அவ்வளவுதான் மேட்டர். பிரபஞ்சத்தின் வைரலாக இன்று திகழும் டீப்சீக் ஏஐ நிறுவனத்தின் தலைவர்தான் லியாங் வென்ஃபெங்.டீப்சீக், ஏஐ உலகத்தின் புதிய வரவு. ‘எப்போது என்ன சொல்வார்... செய்வார்’ என்று உலக நாடுகளை ஜெர்க்கில் வைத்திருக்கும் அமெரிக்க அதிபர் டிரம்பிற்கே டீப்சீக் வரவு ஒரு ஜெர்க்கைத் தந்துள்ளது.

கடந்த சில நாட்களாக, டீப்சீக் டிரெண்டில் உள்ளது. இதற்கு முன்பு அறிமுகமான ஓப்பன் ஏஐ-யை விட, இதில் தகவல்கள் சற்று தெளிவாகவும், திருத்தமாகவும், எளிதாகவும் உள்ளன என்று இதன் பயனாளர்கள் ஆஹா... ஓஹோ என்று புகழ்ந்து வருகின்றனர்.

டீப்சீக் நிறுவனம் 2023ம் ஆண்டிலேயே அறிமுகப்படுத்தப்பட்டாலும், இந்த மாத தொடக்கத்தில் அறிமுகப்படுத்தப்பட்ட சாட் பாட்தான் தற்போது உலகளாவிய டிரெண்ட்.இப்படி உலக நாடுகள் அனைத்தும் பேசும் டீப்சீக்குக்குப் பின்னால் இருக்கும் நபர் லியாங் வென்ஃபெங். இவருடைய வயது வெறும் 40தான்.

சீனாவைச் சேர்ந்த இவர், ஜெஜியாங் பல்கலைக்கழகத்தில் பட்டம் பெற்றவர். 2015ம் ஆண்டு ஹெட்ஜ் ஃபண்ட் நிறுவனமான ஹை-ஃபிளையரைத் தொடங்கினார். அங்குதான் இவருடைய ஏஐ பயணம் ஆரம்பித்துள்ளது.ஹை-ஃபிளையர் நிறுவனத்தில் வணிக ஸ்ட்ரேட்டஜிகளுக்கு ஏஐ-யை பயன்படுத்தத் தொடங்கிய இவர், அதில் ஆர்வம் அதிகமாக 2021ம் ஆண்டு ஆயிரத்திற்கும் மேற்பட்ட Nvidia கிராஃபிக் பிராசஸர்களை வாங்கிச் சோதனைகள் செய்து வந்திருக்கிறார்.