பூப்பது போல் எப்பொழுதாவது ஒரு மாஸ் கமர்ஷியல் படம் வரும். அதன் திரைக்கதை திரையுலகையே புரட்டிப் போடும். 

டிரெண்ட் செட்டராக மாறும்.‘எங்க வீட்டுப் பிள்ளை’, ‘நாயகன்’, ‘பாட்ஷா’ படங்கள் எல்லாம் இதற்கு உதாரணங்கள். அப்படி சமீபத்தில் வெளியான ‘வீர தீர சூரன்’ ஸ்கிரிப்டிலும் கேரக்டர் ஸ்கெட்சிலும் இந்தியத் திரையுலகையே திரும்பிப் பார்க்க வைத்திருக்கிறது.

எப்படி இது சாத்தியமானது... இயக்குநர் எஸ்யு.அருண்குமார் இப்படியொரு திரைக்கதைக்காக எந்தளவு மெனக்கெட்டார்... விபரம் அறிய அவரை சந்தித்தோம். ‘‘இயல்பா கதை சொல்வதுதான் எனக்குப் பிடிக்கும். இன்னைக்கு இருக்கற டிரெண்ட், இப்ப நடக்குற சம்பவத்தை அடிப்படையாக வைத்து எப்பவுமே நான் கதை எழுத மாட்டேன்.  

அதனால்தான் வாட்ஸ்அப், ஃபேஸ்புக், இன்ஸ்டாகிராம் இப்படி எந்த டிஜிட்டல் உலகத்திலும் நான் கிடையாது...’’ இந்தக் காலத்தில் இப்படி ஒருத்தரா என துவக்கத்திலேயே நமக்கு அதிர்ச்சி கொடுக்கிறார் இயக்குநர் எஸ்யு.அருண்குமார்.

இந்தப் படத்தை தனியாக விட்டாலே மக்கள் புரிஞ்சிக்கிற மாதிரிதான் நான் கதை உருவாக்கி இருந்தேன். விக்ரம் சார்தான் இரண்டு பாகங்கள் அதில் முதலில் இரண்டாவது பாகம் என்கிற ஆலோசனை கொடுத்தார். 

அப்போதான் இந்தக் கதையை பெரிதாக்கி ஒவ்வொரு கேரக்டருக்கும் ஆழமான பின்னணி சேர்த்தேன்.‘சேதுபதி’ திரைப்படம் கமர்ஷியல்தான்... ஆனாலும் அந்த போலீஸ் ஆபீஸர் கதாபாத்திரத்திலேயே ஏராளமான லேயர்களை பார்க்க முடியும்... உங்களுடைய கேரக்டர் ஸ்கெட்ச் பத்தி சொல்லுங்க..?

நேற்று பிறந்த குழந்தை கூட வெறும் குழந்தையாக இல்லாம மகன், பேரன், மாணவன், நண்பன், உறவுக்காரன் இப்படி பல லேயர்களாதான் ஒரு மனிதன் இருப்பான். ஒவ்வொரு மனுஷனுக்கும் ஏராளமான பொறுப்பு இருக்கு. 

ஒவ்வொரு பொறுப்பும் ஒரு குணம் அல்லது ஒரு தனி கேரக்டர். ஒரு அத்தை பையனா இருக்கணும்னா கூட அது ஒரு தனி கேரக்டர்தான். இந்த லேயர்களை நான் அதிகம் மனுஷங்களுக்குள்ள படிப்பேன். அப்படித்தான் என்னுடைய கேரக்டரும் இருக்கும்.

நான் வளர்ந்த சூழல் அப்படி. மதுரை பரவைதான் எனக்கு சொந்த ஊர். வேலை, வேலை முடிந்தவுடன் வீடு... அங்கே குடும்பம், சொந்த பந்தம் இப்படி நேருக்கு நேர் ஒருத்தருக்கு ஒருத்தர் பார்த்து பேசுவது எனக்கு ரொம்பப் பிடிக்கும்.  

அதே சமயம் கூப்பிட ஒரு போன், அனுப்ப மெசேஜ் இருக்கு. அது போதும்னு நினைக்கிறேன். வேற எந்த பாரமும் நான் எடுத்துக்க விரும்பலை.உங்கள் படங்களில் பெரும்பாலும் புதுமுகங்களே எதார்த்தமான நடிப்பை வெளிப்படுத்துகிறார்கள்...

கதைக்கு தேர்வு செய்யும் போதே இயல்பாகவே நடிக்கக்கூடிய நடிகர்களைத்தான் தேர்வு செய்வேன். மெயின் கதாபாத்திரமா பெர்ஃபாமன்சை சரியா கொடுக்கக்கூடிய நடிகர்களை அந்தந்த கேரக்டருக்கு தேர்வு செய்து பொருத்திட்டாலே பாதிவேலை முடிஞ்சிடும். 

தொடர்ந்து அடுத்த லெவலில் இருக்கற கேரக்டர்களுக்கு கொஞ்சம் மெனக்கெட்டு நடிகர்கள் தேர்வு செய்யணும். சில நிமிடங்கள் வந்தால் கூட அவங்க கேரக்டர் மனதில் நிற்கணும்னு நினைப்பேன்.

எந்தக் கதை எழுதினாலும் எப்பவோ யாரோ அதை ஒரு சினிமாவா எடுத்திருப்பாங்க. 

நாம சொல்கிற அத்தனை கதைக் கும் அதற்கு ஒப்பிடக்கூடிய இன்னொரு கதை ஏற்கனவே இருக்கும்.முதல் படம் இயக்க ஆரம்பிச்சதிலிருந்து எனக்குத் தெரிஞ்சதெல்லாம் சினிமா வேலை மட்டும்தான். ஒருவேளை உணவு டெலிவரி, போஸ்ட்மேன் மாதிரியான வேலைகள் பார்த்திருந்தால் கூட எனக்கு நிறைய கதைகள் கிடைச்சிருக்கும்.

அதற்கு ஒளிப்பதிவாளர் தேனி ஈஸ்வருக்குதான் நன்றி சொல்லணும். ஒரு திரைப்படம் முதலில் கண்ணுக்கு விருந்தா இருக்கணும். காதையும் , கண்களையும் ஒரு காட்சி இடைஞ்சல் செய்தா அது மூளையை இடைஞ்சல் செய்யும். என்னுடைய காட்சி அமைப்பு பார்வையாளர்கள் மூளையை இடைஞ்சல் செய்யக்கூடாது. 

அது பேய் படமானாலும் சரி. எனக்கு லைட்டிங் அறிவு கிடையாது. இந்தக் காட்சி இப்படி இருக்கணும்... இதைப் பார்க்கும் பொழுது இவ்வளவு துல்லியமா இருக்கணும்னு மட்டும்தான் தேனி ஈஸ்வர் சாருக்கு விளக்கினேன். இதற்கு ஏற்ப லைட்டிங், டோன் செட் செய்தார்.

அதேபோல மொத்த படத்தையும் எடுத்துட்டு எடிட்டர்கிட்ட கொடுக்க மாட்டேன். போதுமான அளவு எடிட் செய்து ஒரு கதையா உருவாக்கின பிறகுதான் எடிட்டிங் டேபிளுக்கு கொண்டு போவேன்.

இதுல இன்னும் ஷார்ப் கட் கொடுத்து எடிட்டிங் அறிவுடன் மேற்கொண்டு அழகு சேர்த்தார் எடிட்டர் பிரசன்னா ஜிகே. காட்சிகளுக்கு இவ்வளவு யோசிக்கும் போது இசையைப் பற்றி சொல்லாம இருக்க முடியுமா! கதைக்கு மேலும் உயிர் கொடுத்தார் ஜி.வி.பிரகாஷ். அவருடைய பின்னணி இசையும் பாடல்களும் கதைக்கு இன்னொரு கேரக்டரா அமைஞ்சது.

ஒரு காட்சி... போலீஸ் ஸ்டேஷனுக்குள் வெறும் ட்ரவுசருடன் விக்ரம் சார் நடந்து வருகிற மாதிரி எழுதி இருப்பேன். வேற நடிகரா இருந்தா இப்படி ஒரு காட்சியை யோசிச்சிருக்க மாட்டேன். விக்ரம் சார் என்பதால்... அவர் நடிப்பு மேல் நம்பிக்கை இருந்ததால்... இந்தக் காட்சியை உருவாக்கினேன்.

மனிதர் கொஞ்சம் கூட யோசிக்காம அந்தக் காட்சிக்கு உயிர் கொடுத்தார். இவ்வளவு படத்துக்கு பிறகும் கூட தன்னை நிரூபிக்க ஓடிக்கிட்டே இருக்கும் நடிகர் அவர். அவரால்தான் இந்தப் படம் ரெண்டு பாகங்களா மாறி இன்னைக்கு மிகப்பெரும் வரவேற்பு அடைஞ்சிருக்கு.

முதலில் சில நாட்கள் ரெஸ்ட். பிறகுதான் அடுத்த பாக வேலைகள். அடுத்த பாகத்தில் துஷாரா கேரக்டரும், திலீப் கேரக்டரும் விரிவா, முக்கியத்துவமா இருக்கும். அவ்வளவுதான் இப்போதைக்கு சொல்ல முடியும். 

என் தம்பிதான் வெங்கட் கேரக்டர் செய்திருப்பார். அவரும் என்னைப் போல்தான். வேலை முடிஞ்சா நாங்க ரெண்டு பேரும் குடும்பத்துடன் ஐக்கியம் ஆகிடுவோம். டிரெண்ட் தெரிஞ்சுக்க என்னுடைய அசிஸ்டெண்ட் டைரக்டர் குழு இருக்கு. இது போதும்.