இந்த நிமிடம் புதிதாக இருக்கும் டெக்னாலஜி, அடுத்த நிமிடத்தில் பழையதாக மாறக்கூடிய ஒரு டிஜிட்டல் உலகத்தில் வாழ்ந்து வருகிறோம். அப்படி புதிது புதிதான டெக்னாலஜிகள் அறிமுகமாகிக் கொண்டேயிருக்கின்றன. 

அந்த வகையில் புது வரவு, இ-டேஸ்ட்.அமெரிக்காவில் கிடைக்கும் ஒரு பொருளை ஆண்டிப்பட்டியில் இருந்துகொண்டே ஆன்லைனில் ஷாப்பிங் செய்வதைப் போல, உலகின் ஏதோ ஒரு மூலையில் உள்ள பேக்கரியில் இருக்கும் கேக்கை, நாம் இருக்கும் இடத்தில் இருந்துகொண்டே விர்ச்சுவல் ரியாலிட்டி மூலம் சுவைக்க முடியும். இதற்கு இ-டேஸ்ட் என்று பெயர்.

அமெரிக்காவில் உள்ள ஒஹியோ ஸ்டேட் பல்கலைக்கழகத்தில் உள்ள ஆய்வகத்தில் விர்ச்சுவல் ரியாலிட்டி நிபுணர்கள் ஆராய்ச்சி செய்து இ-டேஸ்ட் தொழில்நுட்பத்தை உருவாக்கியிருக்கின்றனர்.

இது நம்மை மகத்தான ஒரு டிஜிட்டல் சூழலுக்குள் அழைத்துச் செல்லும். அங்கே மீன், கேக், சூப் என சகல உணவுகளையும் டிஜிட்டல் முறையில் சுவைக்கலாம்.

இதுவரை நிறைய முறை இ-டேஸ்ட் கருவியை வைத்து, நூற்றுக்கும் மேற்பட்டவர்களிடம் பரிசோதனை செய்துவிட்டனர். உண்மைக்கு நிகரான சுவையைத் தருகிறது என்று 70 சதவீதம் பேர் தெரிவித்திருக்கின்றனர். மீதியிருக்கும் 30 சதவீதமும் வெற்றியடையும் நிலையில் மக்களின் பயன்பாட்டுக்கு இ-டேஸ்ட் வரலாம்.

“சுவையும், வாசனையும் நினைவுகள் மற்றும் உணர்வுகளுடன் சம்பந்தப்பட்டவை. எங்களுடைய சென்சார் மூலம் உங்களுக்கு சுவையும், வாசனையும் கடத்தப்படும்...” என்கிறார் இ-டேஸ்ட் தொழில்நுட்பத்தை வடிவமைத்தவர்களில் ஒருவரான லீ. இனிப்பு, புளிப்பு, கசப்பு, உவர்ப்பு, துவர்ப்பு ஆகிய அடிப்படையான ஐந்து சுவைகளையும் இ-டேஸ்ட் மூலம் உணரலாம்.