எழுத்தாளர், மாரத்தான் வீராங்கனை, தொலைக்காட்சி வர்ணனையாளர் என பன்முகங்கொண்ட ஆளுமை, காத்தரின் வர்ஜீனியா ஸ்விட்சர். அமெரிக்காவில் 1897லிருந்து ஒவ்வொரு வருடமும் பாஸ்டன் மாரத்தான் போட்டி நடந்து வருகிறது. ஆண்கள் மட்டுமே அதிகாரபூர்வமாகப் பதிவு செய்யப்பட்ட போட்டியாளர்களாக பாஸ்டன் மாரத்தானில் கலந்துகொண்டனர். 

1967ம் வருடம் அதிகாரபூர்வமாகப் பதிவு செய்யப்பட்ட முதல் பெண் போட்டியாளராக பாஸ்டன் மாரத்தானில் கலந்துகொண்டார் காத்தரின். அவர் மாரத்தானில் ஓடிக்கொண்டிருக்கும் போது, போட்டியை நடத்திய மேனேஜர் ஜாக் செம்பல் என்பவர் காத்தரினைத் தாக்கினார். இந்தச் சம்பவம் அப்போது அமெரிக்கா முழுவதும் முக்கிய செய்தியானது.

ஆம்; 1972ம் வருடம் பெண்களுக்கென்று தனியாக பாஸ்டன் மாரத்தான் போட்டி உருவாக்கப்பட்டது. 

இதில் அதிகாரபூர்வமாக பெண்கள் பதிவு செய்து கலந்துகொண்டனர்.

1949ம் வருடம் அமெரிக்காவுக்குக் குடிபெயர்ந்தது, காத்தரினின் குடும்பம். 

ஆங்கில இலக்கியத்திலும், பத்திரிகைத்துறையிலும் பட்டப்படிப்பை முடித்த காத்தரினுக்கு, ஓட்டப்பந்தயத்தின் மீது பெருங்காதல். அதனால் கல்லூரியில் படித்துக்கொண்டிருக்கும்போதே ஆர்னி பிரிக்ஸ் என்பவரிடம் ஓட்டப் பயிற்சி எடுத்துக்கொண்டார்.

1967ம் வருடம் பந்தயத்துக்கான கட்டணத்தைச் செலுத்தி, தனது பெயரை அதிகார பூர்வமாக பதிவு செய்துவிட்டு பாஸ்டன் மாரத்தானில் கலந்து கொண்டார் காத்தரின். மாரத்தானில் ஓடுவதற்குத் தனக்கு முழு உடல் தகுதியும் இருக்கிறது என்பதை நிரூபிக்க ஃபிட்னஸ் சான்றிதழையும் சமர்ப்பித்தார். 

பாஸ்டன் மாரத்தானில், 261 என்ற அடையாள எண்ணுடன் (Bib Number) கலந்துகொண்டார். காத்தரினின் தந்தை தனது முழு ஆதரவையும் கொடுத்தார். பந்தயம் ஆரம்பிக்கும்போது நிறைய பேர் காத்தரினை உற்சாகப்படுத்தும்விதமாக ஆதரவுக்குரலை எழுப்பினார்கள். பயிற்சியாளர் ஆர்னி மற்றும் காதலன் டாம் மில்லருடன் சேர்ந்து காத்தரினும் ஓடினார்.

சில மைல் தூரம் ஓடியபிறகு, அவரது தலையை மூடியிருந்த ஹூடி கீழே விலகியதால், அதிகாரபூர்வமாக ஒரு பெண் பாஸ்டன் மாரத்தானில் ஓடுகிறார் என்ற தகவல் தீயாகப் பரவியது.

இந்தப் பிரச்னைகளைத் தாண்டி, பந்தய தூரத்தை 4 மணி, 20 நிமிடங்களில் கடந்தார் காத்தரின். அவர் மீதான தாக்குதல் அடுத்த நாள் சர்வதேச அளவில் முக்கிய செய்தியானது.

உண்மையில் ஜாக் என்னைத் தாக்கியதை நான் நேர்மறையாக எடுத்துக்கொண்டேன். அதுதான் தொடர்ந்து ஓட வேண்டும் என்ற வெறியை எனக்குள் செலுத்தியது. 

சில நேரங்களில் மோசமான சம்பவங்கள்தான் உங்களின் வாழ்க்கையில் சிறந்த சம்பவங்களாக மாறும்...’’ என்கிற காத்தரின், 1974ல் நடந்த நியூயார்க் சிட்டி மாரத்தானில் வெற்றி பெற்றார். 1975ம் வருடம்  பாஸ்டன் மாரத்தான் பந்தய தூரத்தை 2 மணி, 51 நிமிடங்களில் கடந்தார்.

அவரால் பெண்கள் பல்வேறுவிதமான ஓட்டப்பந்தயங்களில் கலந்துகொள்வதற்கான கதவுகள் திறக்கப்பட்டன. காத்தரினை கௌரவிக்கும் விதமாக பாஸ்டனின் தடகளச் சங்கம் 261 என்ற அடையாள எண்ணை மற்றவர்களுக்குத் தரப்போவதில்லை என்று முடிவு செய்தது. 

இதுபோக பல விருதுகள் காத்தரினை தேடிவந்தன. கடந்த 2017ம் வருடம், தனது 70வது வயதில், அவமதிப்புக்கு உள்ளான பாஸ்டன் மாரத்தானில், 261 என்ற அதே அடையாள எண்ணுடன் ஓடினார் காத்தரின். அவருடன் சேர்ந்து 13,700 பெண்களும் பந்தயத்தில் ஓடினார்கள் என்பதுதான் காத்தரினின் வெற்றி.