புதிய படங்களைவிட ரீ-ரிலீஸ் படங்கள் கல்லா கட்டுகிறதா?

சினிமா என்பது வணிகம் சார்ந்ததா, பொழுதுபோக்கு சார்ந்ததா என்ற கேள்விக்கு கலவையான பதில் வருவதை தவிர்க்க முடியாது. பொதுவாக சினிமாவை தங்கள் மனக்கவலையைப் போக்கும் மருந்தகமாக பார்க்கும் பார்வை மக்களிடம் உண்டு. அடித்தட்டு மக்கள் தொடங்கி, செல்வச் சீமான்கள் வரை பேதங்கள் கடந்து சங்கமிக்கும் தளமாகவும் திரையரங்குகள் விளங்குவதால் சினிமாவுக்கு எப்போதும் வரவேற்பு உண்டு.

சேட்டிலைட், ஓடிடி என சினிமாவின் பரிமாணம் காலப்போக்கில் மாறியிருந்தாலும் தியேட்டர் அனுபவம் தனித்துவமானது, அலாதியானது என்று சொல்பவர்களின் எண்ணிக்கை அதிகம்.
பிரபலங்கள் நடித்த படங்களாக இருந்தாலும் சரி, புதுமுகங்கள் நடித்த படங்களாக இருந்தாலும் சரி ‘கன்டன்ட்’ சரியாக இருந்தால் ரசிகர்கள் வரவேற்பு கொடுக்கத் தயங்குவதில்லை.
அந்தவகையில் பல ஆண்டுகளுக்கு முன் வெளியாகி ஹிட்டான ஏராளமான படங்களை ரீ-ரிலீஸ் செய்யும் நடைமுறை சமீப காலமாக உருவாகியுள்ளது. அவை வசூல் ரீதியாகவும் லாபகரமாக இருக்கின்றன என்பதுதான் ஹைலைட்.

சிவாஜி நடித்த ‘கர்ணன்’, ‘வசந்த மாளிகை’, எம்ஜிஆர் நடித்த ‘ஆயிரத்தில் ஒருவன்’, ‘உலகம் சுற்றும் வாலிபன்’ போன்ற படங்கள் சில ஆண்டுகளுக்கு முன் வெளியாகி வயது வித்தியாசம் கடந்து ரசிகர்கள் மத்தியில் நல்ல வரவேற்பைப் பெற்றன.அதன்பிறகு ரஜினியின் ‘அண்ணாமலை’, கமலின் ‘ஆளவந்தான்’, ‘வேட்டையாடு விளையாடு’,
விஜய்யின் ‘திருமலை’, ‘காதலுக்கு மரியாதை’, ‘கில்லி’, ‘போக்கிரி’, அஜித்தின் ‘வாலி’, ‘சிட்டிசன்’, சூர்யாவின் ‘வாரணம் ஆயிரம்’, சிம்புவின் ‘விண்ணைத்தாண்டி வருவாயா’, தனுஷின் ‘யாரடி நீ மோகினி’, ‘3’, கார்த்தியின் ‘பையா’ உட்பட ஏராளமான படங்கள் வெளியாயின.

ரீ-ரிலீஸ் எப்படி நடைமுறைக்கு வந்தது?

திரையரங்குகளுக்கு கன்டன்ட் குறையும்போதும், புதிய படங்கள் எதிர்பார்த்த அளவுக்கு ஓடாத நிலையிலும் இந்த யுக்தியைக் கையாள ஆரம்பித்தார்கள் என்கிறார்கள் சில சினிமா புள்ளிகள்.
சிறிய திரையரங்கமோ, பெரிய திரையரங்கமோ எதுவாக இருந்தாலும் திரையரங்க நிர்வாகம் என்பது எந்திரங்களோடு இயங்கும் தொழிற்சாலையை நடத்துவதுபோல் பெரிய பிராசஸ். விலையுயர்ந்த படக் கருவி, மின் அமைப்புகள், ஊழியர்கள் என பல கட்டமைப்புகளைக் கொண்டது.

சீராக நிர்வாகம் செய்ய வேண்டும் என்றால் திரையங்குகளில் படங்கள் தொடர்ந்து திரையிட்டால் மட்டுமே லாபம் கடந்து அனைத்தையுமே பராமரிக்க முடியும்.
அதை கருத்தில்கொண்டு பரீட்சார்த்த முறையில் சில படங்கள் ரீ-ரிலீஸ் செய்யப்பட்டன. அதில் விஜய்யின் ‘கில்லி’, சூர்யாவின் ‘வாரணம் ஆயிரம்’, சிம்புவின் ‘விண்ணைத்தாண்டி வருவாயா’ போன்ற படங்களின் மறுவெளியீடு திரையரங்கு உரிமையாளர்களுக்கு லாபம் கொடுத்தது. எனவே ஃபிலிமில் எடுக்கப்பட்ட பல பழைய படங்களை டிஜிட்டல் வெர்ஷனுக்கு மாற்ற ஆரம்பித்தார்கள்.

இதற்கிடையில் ரீ-ரிலீஸ் படங்கள் வெளியானதில் விநோதமான மூட நம்பிக்கையும் கடைப்பிடிக்கப்பட்டதாகச் சொல்கிறார்கள்.உதாரணமாக அந்த பிரபல நடிகர் ஆன்மீகம், ஜோசியம் என ஐதீகத்தில் ஆர்வம் கொண்டவர். ஒருமுறை அவருடைய அடுத்த படம் தோல்வி காணும் என்று ஜோசியர் சொன்னதாகவும், அதைத் தவிர்க்க ஏற்கனவே தோல்வியடைந்த படத்தை ரீ-ரிலீஸ் செய்து அந்தக் கணக்கை சரிசெய்ததாகவும் பேச்சு அடிபடுகிறது.

கமல் நடித்த ‘ஆளவந்தான்’ அன்று எதிர்பார்த்த அளவு ஓடவில்லை. நீளம் ஒரு காரணம் என்பதால் மூன்று மணிநேரப் படத்தை இரண்டு மணிநேரமாகக் குறைத்து சமீபத்தில் ரீ-ரிலீஸ் செய்தார்கள். இந்த முயற்சி கமல் ரசிகர்களை குஷிப்படுத்தியது.

முதன்மை நோக்கம்

தமிழ்நாட்டில் 1160 திரையரங்குகள் உள்ளதாகச் சொல்கிறார்கள். ஒரு வாரத்துக்கு நான்கைந்து சிறிய படங்கள் வெளியானாலும் அவை அதிகபட்சம் 400 தியேட்டர்களில் மட்டுமே ரிலீஸ் ஆகின்றன.

மீதமுள்ள தியேட்டர்களுக்கு என்ன செய்வது?

பழைய படங்கள்தான் துணையாக நிற்கின்றன. ஆனால், ரீ-ரிலீஸ் படங்கள் ஓடினாலும், ஓடாவிட்டாலும் அதன் தேவை இருக்கும் என்கிறார்கள் சினிமா களநிலவரம் அறிந்தவர்கள்.கடந்த சில நாட்களுக்கு முன் வெளியான ‘வாழை’, ‘டிமான்டி காலனி’, ‘கொட்டுக்காளி’ உட்பட சில படங்களால் திரையரங்குகளுக்கு கணிசமான ‘கன்டன்ட்’ கிடைத்தது.

ஆனாலும் ‘வாழை’ 180 திரையரங்குகள், ‘டிமான்டி காலனி’ சில நூறு திரையரங்குகள், ‘கொட்டுக்காளி’ 90 திரையரங்குகள், மற்ற சிறிய படங்கள் தலா 50 திரையரங்குகள் என மொத்தமே நானூறு, ஐநூறு திரையரங்குகளுக்கு மட்டுமே புதிய கன்டன்ட் கிடைத்தது என்பதை உதாரணமாகச் சொல்கிறார்கள்.

கவர்ச்சி அம்சம்